កម្ពុជានឹងមានភ្លៀងស្ទើរទូទាំងប្រទេស ពីថ្ងៃទី២៦-២៨ធ្នូ

ជាតិ

កម្ពុជានឹងមានភ្លៀងស្ទើរទូទាំងប្រទេស ពីថ្ងៃទី២៦-២៨ធ្នូ

23, Dec 2017 , 7:59 am

រូបភាព

ដោយ: ថ្មីៗ

ភ្នំពេញ៖ កម្ពុជា នឹងមានភ្លៀងធ្លាក់ពីមធ្យម ទៅច្រើន ពីថ្ងៃទី២៦ ដល់ថ្ងៃទី២៨ ខែធ្នូ ដោយសារឥទ្ធិពលព្យុះទី២៧ ឈ្មោះ តឹមប៊ិន(TS TEMBIN) ដែលនឹងធ្វើដំណើរពីភាគខាងកើតប្រទេសហ្វីលីពីន ឆ្ពោះមកតំបន់ដីសណ្តរទន្លេមេគង្គ ប្រទេសវៀតណាម។

យោងតាមតាមដាន ស្ថានភាពអាកាសធាតុ ក្រសួងធនធានទឹក និងឧតុនិយម នៅថ្ងៃទី២១ ខែធ្នូ បានជូនដំណឹងថា វិសម្ពាធមួយដែលបានកើតឡើង នៅក្នុងមហាសមុទ្រប៉ាស៊ីហ្វិកកាលពីថ្ងៃទី១៩ ខែធ្នូ បានវិវត្តិទៅជាព្យុះទី២៧ ឈ្មោះ តឹមប៊ិន(TS TEMBIN) កាលពីម៉ោង១យប់រំលងអាធ្រាត្រ ឈានចូលថ្ងៃទី២១ ខែធ្នូ។

តាមក្រសួងជំនាញ ព្យុះនេះកំពុងស្ថិតនៅភាគខាងកើតប្រទេសហ្វីលីពីន ហើយវានឹងធ្វើដំណើរឆ្លងកាត់ប្រទេសហ្វីលីពីន ចូលមកក្នុងសមុទ្រចិនខាងត្បូង រួចបន្តដំណើរមកកាន់តំបន់ដីសណ្តទន្លេមេគង្គ ប្រទេសវៀតណាម។ ឥទ្ធិពលរបស់ព្យុះទី២៧ នឹងធ្វើឲ្យស្ថានភាពអាកាសធាតុនៅកម្ពុជា ចាប់ពីថ្ងៃទី២៦ -២៨ ខែធ្នូ មានពពកច្រើនដេរដាស មានភ្លៀងធ្លាក់រាយប៉ាយក្នុងក្របខណ្ឌស្ទើរទូទាំងប្រទេស ពីមធ្យមទៅច្រើន ពិសេសបណ្តាខេត្តដែលស្ថិតនៅ ជាប់តាមបណ្តោយព្រំដែនកម្ពុជា-វៀតណាម។ ចំណែកតំបន់មាត់សមុទ្រ និងនៅលើផ្ទៃសមុទ្រ ផ្ទៃមេឃមានពពកច្រើនដេរដាស មានភ្លៀងធ្លាក់ពីបង្គួរទៅច្រើន មានខ្យល់បោកបក់ខ្លាំង រលក់សមុទ្រកម្ពស់ខ្ពស់ៗ។

ក្រសួងធនធានទឹក បានអំពាវនាវដល់អាជ្ញាធរដែនដី និងប្រជាពលរដ្ឋ ពិសេសបងប្អូនប្រជានេសាទ និងអ្នកធ្វើដំណើរតាមសមុទ្រ បង្កើនការយកចិត្តទុកដាក់ខ្ពស់ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតឡើងជាយថាហេតុ៕