កីឡាជាតិ
ជាតិ
បឹងកេតអាចឈានដល់កិច្ចព្រមព្រៀងយកកីឡដ្ឋានខេត្តកំពតធ្វើជាផ្ទះសម្រាប់រដូវកាលថ្មី
× ក្លិបបឹងកេតបាននិងកំពុងចរចាជាមួយថ្នាក់ដឹកនាំកីឡដ្ឋានខេត្តកំពត ដើម្បីយកទីតាំងនេះធ្វើជាម្ចាស់ផ្ទះការប្រកួតពានរង្វាន់ក្របខណ្ឌលីគកំពូលកម្ពុជា និងពានរង្វាន់សម្តេច ហ៊ុន សែន ប្រចាំឆ្នាំ២០១៨ ដែលនឹងមកដល់ក្នុងពេលឆាប់ៗខាងមុខនេះ។ ពាក់ព័ន្ធការចរចានេះ លោក បែ មករា អ្នកចាត់ការទូទៅក្លិបបឹងកេតបញ្ជាក់ថា កំពុងស្ថិតទៅរកការព្រមព្រៀងស្ទើរ១០០ភាគរយ។
ដោយមានលក្ខខណ្ឌពីសហព័ន្ធកីឡាបាល់ទាត់កម្ពុជាដែលតម្រូវឲ្យក្លិបនីមួយៗត្រូវមានកីឡដ្ឋានផ្ទាល់ខ្លួនដើម្បីធ្វើម្ចាស់ផ្ទះការប្រកួតពានរង្វាន់ក្របខណ្ឌលីគកំពូលកម្ពុជា និងពានរង្វាន់សម្តេច ហ៊ុន សែន សម្រាប់រដូវកាលឆ្នាំ២០១៨។ ក្លិបបឹងកេតម្ចាស់ជើងឯកឆ្នាំ២០១៧ ដែលតែងតែប្រើពហុកីឡដ្ឋានជាតិធ្វើជាម្ចាស់ផ្ទះ បាននិងកំពុងចែវចូវកីឡដ្ឋានខេត្តកំពតដើម្បីធ្វើជាម្ចាស់ផ្ទះសម្រាប់រដូវក្រោយ។
«ពួកយើងកំពុងរៀបចំលើគម្រោងនេះ ជាការពិតណាស់យើងនិងខេត្តកំពតកំពុងតែពិភាក្សាលើលក្ខខណ្ឌមួយចំនួនដើម្បីឈានទៅធ្វើជាម្ចាស់ផ្ទះនៅទីនោះ។ ដាច់ខាតយើងត្រូវតែមានកីឡដ្ឋានផ្ទាល់ខ្លួនមួយសម្រាប់ធ្វើម្ចាស់ផ្ទះនៅឆ្នាំ២០១៨ ព្រោះវាជាលក្ខខណ្ឌរបស់សហព័ន្ធកីឡាបាល់ទាត់កម្ពុជា ដូច្នេះយើងមិនអាចបន្តប្រើប្រាស់ពហុកីឡដ្ឋានជាតិទៀតនោះទេ»។ នេះជាការលើកឡើងរបស់លោក បែ មករា អ្នកចាត់ការទូទៅក្លិបបឹងកេត ហើយលោកបានបន្ថែមថា ការពិភាក្សាកំពុងដំណើរការទៅរកកិច្ចព្រមព្រៀងស្ទើរ១០០ភាគរយ។
ទន្ទឹមនឹងនេះ លោក ចាន់ ចេស្តា អភិបាលខេត្តកំពតបានបញ្ជាក់ថា លោកស្វាគមន៍ជានិច្ចចំពោះក្លិបដែលចង់ប្រើកីឡដ្ឋានខេត្តកំពតធ្វើជាម្ចាស់ផ្ទះនៃការប្រកួតផ្សេងៗ។ ការអះអាងបែបនេះដោយសារលោកយល់ថា តាមរយៈការរៀបចំការប្រកួតនៅទីនោះនឹងធ្វើឲ្យវិស័យកីឡាបាល់ទាត់នៅខេត្តកំពតកាន់តែរីកចម្រើន ព្រោះបច្ចុប្បន្នមានយុវជនជាច្រើនលេងកីឡានេះ។
លោក បែ មករា បានបញ្ជាក់បន្ថែមថា ប្រសិនបើការពិភាក្សារវាងថ្នាក់ដឹកនាំក្លិប និងខេត្តកំពតឈានដល់កិច្ចព្រមព្រៀង ក្លិបនឹងជួសជុលកែលម្អចំណុចមួយចំនួននៃកីឡដ្ឋាននេះឲ្យក្លាយជាកីឡដ្ឋានមានស្តង់ដាមួយសម្រាប់ត្រៀមធ្វើម្ចាស់ផ្ទះនៅឆ្នាំ២០១៨។ ពានរង្វាន់ក្របខណ្ឌលីគកំពូលកម្ពុជាប្រចាំឆ្នាំ២០១៨ នឹងបើករដូវកាលថ្មីនៅថ្ងៃទី៣ ខែមីនា ឆ្នាំ២០១៨ ហើយគ្រោងបញ្ចប់នៅថ្ងៃទី៣០ ខែកញ្ញា ឆ្នាំ២០១៨។ ចំណែកពានរង្វាន់សម្តេច ហ៊ុន សែន បើករដូវកាលថ្មីនៅថ្ងៃទី៧ កុម្ភៈ ដោយគ្រោងបញ្ចប់នៅថ្ងៃទី៦ តុលា ឆ្នាំ២០១៨៕
Tag:
បែ មករា
Cambodian League
© រក្សាសិទ្ធិដោយ thmeythmey.com