ក្រុមហ៊ុនអាមេរិក គ្រោងវិនិយោគលើថាមពលព្រះអាទិត្យនៅកម្ពុជា

ជាតិ

សេដ្ឋកិច្ច

ក្រុមហ៊ុនអាមេរិក គ្រោងវិនិយោគលើថាមពលព្រះអាទិត្យនៅកម្ពុជា

03, Feb 2018 , 11:24 am

រូបភាព

រូបពីហ្វេសប៊ុកក្រសួងបរិស្ថាន

ដោយ: ធឿន បញ្ញាឬទិ្ធ

ភ្នំពេញ៖ ក្រុមហ៊ុន OMNI NAVITAS របស់អាមេរិក គ្រោងដាក់ទុនវិនិយោគលើថាមពលពន្លឺព្រះអាទិត្យនៅកម្ពុជា ។ គម្រោងនេះ ត្រូវបានលោក Jim McAuliffe តំណាងក្រុមហ៊ុន OMNI NAVITAS លើកយកមកពិភាក្សាជាមួយរដ្ឋមន្ត្រីក្រសួងបរិស្ថានលោក សាយ សំអាល់ កាលពីថ្ងៃទី២ កុម្ភៈ។

ចំពោះគម្រោងនៃការវិនិយោគលើថាមពលកើតឡើងវិញនេះ លោក សាយ សំអាល់ ស្នើឲ្យក្រុមហ៊ុនអាមេរិក សិក្សាជាមួយក្រុមប្រឹក្សាអភិវឌ្ឍន៍ប្រកបដោយចីរភាពរបស់កម្ពុជា លើគម្រោងថាមពលពន្លឺព្រះអាទិត្យនេះ។

បើតាមការចុះផ្សាយរបស់កាសែតភ្នំពេញប៉ុស្តិ៍ ក្រុមហ៊ុនអាមេរិក Omni Navitas មានគម្រោងវិនិយោគដែលចំណាយទឹកប្រាក់ ៥០០ លានដុល្លារ ដើម្បីផលិតអគ្គិសនីពីបន្ទះសូឡាមានអនុភាពផលិតថាមពល១៥០ មេហ្កាវ៉ាត់។

គម្រោងនេះត្រូវការផ្ទៃដីប្រហែល ៥០០ហិកតា ដើម្បីដំឡើងបន្ទះសូឡា ហើយនៅពេលកសិដ្ឋាននេះប្រតិបត្តិការនឹងផលិតថាមពលបានប្រហែល២៧៥ គីឡូវ៉ាត់ម៉ោងប្រចាំឆ្នាំ។ ការសាងសង់ដំបូងនឹងបង្កើតការងារ ៣០០០នាក់សម្រាប់ប្រជាជនកម្ពុជា។

កាលពីឆ្នាំ២០១៦ ក្នុងនោះបរិមាណអគ្គិសនីដែលបានមកពីការផលិតក្នុងស្រុកបានកើនឡើងពី ៧៧,៩ ភាគរយ ។ នៅឆ្នាំ២០១៧ កើនឡើងដល់ ៨១,៤ ភាគរយ ។ ឯបរិមាណថាមពលអគ្គិសនីដែលនាំចូលពីប្រទេសជិតខាងបានថយចុះពី២២ ភាគរយ កាលពីឆ្នាំ ២០១៦ មកដល់ ១៨,៦ ភាគរយនៅឆ្នាំ ២០១៧៕