ជាតិ
នារីដែលចោទសម្តេច ហ៊ុន សែន ថាសម្លាប់លោក កែម ឡី ត្រូវកាត់ទោសឲ្យជាប់ឃុំមួយឆ្នាំ នារីឈ្មោះ ហេង លក្ខិណា ត្រូវបាននាំខ្លួនទៅសាកសួរនៅក្រសួងមហាផ្ទៃ កាលពីអំឡុងខែកក្កដា ឆ្នាំ២0១៧
× ភ្នំពេញ៖ នារីម្នាក់ឈ្មោះ ហេង លក្ខិណា ដែលចោទសម្តេច ហ៊ុន សែន រួមទាំងក្រុមគ្រួសារ តាមបណ្តាញសង្គមហ្វេសប៊ុក ថាសុទ្ធតែជាឃាតក ត្រូវបានចៅក្រមជំនុំជម្រះនៃសាលាដំបូងរាជធានីភ្នំពេញ ប្រកាសសាលក្រម នៅថ្ងៃទី១១ ខែមករា ឆ្នាំ២0១៨នេះ ដោយកំណត់ឲ្យជាប់ពន្ធនាគាររយៈពេលមួយឆ្នាំ ក្រោមបទចោទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។ ក្រៅពីជាប់ពន្ធនាគារ នាង ក៏ត្រូវបានតុលាការ បង្គាប់ឲ្យបង់ប្រាក់១លានរៀលចូលទៅរដ្ឋ ផងដែរ។
សាលាដំបូងរាជធានភ្នំពេញ បានបើកសវនាការលើសំណុំរឿងរបស់នាង ហេង លក្ខិណា តាំងពីអំឡុងខែធ្នូ ឆ្នាំ២0១៧មកម្ល៉េះ ប៉ុន្តែទើបនឹងប្រកាសសាលក្រមនៅពេលនេះ។ សមត្ថកិច្ច បានឃាត់ខ្លួននាង បន្ទាប់ពីនាងបង្ហោះវីដេអូឃ្លីប ដោយចោទសម្តេច ហ៊ុន សែន និងក្រុមគ្រួសារថា សុទ្ធតែជាឃាតក។
នាងចោទក្រុមគ្រសារសម្តេច ហ៊ុន សែន បែបនេះ កាលពីថ្ងៃទី៩ ខែកក្កដា ឆ្នាំ២0១៧ ក្នុងអំឡុងពេលដែលនាង កំពុងស្ថិតក្នុងពិធីបុណ្យរម្លឹកខួបមួយឆ្នាំ នៃការបាញ់សម្លាប់លោកបណ្ឌិត កែម ឡី អ្នកវិភាគនយោបាយ ដែលរៀបចំឡើងនៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ។ នាង បាននិយាយក្នុងវីដេអូនោះ យ៉ាងដូច្នេះថា៖«លោក ហ៊ុន សែន ហ្នឹងហើយ គ្រួសារគាត់ហ្នឹងហើយ កូនចៅរបស់គាត់ អ្នកណាក៏ជាឃាតកដែរ។ គ្រួសារគាត់ហ្នឹង អ្នកណាក៏ប្រឡាក់ឈាមលោក បណ្ឌិត កែម ឡី ដែរ»។
មកដល់ពេលនេះ នាងបានជាប់ឃុំក្នុងពន្ធនាគារ ប្រមាណជាកន្លះឆ្នាំហើយ៕
Tag:
តុលាការ
កែម ឡី
ហេង លក្ខិណា
© រក្សាសិទ្ធិដោយ thmeythmey.com