ជាតិ
ក្រោយឈប់ធ្វើនយោបាយ លោក ម៉ម សូណង់ដូ វ័យ៧៥ឆ្នាំ លាលែងពីប្រធានវិទ្យុសំបុកឃ្មុំ លោក ម៉ម សូណង់ដូ នាអំឡុងបាតុកម្មមួយក្នុងរាជធានីភ្នំពេញកាលពីឆ្នាំ២០១៤។ រូបថត AFP
× ភ្នំពេញ៖ ក្រោយឈប់ធ្វើនយោបាយហើយ អតីតប្រធានគណបក្សសំបុកឃ្មុំសង្គមប្រជាធិបតេយ្យលោក ម៉ម សូណង់ដូ បច្ចុប្បន្នមានវ័យ៧៥ឆ្នាំ ក៏លាលែងពីតួនាទីប្រធានវិទ្យុសំបុកឃ្មុំដែរ។
លោក ម៉ម សូណង់ដូ បានលើកយកហេតុផលថា ការលាលែងពីតំណែងប្រធានគណបក្សនេះ ដោយសារតែលោកចង់ទុកឱកាសឲ្យអ្នកនយោបាយវ័យក្មេង បំពេញកាតព្វកិច្ចស្នេហាជាតិ តាមគន្លងដែលលោកធ្លាប់អនុវត្តក្នុងកិច្ចការសង្គម រយៈពេល២២ឆ្នាំមកនេះ។ ចំណែកតួនាទីប្រធានវិទ្យុសំបុកឃ្មុំលោក សូណង់ដូ ផ្ទេរឲ្យទៅលោកស្រី ឌិន ផាណារ៉ា ប្រធានស្តីទីវិទ្យុសំបុកឃ្មុំ។
បើទោះជាលាលែងពីតួនាទីប្រធានបក្ស និងប្រធានវិទ្យុក្តី ប៉ុន្តែលោក ម៉ម សូណង់ដូ នៅរក្សាការងារសកម្មភាពមួយ គឺកិច្ចការមនុស្សធម៌ មិនប្រកាន់និន្នាការនយោបាយ។ នេះបើតាមលិខិតរបស់លោក ម៉ម សូណង់ ដែលកំពុងស្នាក់នៅប្រទេសបារាំង។
លោក ម៉ម សូណង់ដូ ត្រូវបានចៅក្រមស៊ើបសួរសាលាដំបូងរាជធានីភ្នំពេញ កោះហៅចូលបំភ្លឺនៅថ្ងៃទី១១ មករាខាងមុខនេះ ជុំវិញរឿងលោក កឹម សុខា អតីតប្រធានគណបក្សសង្គ្រោះជាតិ ដែលជាប់ទោសប្រព្រឹត្តអំពើក្បត់ជាតិ ក្រោមបទចោទ ឃុបឃិតជាសម្ងាត់ជាមួយបរទេស (សន្ទិដ្ឋិភាព) ។ ប៉ុន្តែអតីតប្រធានគណបក្សសំបុកឃ្មុំសង្គមប្រជាធិបតេយ្យលោក ម៉ម សូណង់ដូ បដិសេធចូលបំភ្លឺក្រោមហេតុផលថា ខ្លួនកំពុងសម្រាកពិនិត្យតាមដានជំងឺនៅមន្ទីពេទ្យ ប្រទេសបារាំង៕
Tag:
ម៉ម សូណង់ដូ
សំបុកឃ្មុំ
© រក្សាសិទ្ធិដោយ thmeythmey.com