ជាតិ
រដ្ឋមន្ត្រីការបរទេសនៃរដ្ឋអាស៊ានផ្តោតការពិភាក្សាលើការវិនិយោគធនធានយុវជន
× រដ្ឋមន្ត្រីការបរទេសនៃបណ្តាប្រទេសក្នុងតំបន់អាស៊ាន បានជួបប្រជុំគ្នារយៈពេលបីថ្ងៃនៅប្រទេសសិង្ហបុរី ដើម្បីពិភាក្សាលើប្រធានបទផ្សេងៗ ក្នុងនោះរួមមាន ការតាមដានសេចក្តីសម្រេចនៃថ្នាក់ដឹកនាំអាស៊ានកាលពីកិច្ចប្រជុំកំពូលអាស៊ានលើកទី៣១ កិច្ចប្រជុំកំពូលពាក់ព័ន្ធ អាទិភាពរបស់សិង្ហបុរីដែលជាប្រធានអាស៊ាន និងទំនាក់ទំនងខាងក្រៅតំបន់របស់អាស៊ាន។ បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា កិច្ចប្រជុំចង្អៀតនេះ ក៏បានលើកឡើងពីតួនាទីយុវជនក្នុងការពង្រឹងសេដ្ឋកិច្ចនៅក្នុងតំបន់ផងដែរ។
នាកិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅថ្ងៃទី៤-៦ ខែកុម្ភ: នេះ នៅសិង្ហបុរី លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងឲ្យដឹងថា កម្ពុជាគាំទ្រកិច្ចខិតខំប្រឹងប្រែងរបស់អាស៊ាន ក្នុងការដោះស្រាយការប្រកួតប្រជែង ការអភិវឌ្ឍសេដ្ឋកិច្ចប្រកបដោយសមធម៌ សមាហរណកម្មតំបន់ និងការកាត់បន្ថយគម្លាតអភិវឌ្ឍន៍នៅក្នុងអាស៊ាន។
លោកបានបន្ថែមថា កិច្ចប្រជុំបានផ្តោតលើសារសំខាន់ក្នុងការវិនិយោគលើយុវជន នឹងនាំមកនូវលទ្ធផលដ៏ធំសម្បើម ដែលពួកគេអាចទាញយកឱកាសបានពីការបង្កើតបច្ចេកវិទ្យាថ្មី និងគំនិតបង្កើតថ្មី។ ក្រុមរដ្ឋមន្ត្រីការបរទេសអាស៊ាន លើកទឹកចិត្តចំពោះសហគ្រិនភាព និងសហគ្រាសធុនតូច មធ្យម នឹងផ្លាស់ប្តូរអាស៊ានទៅជាតំបន់មួយប្រកបដោយភាពឆ្លាតវៃ និងនវានុវត្តន៍។
ជាមួយគ្នានេះផងដែរ ប្រមុខការទូតបណ្តារដ្ឋអាស៊ានបានផ្លាស់ប្តូរទស្សនៈអំពីបញ្ហាតំបន់ និងអន្តរជាតិ ក្នុងនោះដូចជា បញ្ហាសមុទ្រចិនខាងត្បូង បញ្ហារដ្ឋរ៉ាខាញ និងទស្សនទានបឋមស្តីពី «និម្មាបនកម្មតំបន់ឥណ្ឌូ-ប៉ាស៊ីហ្វិក»។ ចំពោះបញ្ហា សមុទ្រចិនខាងត្បូង រដ្ឋមន្ត្រីក្រសួងការបរទសកម្ពុជា បានសម្ដែងនូវការ ពេញចិត្តចំពោះការវិវឌ្ឍជាវិជ្ជមានដែលសម្រេចបានដោយអាស៊ាន និងចិន កាលពីឆ្នាំកន្លងទៅ៕
Tag:
កិច្ចប្រជុំអាស៊ាន
សិង្ហបុរី
ប្រាក់ សុខុន
© រក្សាសិទ្ធិដោយ thmeythmey.com