កាំកុងត្រូល ចាត់វិធានការលើម្សៅទឹកដោះគោរបស់ក្រុមហ៊ុន Groupe Lactalis ពីបារាំង

ជាតិ

សេដ្ឋកិច្ច

កាំកុងត្រូល ចាត់វិធានការលើម្សៅទឹកដោះគោរបស់ក្រុមហ៊ុន Groupe Lactalis ពីបារាំង

23, Dec 2017 , 9:00 pm

រូបភាព

ដោយ: ថ្មីៗ

ភ្នំពេញ៖ អគ្គនាយដ្ឋានកាំកុងត្រូលនៃក្រសួងពាណិជ្ជកម្ម កំពុងមានវិធានការចំពោះផលិតផលចិញ្ចឹមទារក និងកុមារតូចៗ ដែលផលិតដោយក្រុមហ៊ុន Groupe Lactalis ពីប្រទេសបារាំង ខណៈក្រុមហ៊ុននេះកំពុងប្រមូលផលិតផលរបស់ខ្លួនដែលមានបញ្ហាពីបណ្ដាប្រទេសនានា។

នេះបើតាមសេចក្ដីជូនដំណឹងរបស់អង្គភាពមួយនេះ នៅថ្ងៃទី២២ខែធ្នូ។

បើតាមអគ្គនាយកដ្ឋានកាំកុងត្រូល អាជ្ញាធរប្រទេសបារាំង បានចេញបទបញ្ជាស្ដីពីការព្យួរការនាំចេញ ការធ្វើចរាចរណ៍លើទីផ្សារ រយៈពេលមួយឆ្នាំ និងប្រមូលត្រឡប់មកវិញនូវផលិតផលចិញ្ចឹមទាក និងកុមារតូចៗ ដែលផលិតដោយក្រុមហ៊ុន Groupe Lactalis បន្ទាប់ពីមានបញ្ហាសុខភាព បានកើតឡើងចំពោះទារក និងកុមារតូចចំនួន ២៦នាក់។ ហើយលទ្ធផលនៃការវិភាគរបស់មជ្ឈមណ្ឌលបង្អែកជាតិប្រទេសបារាំង បានបង្ហាញអំពីការចម្លងបាក់តេរី Salmonella Agona នៅក្នុងផលិតផលខាងលើ។ ក្រុមហ៊ុនបានប្រមូលត្រឡប់មកវិញនូវផលិតផលមានបញ្ហាពីទីផ្សារបារាំង និងពីបណ្ដាប្រទេសនានា ដែលក្រុមហ៊ុនបានចែកចាយ។

ប៉ុន្តែអគ្គនាយកដ្ឋានកាំកុងត្រូល បញ្ជាក់ថា មិនមែនផលិតផលទាំងអស់របស់ក្រុមហ៊ុន Lactalis សុទ្ធតែមានបញ្ហានោះទេ ពោលគឺមួយចំនួន តាមការប្រកាសរបស់អាជ្ញាធរបារាំង។

តំណាងក្រុមហ៊ុនអង្គរដាវ័ណ្ណ(ខេមបូឌា) ដែលជាអ្នកនាំចូលម្សៅទឹកដោះគោរបស់ក្រុមហ៊ុន Lactalis ត្រូវបានស្រង់សំដីដោយកាសែតភ្នំពេញប៉ុស្តិ៍ កាលពីពេលថ្មីៗនេះថា ក្រុមហ៊ុនខ្លួនកំពុងប្រមូលម្សៅទឹកដោះគោពីរប្រភេទពីទីផ្សារប្រទេសកម្ពុជា ដែលសង្ស័យថាមានប្រឡាក់មេរោគ Salmonella ។

លោក មាស ច័ន្ទអេរីវ័ណ្ណ នាយកប្រតិបត្តិក្រុមហ៊ុនអង្គរដាវ័ណ្ណ ថ្លែងថា ផលិតផលដែលសង្ស័យទាំងពីរប្រភេទនេះមានលេខបាច់ 17C0012746 ផុតកំណត់នៅថ្ងៃទី១០ ខែឧសភា ឆ្នាំ២០១៩ សម្រាប់ទឹកដោះគោ Celia AD និងលេខបាច់ 17C0012679 ផុតកំណត់នៅថ្ងៃទី២៧ ខែមេសា ឆ្នាំ២០១៩ សម្រាប់ទឹកដោះគោ Celia Mama ហើយទឹកដោះគោដែលមានលេខបាច់ និងថ្ងៃផុតកំណត់ផ្សេងពីនេះមិនពាក់ព័ន្ធនឹងការប្រមូលនេះឡើយ។

វត្តមានបាតេរី Salmonella ក្នុងផលិតផលខាងលើនឹងបង្កគ្រោះថ្នាក់ដល់សុខភាពទារក និងកុមារតូច ដោយបង្កឲ្យមានជំងឺប្រព័ន្ធរំលាយអាហារ គ្រុនពោះវៀន ជាដើម។ នេះបើតាមជាអះអាងរបស់អគ្គនាយដ្ឋានកាំកុងត្រូល ដែលបានបន្តថាខ្លួនកំពុងចាត់វិធានការរាំងខ្ទប់មិនឲ្យនាំចូលផលិតផលខាងលើ និងផ្ដល់ព័ត៌មានដល់អ្នកពាក់ព័ន្ធការលក់ផលិតផលនេះ ព្រមទាំងត្រួតពិនិតនៅតាមផ្សារ។ អង្គភាពនេះបានផ្ដល់លេខទូរសព្ទបីខ្សែដើម្បីអាចឲ្យពលរដ្ឋរាយការណ៍បើប្រទះឃើញទំនិញទាំងនោះ ដែលរួមមានលេខ ០១២ ២៧៨ ៧៨៩ ឬ ០៩២ ៩៩៩ ៨៦៧ ឬ ០១២ ៩៨៥ ៥៧៧ ៕