ព្រះខ័នរាជស្វាយរៀងទទួលបាន១១៦លានរៀលដែលជាទឹកប្រាក់ច្រើនជាងគេនៅឆ្នាំ២០១៧

កីឡាជាតិ

ជាតិ

ព្រះខ័នរាជស្វាយរៀងទទួលបាន១១៦លានរៀលដែលជាទឹកប្រាក់ច្រើនជាងគេនៅឆ្នាំ២០១៧

03, Jan 2018 , 8:39 am

រូបភាព

ដោយ:

ភ្នំពេញ៖ ក្រុមព្រះខ័នរាជស្វាយរៀងទទួលបានប្រាក់រង្វាន់លើកទឹកចិត្តច្រើនជាងគេនៅឆ្នាំ២០១៧ ក្រោយឈ្នះជើងឯកពានរង្វាន់សម្តេច ហ៊ុន សែន និងបញ្ចប់ចំណាត់ថ្នាក់លេខ៣ពានរង្វាន់ក្របខណ្ឌមិត្តហ្វូនខេមបូឌានលីក។ ណាហ្គាវើល បឹងកេត ក្រសួងការពារជាតិ និងអគ្គិសនីកម្ពុជាឈរចំណាត់ថ្នាក់ជាបន្តបន្ទាប់ជាក្រុមទទួលបានថវិកាលើកទឹកចិត្តនៅឆ្នាំនេះ។ ចំនួនថវិកានេះមិនរាប់បញ្ចូលប្រាក់រង្វាន់លក្ខណៈបុគ្គលដែលគ្រោងប្រកាសនៅថ្ងៃទី២៥ ខែមករា ឆ្នាំ២០១៨ នោះទេ។

ក្រុមបាល់ទាត់ព្រះខ័នរាជស្វាយរៀងបានឈរចំណាត់ថ្នាក់លេខ១ជាក្រុមទទួលបានរង្វាន់លើកទឹកចិត្តច្រើនជាងនៅឆ្នាំ២០១៧ ដែលមានចំនួន១១៦លានរៀល(ជិត៣ម៉ឺនដុល្លារ)។ ថវិកាលើកទឹកចិត្តទាំងនេះក្រុមព្រះខ័នរាជស្វាយរៀងទទួលបានពីការឈ្នះជើងឯកពានរង្វាន់សម្តេច ហ៊ុន សែន ចំនួន៨០លានរៀល និងចំណាត់ថ្នាក់លេខ៣ពានរង្វាន់ក្របខណ្ឌលីកកំពូលកម្ពុជាចំនួន៣៦លានរៀល។

ក្រោយទទួលបាន៤០លានរៀលពីការគ្រងជើងឯករងពានរង្វាន់សម្តេច ហ៊ុន សែន និង៣០លានរៀលពីការឈរចំណាត់ថ្នាក់លេខ៤ពានរង្វាន់ក្របខណ្ឌមិត្តហ្វូនខេមបូឌានលីគនាំឲ្យក្រុមណាហ្គាវើលក្លាយជាក្រុមលេខ២ដែលទទួលបានថវិកាលើកទឹកចិត្តច្រើនជាងគេនៅឆ្នាំនេះ ដែលមានចំនួន៧០លានរៀល។ ចំណែកក្រុមបឹងកេតក្រោយគ្រងជើងឯកពានរង្វាន់ក្របខណ្ឌលីកកំពូលកម្ពុជាឆ្នាំ២០១៧ ជាក្រុមលេខ៣ក្រោយទទួលបានថវិកាលើកទឹកចិត្ត៦០លានរៀល។

ដោយឡែក ក្រុមជើងឯករងពានរង្វាន់ក្របខណ្ឌលីគកំពូលកម្ពុជាក្រសួងការពារជាតិ និងក្រុមលេខ៣ពានរង្វាន់សម្តេច ហ៊ុន សែន អគ្គិសនីកម្ពុជាឈរចំណាត់ថ្នាក់ជាបន្តបន្ទាប់ជាមួយថវិកាលើកទឹកចិត្ត៤៦លានរៀល និង២០លានរៀល។ តែយ៉ាងណា ថវិកាទាំងនេះមិនបូកបញ្ចូលប្រាក់រង្វាន់លក្ខណៈបុគ្គលដែលគ្រោងប្រកាសនៅថ្ងៃទី២៥ ខែមករា ឆ្នាំ២០១៨ ឡើយ៕