សំណុំរឿងអតីតអ្នកកាសែតនៃអាស៊ីសេរី ឡើងដល់តុលាការកំពូល

ជាតិ

សំណុំរឿងអតីតអ្នកកាសែតនៃអាស៊ីសេរី ឡើងដល់តុលាការកំពូល

03, Jan 2018 , 10:45 am

រូបភាព

លោក អ៊ួន ឈិន (ខាងឆ្វេងដៃ) និងលោក យាង សុជាមេត្តា (ខាងស្តាំដៃ)។ រូបពីហ្វេសប៊ុកលោក យាង សុជាមេត្តា

ដោយ: ថ្មីៗ

ភ្នំពេញ៖ លោកមេធាវី កែវ វ៉ាន្នី បានយកសំណុំរឿងលោក អ៊ួន ឈិន និងលោក យាង សុជាមេត្តា អតីតអ្នកកាសែតនៃវិទ្យុអាស៊ីសេរី ទៅដាក់នៅតុលាការកំពូល ដើម្បីសុំឲ្យអ្នកទាំងពីរ រស់នៅក្រៅឃុំជាបណ្តោះអាសន្ន។ នេះបើតាមពាក្យបណ្តឹងសាទុក្ខរបស់លោកមេធាវី កែវ វ៉ាន្នី ដែលធ្វើឡើងនៅថ្ងៃទី២ ខែមករា ឆ្នាំ២0១៨។

ការដាក់បណ្តឹងសាទុក្ខទៅកាន់តុលាការកំពូល គឺដោយសារតែលោកមេធាវី កែវ វ៉ាន្នី មិនអាចទទួលយកបាន ដែលសាលាដំបូងរាជធានីភ្នំពេញ និងសាលាឧទ្ធរណ៍ មិនព្រមឲ្យកូនក្តីទាំងពីររបស់លោក បានរស់នៅក្រៅពន្ធនាគារជាបណ្តោះអាសន្ន។

លោក អ៊ួន ឈិន និងលោក យាង សុជាមេត្តា ត្រូវបានសមត្ថកិច្ចចាប់ខ្លួន កាលថ្ងៃទី១៤ ខែវិច្ឆិកា ឆ្នាំ២0១៧ ដោយសង្ស័យថា បានដំឡើងប្រព័ន្ធផ្សព្វផ្សាយ និងផលិតព័ត៌មានដោយខុសច្បាប់ ហើយបញ្ចូនទៅឲ្យស្ថាប័នរបស់ខ្លួន ដែលមានមូលដ្ឋាននៅរដ្ឋធានីវ៉ាស៊ីតោននៃសហរដ្ឋអាមេរិក។

បច្ចុប្បន្ន សំណុំរឿងរបស់អ្នកទាំងពីរ កំពុងសិ្ថតក្នុងដៃចៅក្រមស៊ើបសួរនៃសាលាដំបូងរាជធានីភ្នំពេញ។ ខណៈសំណុំរឿងនេះ កំពុងស្ថិតក្នុងដំណាក់កាលនៃការស៊ើបសួរ លោកមេធាវី ក៏ព្យាយាមសុំឲ្យដោះលែងកូនក្តីរបស់ខ្លួន ជាបណ្តោះអាសន្ន។ ដោយសារតែសាលាដំបូងរាជធានីភ្នំពេញនិងសាលាឧទ្ធរណ៍ សុទ្ធតែបដិសេធនឹងសំណើនេះ លោកមេធាវី ក៏បន្តដាក់សំណើទៅកាន់តុលាការកំពូល៕