អន្តរជាតិ
ម៉ាឡេស៊ីណែនាំឲ្យប្តីប្រពន្ធចំណាយ១០វិនាទីបង្កើតភាពផ្អែមល្អែមរាល់ថ្ងៃដើម្បីជីវិតគ្រួសាររឹងមាំ
× «ចំណាយពេលត្រឹមតែ១០វិនាទីដើម្បីថ្នាក់ថ្នមគ្នាទៅវិញទៅមករវាងប្តីប្រពន្ធ អាចធ្វើឲ្យជីវិតអាពាហ៌ពិពាហ៌កាន់តែរឹងមាំ។» នេះគឺជាការណែនាំរបស់មន្ត្រីជាន់ខ្ពស់រដ្ឋាភិបាលម៉ាឡេស៊ី ទៅកាន់គូស្នេហ៍ទាំងអស់ ដើម្បីចៀសវាងភាពនឿយណាយក្នុងជីវិតស្នេហារ និងឈានដល់ការលែងលះគ្នាវិញ ។
ទំនងជាអត្រានៃការលែងលះគ្នានៅតែជាក្តីបារម្ភនៅក្នុងសង្គមរស់នៅរបស់ម៉ាឡេស៊ីហើយទើបបានជាប្រធានបទនេះ ត្រូវបានលើកជជែកដេញដោលក្នុងកិច្ចប្រជុំសភារបស់ម៉ាឡេស៊ី ។ តែអ្វីដែលគួរឲ្យចាប់អារម្មណ៍នោះ រដ្ឋាភិបាលម៉ាឡេស៊ី បានបង្កើតយុទ្ធនាការមួយដើម្បីលើកកម្ពស់ការរស់នៅជីវិតគូកាន់តែរឹងមាំ ដោយណែនាំឲ្យប្តីប្រពន្ធ បង្កើតភាពផ្អែមល្អែមជាមួយគ្នាយ៉ាងតិច១០វិនាទីក្នុងមួយថ្ងៃ ។
អនុរដ្ឋមន្ត្រីម៉ាឡេស៊ី លោកស្រី Azizah Mohd Dun នៅថ្ងៃ២៨ វិច្ឆិកា បានថ្លែងថា៖«ជាធម្មតា គូស្នេហ៍ ដែលទើបរៀបការ តែងបង្ហាញពីសកម្មភាពខ្វះគ្នាមិនបាន ។ តែប៉ុន្មានឆ្នាំក្រោយនៃការរៀបការ ពួកគេ ក៏ចាប់ផ្តើមសោះកក្រោះនឹងគ្នា ។ ដូច្នេះសូមសាកល្បងចំណាយពេលបន្តិចបន្តួចដើម្បីថ្នាក់ថ្នមគ្នាទៅវិញទៅមកដើម្បីរឹតចំណងអ្នកឲ្យកាន់តែរឹងមាំ»។ នេះបើយោងតាមការចុះផ្សាយរបស់សារព័ត៌មាន Today Online ។
លោកស្រីអនុរដ្ឋមន្ត្រី ថ្លែងបែបនេះ ដើម្បីការពារ និងពន្យល់សមាជិកសភាបក្សប្រឆាំងម៉ាឡេស៊ី ដែលបានចោទសួររដ្ឋាភិបាលពាក់ព័ន្ធនឹង យុទ្ធនាការ «ថ្នាក់ថ្នមគ្នា១០វិនាទីដើម្បីជីវិតអាពាហ៌ពិពាហ៌រឹងមាំ» ។
តាមប្រភពព័ត៌មានដដែលនោះ លោកស្រីអនុរដ្ឋមន្ត្រី តាមរយៈកិច្ចពិភាក្សានោះ ក៏បានបន្ថែមទៀតថា ក្រសួងនារី គ្រួសារ និងការអភិវឌ្ឍសហគមន៍ម៉ាឡេស៊ី បាននិងកំពុងតែផ្សព្វផ្សាយ «យុទ្ធនាការថ្នាក់ថ្នមគ្នា ១០វិនាទី» ទៅកាន់គូស្នេហ៍ថ្មីថ្មោង ដែលយុទ្ធនាការនេះ ជាចំណាត់ការមួយរបស់រដ្ឋាភិបាលដើម្បីឆ្លើយតបនឹងបញ្ហានៃការកើនឡើងនៃការលែងលះរបស់គូស្នេហ៍វ័យក្មេងក្នុងសង្គមម៉ាឡេស៊ី ៕
Tag:
អាស៊ាន
ម៉ាឡេស៊ី
អាពាហ៌ពិពាហ៌
© រក្សាសិទ្ធិដោយ thmeythmey.com