អន្តរជាតិ
កាណាដាព្រមចាប់ដៃសមាជិកដប់ទៀត សង្គ្រោះជីវិតកិច្ចព្រមព្រៀងពាណិជ្ជកម្មTPP ដោយគ្មានអាមេរិក នាយករដ្ឋមន្ត្រីកាណាដា ចាស្ទីន ទ្រូដូ ថ្លែងសុន្ទរកថានៅវេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីសថ្ងៃ ២៣ ខែមករា
× ចុងក្រោយកាណាដា សម្រេចចិត្តដើរឆ្ពោះទៅមុខជាមួយសមាជិកដប់ផ្សេងទៀត ដើម្បីសង្គ្រោះជីវិតកិច្ចព្រមព្រៀងស្តង់ដារមាសភាពជាដៃគូអន្តរប៉ាស៊ីហ្វិក (TPP)។ ក្រុងអូតាវ៉ា បង្ហាញការប្តេជ្ញាចិត្ត បន្តដំណើររួមគ្នា ក្នុងកិច្ចព្រមព្រៀងពាណិជ្ជកម្មនេះ បន្ទាប់ពីក្រុងតូក្យូ និងកង់បេរ៉ា តាមបញ្ចុះបញ្ចូល ចាប់ពីកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក នៅវៀតណាម ចុងឆ្នាំមុនមកនោះ។
បន្ទាប់ពីដូណាល់ ត្រាំ ដកអាមេរិក ចេញពីកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិកកាលពីដើមឆ្នាំមុន សមាជិកសេសសល់ទាំង ១១ ឯកភាពគ្នាថា ពួកគេនឹងបន្តដើរទៅមុខដោយគ្មានអាមេរិក។ ប៉ុន្តែក្រោយមកកាណាដា បង្ហាញជំហរស្ទាក់ស្ទើរ ក្នុងការជិះទូករួមគ្នាជាមួយសមាជិកឯទៀត។
ក្នុងកិច្ចប្រជុំវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក នៅដាណាង ប្រទេសវៀត ណាម នាយករដ្ឋមន្ត្រីកាណាដាលោក ចាស្ទីន ទ្រូដូ (Justin Trudeau) បានបដិសេធចុះហត្ថលេខា លើកិច្ចព្រមព្រៀងជាគោលការណ៍មួយ ដោយលោកលើកហេតុផលបារម្ភពីវិស័យឧស្សាហកម្មរថយន្ត និងបញ្ហាវប្បធម៌ខ្លួនផង។ ប៉ុន្តែក្រោយមកជប៉ុន និងអូស្ត្រាលី បាននាំគ្នាបញ្ចុះបញ្ចូលកាណាដា ឲ្យបន្តដំណើររួមគ្នាផង។
ដល់ថ្ងៃអង្គារ ទី ២៣ ខែមករា រដ្ឋមន្ត្រីពាណិជ្ជកម្មអូស្ត្រាលី លោក Steve Ciobo បានបញ្ជាក់ថា កាណាដាសម្រេចចិត្តចូលរួមជាមួយប្រទេសដប់ផ្សេងទៀតហើយ ដើម្បីសង្គ្រោះជីវិតកិច្ចព្រមព្រៀងនេះឡើងវិញ។ លោកបានបង្ហើបថា សមាជិកទាំង ១១ នឹងនាំគ្នាចុះហត្ថលេខា លើកិច្ចព្រមព្រៀងនេះរួមគ្នា នៅខែមីនា នាកិច្ចប្រជុំនៅប្រទេសស៊ីលី។ នេះបើយោងតាមសារព័ត៌មាន The Guardian ។
ចំណែករដ្ឋមន្ត្រីពាណិជ្ជកម្មអន្តរជាតិកាណាដា Francois-Philippe Champagne ឯណោះវិញបានទទួលស្គាល់ថា កាណាដាប្តេជ្ញាចិត្តរួមគ្នាជាមួយសមាជិកផ្សេងទៀត នៃកិច្ចព្រមព្រៀងភាពជាដៃគូអន្តរប៉ាស៊ីហ្វិកនេះមែន ក្រោយចរចាត្រូវគ្នា លើបញ្ហាចម្រូងចម្រាសមួយចំនួន។
«យើងសប្បាយចិត្តនឹងបញ្ជាក់ថា យើងបានទទួលជោគជ័យ ក្នុងការពិភាក្សាពាក់ព័ន្ធបញ្ហាវប្បធម៌ និងវិស័យឧស្សាហកម្មរថយន្ត ជាមួយជប៉ុនហើយ។ ក្រៅពីនោះ វាមានការព្យួរការអនុវត្តមាត្រាមួយចំនួន ពាក់ព័ន្ធច្បាប់កម្មសិទ្ធិបញ្ញា ដែលជាក្តីបារម្ភរបស់កាណាដាដែរ។ កាណាដាកន្លងមកបានបញ្ជាក់ហើយថា ខ្លួនឯកភាពក្នុងកិច្ចព្រៀមព្រៀង ដរាបណាវាអាចធានាប្រយោជន៍កាណាដាបានប៉ុណ្ណោះ»។
ក្រៅពីរដ្ឋមន្ត្រីពាណិជ្ជកម្មកាណាដា ថ្ងៃអង្គារទី ២៣ ខែមករា នាយករដ្ឋមន្ត្រីកាណាដាលោក ចាស្ទីន ទ្រូដូ ក៏បានផ្តល់សុន្ទរកថា ពាក់ព័ន្ធកិច្ចព្រមព្រៀងភាពជាដៃគូអន្តរប៉ាស៊ីហ្វិកដែរក្នុងវេទិកាសេដ្ឋកិច្ចពិភពលោកឆ្នាំ ២០១៨ នៅទីក្រុងដាវ៉ូស ប្រទេសស្វីសនោះ។ ក្នុងពេលនោះដែរលោកបានហៅកិច្ចព្រមព្រៀមនេះថា ជាកិច្ចព្រមព្រៀងដ៏ត្រឹមត្រូវមួយដែរ។
តាមពិតទៅ ភាពជាដៃគូអន្តរប៉ាស៊ីហ្វិក ត្រូវបានឯកភាពគ្នាបង្កើតឡើងជាផ្លូវការ កាលពីខែតុលាឆ្នាំ ២០១៥ ដោយមានភាគី ១២ ចូលរួមក្នុងនោះ មានប្រទេសអាស៊ានចំនួនបួនផង។ប៉ុន្តែក្រោយលោក ដូណាល់ ត្រាំ ចូលកាន់តំណែង លោកបានដកអាមេរិកចេញពីកិច្ចព្រមព្រៀងនេះបន្សល់ទុកសមាជិកត្រឹមតែ ១១ប៉ុណ្ណោះ។ កិច្ចព្រមព្រៀងនេះដែរ មានគោលដៅដករបាំងពន្ធលើទំនិញ ៩៨ ភាគរយ នៃទំនិញពាណិជ្ជកម្មសរុប ហើយទីផ្សារសរុបនៃសមាជិកនោះមានទំហំជិតដល់១៤ ទ្រីលានដុល្លារឯណោះ។
ថ្វីបើអាមេរិកដកខ្លួនចេញក៏ដោយ នាយករដ្ឋមន្ត្រីអូស្ត្រាលី ម៉ាល់ខុម ធើនប៊ុល ធ្លាប់បញ្ជាក់ថា កិច្ចព្រមព្រៀងភាពជាដៃគូអន្តរប៉ាស៊ីហ្វិកនេះ នៅតែបើកទ្វារចំហ សម្រាប់អាមេរិកជានិច្ច ក្នុងករណីដែលមហាអំណាចនេះ ចង់ត្រឡប់មកវិញនោះ៕
Tag:
កាណាដា
TPP
អាមេរិក
អូស្ត្រាលី
© រក្សាសិទ្ធិដោយ thmeythmey.com