អន្តរជាតិ
ប្រធានាធិបតី ពូទីន បង្កើតគោលនយោបាយថ្មីដើម្បីជំរុញកំណើនប្រជាជន
× រដ្ឋាភិបាលក្រុងមូស្គូ នៅតែមានកង្វល់ធំដោយសារជនជាតិដើមរបស់ខ្លួនថយចុះ បើប្រៀបធៀបទៅនឹងកំណើនប្រជាជនពិភពលោក ។ ដើម្បីឆ្លើយតបនឹងបញ្ហានេះ ប្រមុខក្រុងមូស្គូ ក៏បានស្នើឲ្យមានគោលនយោបាយលើកទឹកចិត្តកាន់តែច្រើនដើម្បីគាំទ្រ និងគាំពារគ្រួសារទាំងឡាយណា ដែលមានសមាជិកច្រើន ។
លោកប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃ២៨ វិច្ឆិកា បានព្រមានពីការថយចុះនៃប្រជាជនដើម រុស្ស៊ី ដោយសារតែការបាត់បង់អាយុជីវិតក្នុងអំឡុងពេលសង្គ្រាមលោកលើកទីពីរ និងបញ្ហាសេដ្ឋកិច្ចនៅទសវត្សរ៍ឆ្នាំ១៩៩០ ។ លោក បានស្នើឲ្យចាត់វិធានចាំបាច់ដើម្បីទប់ស្កាត់ការថយចុះនេះឲ្យបាន ។
តាមទីភ្នាក់ងារព័ត៌មានចិន Xinhua លោកប្រធានាធិបតី បានស្នើឲ្យមានការគាំទ្រផ្នែកហិរញ្ញវត្ថុសម្រាប់ក្រុមគ្រួសារដែលមានសមាជិកច្រើន និងមានចំណូលតិច ជាពិសេស ក្រុមគ្រួសារថ្មីថ្មោង។ ក្រៅពីនេះ លោកក៏ស្នើបង្កើតឲ្យមានគោលនយោបាយលើកចិត្តសម្រាប់គ្រួសារដែលមានកូនទី២ និងទី៣ ។
លោក ពូទីន ក៏បានអះអាងថា ចាប់ពីឆ្នាំ២០១៨ទៅ រដ្ឋាភិបាល នឹងផ្តល់ប្រាក់ឧបត្ថម្ភសម្រាប់ក្រុមគ្រួសារដែលទើបមានកូនទី១ រហូតដល់កូននោះ មានអាយុ ១៨ខែផងដែរ ។ ការផ្តល់សេវាអប់រំ និងសេវាសុខភាព ក៏ស្ថិតនៅក្នុងគោលនយោបាយលើកចិត្តរបស់លោកប្រធានាធិបតីផងដែរ ។
បើយោងតាមរបាយការណ៍របស់ភ្នាក់ងារស្ថិតិជាតិរុស្ស៊ី គិតត្រឹមខែកុម្ភៈ ឆ្នាំ២០១៧ រុស្ស៊ីមានប្រជាជនសរុប ១៤៦,៨ លាននាក់ ដែលចំនួននេះ បានកើនបន្តិចធៀបនឹងឆ្នាំមុនដែលចំនួនប្រជាជនសរុបមានត្រឹមតែ ១៤៦,៦ លាននាក់នោះ ។ គួរកត់សម្គាល់នោះ តាមការអះអាងរបស់ភ្នាក់ងារជាតិរុស្ស៊ីដដែល ចំនួនប្រជាជនដែលបានកើនឡើងនេះ ជាផ្នែកមួយនៃការកើនឡើងនៃចំនួនជនអន្តោប្រវេសន៍នោះទេ ពោលគឺ មិនមែនជាកំណើនប្រជាជនដើមសុទ្ធសាធឡើយ ៕
Tag:
វ៉ា្លឌីមៀ ពូទីន
ប្រជាសាស្ត្រ
រុស្ស៊ី
© រក្សាសិទ្ធិដោយ thmeythmey.com