ជាតិ
លោក ង៉ាន់ ភិរុណ ឡើងកាន់តំណែងជាអភិបាលរងខេត្ត សៀមរាប ជាផ្លូវការ
× សៀមរាប៖ លោក ង៉ាន់ ភិរុណ មន្ត្រីនៃទីស្តីការគណៈរដ្ឋមន្ត្រី ទើបនឹងត្រូវបានរាជរដ្ឋាភិបាលកម្ពុជា សម្រេចតែងតាំងជាអភិបាលរងខេត្ត សៀមរាប ជំនួសអភិបាលរងមួយរូប ដែលដល់អណត្តិការងារ។ ពិធីប្រកាសតែងតាំងជាផ្លូវការ ត្រូវបានរៀបចំធ្វើនៅរសៀលថ្ងៃទី៣ ខែមករា ឆ្នាំ ២០១៨ នៅរដ្ឋបាលខេត្ត សៀមរាប។
លោក ង៉ាន់ ភិរុណ ឡើងជាអភិបាលរងខេត្ត សៀមរាប ជំនួសលោក សង់ រីហា ដែលដល់អាណត្តិការងារជាអភិបាលរងរយៈពេល ៨ឆ្នាំ។ ក្នុងសេចក្តីសម្រេចរបស់រាជរដ្ឋាភិបាល បានសម្រេចឱ្យលោក សង់ រីហា ត្រឡប់ទៅបំពេញការងារនៅក្រសួងសុខាភិបាលវិញ។
តាមអនុក្រិត្យរបស់រាជរដ្ឋាភិបាលចុះថ្ងៃទី១៩ ខែធ្នូ ឆ្នាំ២០១៧ បានឱ្យដឹងថា លោក ង៉ាន់ ភិរុណ មានឋានន្ដរស័ក្តជាមន្ត្រីថ្នាក់លេខ១ នៃក្របខណ្ឌមន្ត្រីគ្រប់គ្រងរដ្ឋបាលទីស្តីការគណៈរដ្ឋមន្ត្រី ហើយក្នុងពេលមកបំពេញការងារថ្មីនេះ លោកត្រូវដាក់ពាក្យស្នើសុំនៅក្រៅក្របខណ្ឌដើម។
សូមបញ្ជាក់ថា ពិធីប្រកាសផ្ទេរភារកិច្ចអភិបាលរងខេត្ត សៀមរាប ធ្វើឡើងក្រមវត្តមាន លោក សក់ សេដ្ឋា រដ្ឋលេខាធិការក្រសួងមហាផ្ទៃ អភិបាលខេត្ត សៀមរាប លោក ឃឹម ប៊ុនសុង ព្រមទាំងមន្ត្រីរាជការជាច្រើនរូបទៀត៕
Tag:
ង៉ាន់ ភិរុណ
សៀមរាប
© រក្សាសិទ្ធិដោយ thmeythmey.com