ជាតិ
ក្រុមអភិរក្សរួមគ្នាស្រាវជ្រាវប្រភេទថនិកសត្វ រស់នៅក្នុងតំបន់បេតិកភណ្ឌធម្មជាតិភ្នំត្បែង
× ភ្នំពេញ៖ ក្រុមអ្នកស្រាវជ្រាវពីក្រសួងបរិស្ថាន អង្គការសមាគមអភិរក្សសត្វព្រៃនៅកម្ពុជា(WCS) និងប្រជាសហគមន៍ បានរួមគា្ន បំពាក់ម៉ាស៊ីនថតស្វ័យប្រវត្តិនៅទីតាំងចំនួន២៤សំខាន់ៗ ក្នុងតំបន់បេតិកភណ្ឌធម្មជាតិភ្នំត្បែង ខេត្តព្រះវិហារ ដើម្បីសិក្សាស្រាវជ្រាវ ពពួកថនិកសត្វមានមាឌតូច និងមធ្យម ដែលកំពុងរស់នៅតំបន់នេះ។ តាមអង្គការ WCS សត្វព្រៃជាច្រើនប្រភេទដូចជា ទោចម្កុដ ខ្លាឃ្មុំ និងស្វាព្រាម ក៏មានវត្តមានរស់នៅក្នុងតំបន់នេះដែរ ហើយលទ្ធផលពីការស្រាវជ្រាវនេះ ផ្តល់សារៈសំខាន់សម្រាប់ក្រុមអភិរក្ស ក្នុងការរៀបចំផែនការគ្រប់គ្រង និងអភិរក្សសត្វព្រៃសំខាន់ៗទាំងអស់នោះឲ្យនៅគង់វង្ស។
ក្រុមអភិរក្សស្រាវជ្រាវមកពីក្រសួងបរិស្ថាន អង្គការWCS និងប្រជាសហគមន៍ បានរួមគា្នបំពាក់ម៉ាស៊ីនថតស្វ័យប្រវត្តិនៅទីតាំងសំខាន់ៗ ដើម្បីសិក្សាស្រាវជ្រាវពពួកថនិកសត្វមានមាឌតូច និងមធ្យម ដែលកំពុងរស់នៅក្នុងតំបន់បេតិកភណ្ឌធម្មជាតិភ្នំត្បែង ខេត្តព្រះវិហារ។
តាមប្រកាសព័ត៌មានរបស់អង្គការ WCS តំបន់បេតិកភណ្ឌធម្មជាតិភ្នំត្បែង មាននៅសេសសល់ទីជម្រកប្រភេទព្រៃស្រោង និងព្រៃពាក់កណ្តាលស្រោង នៃតំបន់ខ្ពង់រាបភាគខាងជើងប្រទេសកម្ពុជា ដែលមានសារៈសំខាន់ខ្លាំងសម្រាប់ការអភិរក្សប្រភេទសត្វព្រៃសំខាន់ៗ និងផ្តល់សេវាកម្មអេកូឡូស៊ីផងដែរ ហើយព្រៃឈើនៅតំបន់នេះ ក៏ជួយផ្គត់ផ្គង់ទឹកសាបដល់ប្រជាសហគមន៍ ដែលរស់នៅជុំវិញ និងការពារកុំឲ្យមានការហូរច្រោះដីពីតំបន់ខ្ពស់។
សត្វព្រៃជាច្រើនប្រភេទដូចជា ទោចម្កុដ ខ្លាឃ្មុំ និងស្វាព្រាម ក៏មានវត្តមានរស់នៅក្នុងតំបន់នេះដែរ ប៉ុន្តែសកម្មភាពបរបាញ់ និងការកាប់ឈើខុសច្បាប់ដែលនៅតែបន្តកើតមាន កំពុងគំរាមកំហែងដល់ធនធានព្រៃឈើ និងជីវចម្រុះនៅតំបន់នេះ។ នេះបើតាមប្រកាសព័ត៌មានដដែល។
ក្រុមស្រាវជ្រាវបានចំណាយពេល៤ថ្ងៃ និងបែងចែកគ្នាជា៣ក្រុម ដើម្បី បំពាក់ម៉ាស៊ីនថតស្វ័យប្រវត្តិចំនួន២៤គ្រឿងតាមទីតាំងដែលបានកំណត់។ នេះបើតាមលោក ម៉ៅ ឃៀន អ្នកសម្របសម្រួលគម្រោងស្រាវជ្រាវសត្វព្រៃ ប្រចាំតំបន់ខ្ពង់រាបភាគខាងជើងរបស់អង្គការWCS។ លោក ឃៀន បន្តទៀតថា លទ្ធផលដែលបានពីការសិក្សាស្រាវជ្រាវនេះ មានសារៈសំខាន់សម្រាប់ក្រុមអភិរក្ស ដើម្បីរៀបចំផែនការគ្រប់គ្រង និងអភិរក្សសត្វព្រៃសំខាន់ៗទាំងអស់នោះឲ្យនៅគង់វង្ស។
ភ្នំត្បែង ត្រូវបានបង្កើតជាតំបន់បេតិកភណ្ឌធម្មជាតិនៅក្នុងឆ្នាំ២០១៦ គឺជាផ្នែកដ៏សំខាន់នៃអាងស្តុកទឹកផ្នែកខាងលើស្ទឹងសែនដែលជាដៃរបស់បឹងទន្លេសាប។ តំបន់បេតិកភណ្ឌធម្មជាតិភ្នំត្បែង គ្របដណ្តប់លើផ្ទៃដីប្រមាណ២,៥២៩ ហិកតា និងមានកម្ពស់រហូតដល់ ៤០០ម៉ែត្រ៕
Tag:
WCS
ថនិកសត្វ
ភ្នំត្បែង
ព្រះវិហារ
© រក្សាសិទ្ធិដោយ thmeythmey.com