«សិលាចារឹកព្រះគោ» ដែលមានផ្ទាំងតួអក្សរស្អាតជាងគេ

ជាតិ

«សិលាចារឹកព្រះគោ» ដែលមានផ្ទាំងតួអក្សរស្អាតជាងគេ

31, Dec 2017 , 9:59 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ នៅក្នុងបន្ទប់សិលាចារឹកនៃសារមន្ទីរជាតិអង្គរ មានផ្ទាំងសិលាចារឹកជាច្រើនផ្ទាំង ដែលដាក់តាំងបង្ហាញឱ្យភ្ញៀវទស្សនា។ ក្នុងចំណោមនោះ មានផ្ទាំងសិលាចារឹកមួយមានឈ្មោះថា ព្រះគោ ដែលមានទំហំធំ និងមានតួអក្សរស្អាត និងច្បាស់ជាងគេ។

សិលាចារឹកប្រាសាទព្រះគោ មានរចនាបថព្រះគោ ចារនៅស.វទី៩។ ផ្ទាំងសិលានេះ ធ្វើពីថ្មភក់ ហើយត្រូវបានគេឆ្លាក់ជា២ភាសាផ្សេងគ្នានៅសងខាង។ នៅផ្នែកម្ខាង គេចារជាភាសាខ្មែរ និងម្ខាងទៀត ជាភាសាសំស្ក្រឹត ហើយផ្នែកខាងលើបានប្រាប់ពីកាលបរិច្ឆេទ នាឆ្នាំ ៨៧៩ នៃគ.ស ក្នុងរាជ្យព្រះបាទ ឥន្ទ្រវរ្ម័នទី១។

លោក សេង កុម្ភៈ ប្រធានផ្នែកថែរក្សាសមុច្ច័យនៃសារមន្ទីរជាតិអង្គរ បានឱ្យដឹងថា ចំណុចពិសេសនៃសិលាចារឹកព្រះគោ គឺមានផ្ទាំងធំ និងមានអក្សរសា្អតជាងគេ។ សិលាចារឹកនេះ មានចារជា ២ភាសា គឺភាសាខ្មែរ សរសេរជាព្យាង្គរាយ ចំណែកភាសាសំស្ក្រឹត សរសេរជាកំណាព្យ។ តួអក្សរ សរសេរជ្រៅ ច្បាស់ មូល ព្រោះថាគេបានជ្រើសរើសថ្មដែលមានគុណភាពល្អយកមកចារ ឬសរសេរ។

សារមន្ទីរជាតិអង្គរ បានសង្ខេបខ្លឹមសារក្នុងសិលាចារឹកនោះ ហើយសារព័ត៌មានថ្មីៗ សុំដងស្រង់យកបានចុះផ្សាយ ដូចខាងក្រោមនេះ៖

«ព្រះបាទយសោវរ្ម័នទី១ ជាព្រះរាជបុត្រារបស់ព្រះបាទ ឥន្ទ្រវរ្ម័នទី១ ក៏បានចារបំពេញបន្ថែមនា ឆ្នាំ៨៩៨ នៃគ្រឹស្តសករាជ ស្តីពីការកសាងរបស់ព្រះរាជបិតា ពីការគ្រប់គ្រងរាជ្យនាឆ្នាំ ៨៧៧ នៃគ្រឹស្តសករាជ ពីរាជរវង្សានុវង្ស ពីការគោរពដល់លទិ្ធទេវរាជ និងព្រះរាជទ្រព្យ ដូចជាប្រាសាទនានា រាជបល្ល័ង និងព្រះរាជរថ។ អត្ថបទក៏បានប្រាប់ឱ្យដឹងពីការកសាងបដិមា ព្រះសិវៈចំនួន ៣អង្គ និងព្រះនាងទេវី ចំនួន៣អង្គ នាឆ្នាំ ៨៧៩នៃគ.ស ព្រះពរ និងបណ្តាសាររបស់ព្រះរាជា។ នៅឆ្នាំ៨៩៣ នៃគ.ស ព្រះបាទយសោវរ្ម័នទី១ បានដាក់ព្រះរាជអាជ្ញាសម្រាប់ការធ្វើដង្វាយដល់ទេព ព្រះនាមបរមស្វរៈ (ជ័យវរ្ម័នទី២) និងប្រថិវិន្ទ្រសេ្វរៈ ដែលតម្កល់ក្នុងទីប្រាសាទព្រះគោ។ ព្រះរាជដង្វាយមានជាអាទិ៍ គ្រឿងសក្ការៈបូជា និងខ្ញុំកំដរ»៕