លោក Jose Mourinho បាននិយាយក្នុងសន្និសីទសារព័ត៌មានថា មិនមានក្រុមណាសប្បាយចិត្តទេពេលប៉ះ Manchester United នៅវគ្គ១៦ក្រុមចុងក្រោយនៃពានរង្វាន់ UEFA Champions League។
Manchester United បានយកឈ្នះ CSKA Moscow ២-១ នៅទឹកដី Old Trafford ក្នុងការប្រកួតចុងក្រោយនៃក្របខណ្ឌកំពូលអឺរ៉ុប នៅរាត្រីថ្ងៃទី៥ ខែធ្នូ។ ជ័យជម្នះនេះ បានជួយឲ្យក្រុមរបស់លោក Mourinho បានកៅអីទៅវគ្គ១/៨ ផ្តាច់ព្រ័ត្រ ក្រោយបញ្ចប់ទៅក្នុងចំណាត់ថ្នាក់លេខ១ ក្នុងពូល A មាន១៥ពិន្ទុ បន្ទាប់ពីឆ្លងកាត់ការប្រកួត ៦លើក ឈ្នះ៥ ចាញ់១ ឈរលើក្រុម FC Basel ចំនួន ៣ពិន្ទុ។
ក្រោយទទួលបានជ័យជម្នះនេះ អ្នកចាត់ការទូទៅសញ្ជាតិព័រទុយហ្គាល់ វ័យ៥៤ឆ្នាំបានលើកឡើងថា៖« ខ្ញុំគិតថាវាមិនមានបញ្ហាអ្វីទេទោះជួបក្រុមណាក៏ដោយ។ ខ្ញុំមិនមែនជាមនុស្សដែលមានសំណាងទេសម្រាប់ការចាប់ឆ្នោតនោះ។ ប៉ុន្តែឥឡូវខ្ញុំផ្តោតតែលើពានក្នុងក្របខណ្ឌអង់គ្លេសប៉ុណ្ណោះ ព្រោះវគ្គខ្វែងនៅ Champions League ត្រូវចាប់ផ្តើមប្រកួតនៅខែកុម្ភៈឯណោះ។ ខ្ញុំគិតថាក្រុមដែលលេងជាមួយយើងនៅវគ្គ១៦ក្រុមចុងក្រោយនឹងមិនសប្បាយចិត្តនោះទេ។ ខ្ញុំគិតអ៊ីចឹង»។
ក្រុមបិសាចក្រហម បង្ហាញខ្លួនមិនបានល្អនោះទេទាំងលីកក្នុងស្រុក និងក្រៅស្រុកចាប់តាំងពីលោក David Moyes ឡើងដឹកនាំកាលពីឆ្នាំ ២០១៤ បន្ទាប់ពី Sir Alex Ferguson ចាកចេញ។ នេះជាលើកទីមួយហើយសម្រាប់ Manchester United ដែលអាចឈានដល់វគ្គ ១/៨ ផ្តាច់ព្រ័ត្រក្រោមការដឹកនាំរបស់ Jose Mourinho។
នៅក្នុងពូល A ខណៈ Manchester United និង Basel ចាប់ដៃគ្នាឡើងទៅវគ្គ១៦ក្រុមចុងក្រោយ ក្រុម CSKA Moscow បានធ្លាក់ទៅលេងនៅ Europa League។ Paris Saint Germain និង Bayern Munich (ពូល B) Roma និង Chelsea (ពូល C) Barcelona និង Juventus (ពូល D) សុទ្ធតែឡើងទៅវគ្គ១៦ក្រុមចុងក្រោយ ខណៈ CSKA Moscow (ពូល B), Atletico Madrid (ពូល C) Sporting CP (ពូល D) ត្រូវទៅលេងនៅ Europa League។
ក្រុមផ្សេងទៀតដែលត្រូវបញ្ចប់ការប្រកួតរបស់ខ្លួននៅយប់នេះ ប៉ុន្តែបានកក់កៅអីទៅវគ្គ១៦ក្រុមចុងក្រោយរួចរាល់ហើយរួមមាន Manchester City, Besiktas, Tottenham Hotspur និង Real Madrid។