សមត្ថកិច្ចឃាត់មនុស្សជាង១ម៉ឺននាក់ ក្នុងករណីបទល្មើសគ្រឿងញៀន នៅឆ្នាំ២០១៧

ជាតិ

សមត្ថកិច្ចឃាត់មនុស្សជាង១ម៉ឺននាក់ ក្នុងករណីបទល្មើសគ្រឿងញៀន នៅឆ្នាំ២០១៧

02, Jan 2018 , 8:39 am

រូបភាព

អាជ្ញាធរដុតបំផ្លាញគ្រឿងញៀន ដែលរឹបអូសបានពីជនល្មើស កាលពីខែមិថុនា ឆ្នាំ២០០១៧

ដោយ:

ភ្នំពេញ៖ សមត្ថកិច្ចឃាត់ខ្លួន ជនល្មើសជាង១ម៉ឺននាក់ ក្នុងករណីបទល្មើសគ្រឿងញៀន នៅក្នុងឆ្នាំ២០១៧។ នេះបើតាមរបាយការណ៍បង្ក្រាបគ្រឿងញៀនពេញមួយឆ្នាំ របស់គណៈកម្មការប្រឆាំងគ្រឿងញៀន នៃក្រសួងមហាផ្ទៃ។

តាមរយៈសកម្មភាពបង្ក្រាបគ្រឿងញៀននេះ សមត្ថកិច្ចបានឃាត់ខ្លួនមនុស្ស១៧,៨៧៧នាក់ (ស្រី១,៥៨២នាក់) ដោយរឹបអូសគ្រឿងញៀនគ្រប់ប្រភេទជាង១៧៣គីឡូក្រាម និង៨៨៦កញ្ចប់ រួមទាំងកញ្ឆាក្រៀមជាង១២៣គីឡូក្រាម និង២៧៥,៨១៥ដើម។ រថយន្តចំនួន៧៩គ្រឿង ម៉ូតូ២,០០៧គ្រឿង ទូរស័ព្ទ៤៦១៩គ្រឿង ជញ្ជីង៣៤៣គ្រឿង អាវុធខ្លីចំនួន១៧ដើម អាវុធវែង៤ដើម ចលនៈ និងអចលនទ្រព្យស្នើសុំបង្កកមាន៤ករណី ចំនួន១៣កន្លែង។ នេះបើតាមរបាយការបង្ក្រាបគ្រឿងញៀន ចំនួន៨,១៥២ករណី នៅក្នុងយុទ្ធនាការ២លើក ក្នុងឆ្នាំ២០១៧។

កាលពីខែតុលា ឆ្នាំ២០១៧ សម្ដេចនាយករដ្ឋមន្ត្រីហ៊ុន សែន បាននិយាយថា កម្ពុជាមិនមែនជាប្រទេសដាំអាភៀន ឬផលិតថ្នាំញៀនដូចប្រទេសមីយ៉ាន់ម៉ា ថៃ ឡាវ នោះទេ តែកម្ពុជាជាប្រទេសរងគ្រោះ ដោយសារត្រូវបានជនល្មើសប្រើប្រាស់ជាកន្លែងឆ្លងកាត់ និងចែកចាយគ្រឿងញៀនប៉ុណ្ណោះ។ តាមរយៈទស្សនៈនេះ ប្រមុខរដ្ឋាភិបាល បានបង្គាប់ឲ្យសមត្ថកិច្ចជំនាញគ្រប់ជាន់ថ្នាក់ទប់ស្កាត់គ្រឿងញៀន ដែលកំពុងប្រព្រឹត្តនៅក្នុងប្រទេសឲ្យខានតែបាន៕