ជាតិ
សេដ្ឋកិច្ច
WB៖ ភ្នំពេញត្រូវការកែលំអ ដើម្បីចៀសវាងការរាលដាលនៃភាពគ្មានសណ្ដាប់ធ្នាប់
× ភ្នំពេញ៖ បន្ទាប់ពីបានលូតលាស់ដ៏ឆាប់រហ័សក្នុងរយៈពេល ១០ឆ្នាំកន្លងមក ដែលបានរួមចំណែកបង្កើនឱកាសការងារ និងកាត់បន្ថយភាពក្រីក្រ រាជធានីភ្នំពេញត្រូវការកែលំអជាច្រើនទៀត។ នេះបើតាមរបាយការណ៍របស់ធនាគារពិភពលោក (World Bank) ស្ដីពីការអភិវឌ្ឍទីក្រុងក្នុងរាជធានីភ្នំពេញ ដែលចេញផ្សាយនៅថ្ងៃទី២០ខែធ្នូ ដែលបានលើកឡើងថា ការលើកកម្ពស់ផែនការ ការគ្រប់គ្រង និងហេដ្ឋារចនាសម្ព័ន្ធទីក្រុង គឺជាការរឿងចាំបាច់ ដើម្បីបញ្ចៀសការរីករាលដាលនៃភាពគ្មានសណ្ដាប់ធ្នាប់ ការស្ទះចរាចរណ៍ និងការបំពុលផ្សេងៗ។
របាយការណ៍ខាងលើនេះ ឲ្យដឹងថា ទីក្រុងភ្នំពេញប្រឈមបញ្ហាជាច្រើនក្នុងការផ្ដល់សេវាមូលដ្ឋាន ដែលរួមមានប្រព័ន្ធបង្ហូរទឹកស្អុយ ស្ថានីយកែច្នៃទឹកស្អុយ សេវាដឹកជញ្ជូនសាធារណៈ និងការគ្រប់កាកសំណល់រឹង។ ការគ្រប់គ្រង និងការផ្ដល់ហិរញ្ញប្បទានលើការរៀបចំទីក្រុង អភិបាលកិច្ច និងការផ្ដល់សេវា ក៏ជួបបញ្ហាប្រឈមផងដែរ។
របាយការណ៍នេះ បន្ថែមថា ទោះបីមានដំណើរការរៀបចំក្រុងដែលមានស្រាប់ក៏ដោយ ក៏ការផ្ដល់ហិរញ្ញប្បទាន និងសមត្ថភាពបច្ចេកទេស ជាញឹកញាប់ បង្កនូវឧបសគ្គជាច្រើនដល់ផែនការអភិវឌ្ឍទីក្រុង ទីតាំង និងផែនការប្រើប្រាស់ដី ជាពិសេស នៅថ្នាក់ខណ្ឌ និងសង្កាត់។
លោកស្រី Inguna Dobraja នាយិកាគ្រប់គ្រងធនាគារពិភពលោកប្រចាំកម្ពុជា មានប្រសាសន៍ដូច្នេះថា៖«ភ្នំពេញប្រឈមនឹងឱកាសដ៏សំខាន់មួយក្នុងការកែខៃទីក្រុងជាវិជ្ជមានមួយសម្រាប់អនាគតរបស់ខ្លួន ការបង្កើតការងារឲ្យបានច្រើនថែមទៀត និងការបង្កលទ្ធភាពឲ្យមានសេវាកម្មកាន់តែប្រសើរជាងមុន»។ លោកស្រីបន្ថែមថា៖«ការអភិវឌ្ឍនទីក្រុងដែលមានការគ្រប់គ្រង និងរៀបចំផែនការបានល្អ អាចជួយធ្វើឲ្យទីក្រុងមានភាពល្បីល្បាញក្នុងការធានាឲ្យមានស្ដង់ដាររស់នៅប្រសើរសម្រាប់អនាគតមនុស្សជំនាន់ក្រោយ»។
ធនាគារពិភពលោក បានផ្ដល់អនុសាសន៍មួយចំនួន ដើម្បីលើកកម្ពស់ទីក្រុងភ្នំពេញ ឲ្យមាននិរន្តរភាព និងកាន់តែមានភាពប្រកួតប្រជែង។ ធនាគារននេះ បានណែនាំឲ្យកែលម្អស្ថាប័ន និងអភិបាលកិច្ច ដើម្បីឲ្យទីក្រុងអាចអភិវឌ្ឍទៅបានប្រកបដោយភាពសុខដុម និងប្រសិទ្ធភាពជាងមុន។ ទន្ទឹមនឹងនេះ ភ្នំពេញត្រូវកែលម្អផែនការរៀបចំទីក្រុង និងការអនុវត្តផែនការ តាមរយៈការបង្កើតបទដ្ឋានគតិយុទ្ធ ក្របខណ្ឌច្បាប់ និងពង្រឹងផែនការរៀបចំទីក្រុងដែលមានស្រាប់។ លើសពីនេះ របាយការណ៍បានប្រាប់ឲ្យមានការវិនិយោគលើហេដ្ឋារចនាសម្ព័ន្ធទីក្រុងដែលប្រកបដោយនិរន្តរភាព ដើម្បីលើកកម្ពស់កម្រិតជីវភាពរស់នៅ និងភាពប្រកួតប្រជែង។ ចុងក្រោយ របាយការណ៍បានណែនាំឲ្យមានការធានាថាការរៀបចំទីក្រុង ដែលគិតគូរគ្រប់ជ្រុងជ្រោយ ដើម្បីចៀសវាងវិសមភាព៕
Tag:
ភ្នំពេញ
ធនាគារពិភពលោក
© រក្សាសិទ្ធិដោយ thmeythmey.com