កីឡាអន្តរជាតិ
អន្តរជាតិ
Pacquiao សង្ឃឹមថាចិននឹងមានកីឡាករលំដាប់ពិភពលោក ក្រោយបើកសាលាប្រដាល់នៅប៉េកាំង
× ស្តេចប្រដាល់អាស៊ី Manny Pacquiao សង្ឃឹមថានឹងជួយឲ្យវិស័យកីឡាប្រដាល់សកលចិន រីកចម្រើនដល់លំដាប់ពិភពលោក បន្ទាប់ពីបង្កើតសាលាបង្រៀនប្រដាល់មួយកន្លែង ក្នុងទីក្រុងប៉េកាំង។
សារព័ត៌មាន Rappler ផ្សាយថា អ្នកប្រដាល់សញ្ជាតិហ្វីលីពីន វ័យ៣៨ឆ្នាំ រួមជាមួយក្រុមហ៊ុនអភិវឌ្ឍន៍កីឡាចិន Dancing Sports បានរៀបចំពិធីចុះហត្ថលេខាមួយ ដែលរួមមានផែនការសាងសង់សាលាប្រដាល់ មានឈ្មោះថា Manny Pacquiao International Boxing Academy ក្នុងរដ្ឋធានីនៃប្រទេសចិន។
សាលាបង្រៀននេះ នឹងប្រើប្រាស់គ្រូបង្វឹកពីបរទេសដើម្បីជួយអភិវឌ្ឍកីឡាករប្រដាល់ចិន ដែលមិនធ្លាប់មានឈ្មោះបោះសំឡេង លើឆាកអន្តរជាតិពីមុនមក។
លោក Zhou Wenxin ប្រធានក្រុមហ៊ុន Dancing Sports បានលើកឡើងថា ការចងភ្ជាប់គ្នារវាងភាគីទាំងពីរ នឹងធ្វើអោយទំនាក់ទំនងចិន និងហ្វីលីពីន កាន់តែស៊ីជម្រៅក្នុងវិស័យកីឡាប្រដាល់សកល។
ផែនការបើកសាលារបស់ម្ចាស់ខ្សែក្រវាត់៨ស្ថាប័ន នៅក្នុងប្រទេសចិន ត្រូវបានប្រកាសជាលើកដំបូងកាលពីឆ្នាំ ២០១៤ ហើយ Pacquiao ធ្លាប់អះអាងដោយជឿជាក់ថា ភាពជាដៃគូនេះ អាចជួយកាត់បន្ថយកំដៅនយោបាយ រវាងហ្វីលីពីន និងចិន ដែលបានចូលរួមក្នុងជម្លោះសមុទ្រចិនខាងត្បូងផងដែរ។
ចាប់តាំងពីពេលនោះមក ទំនាក់ទំនងបានប្រសើរឡើងគួរឲ្យកត់សម្គាល់ នៅក្រោមការដឹកនាំរបស់ប្រធានាធិបតីហ្វីលីពីនបច្ចុប្បន្ន គឺលោករ៉ូឌ្រីហ្គោ ឌូទើតេ (Rodrigo Duterte) ។
មានសំណួរសួរថា ហេតុអ្វី កំពូលអ្នកប្រដាល់រួបនេះ មិនបង្កើតសាលានៅប្រទេសខ្លួនជាមុនសិន មុននឹងបើកនៅក្រៅប្រទេស? Pacquiao ដែលជាវីរបុរសម្នាក់ នៅក្នុងប្រទេសកំណើត និងជាសមាជិកព្រឹទ្ធសភាហ្វីលីពីនផង បាននិយាយថា៖«នៅហ្វីលីពីនយើង មិនមានបញ្ហា (ផលិតអ្នកប្រដាល់ល្អ) ទេ ដូច្នេះការសម្រេចបើកសាលាបង្រៀននៅក្រៅប្រទេស ជារឿងល្អបំផុត»។
នៅពេលនោះហើយ ដែលអ្នកប្រដាល់រហស្សនាម PacMan បានការពារការសម្រេចចិត្ត បើកសាលាប្រដាល់នៅក្នុងប្រទេសចិន ជំនួសឲ្យប្រទេសរបស់ខ្លួន៕
Tag:
ប្រដាល់
Manny Pacquiao
© រក្សាសិទ្ធិដោយ thmeythmey.com