ជាតិ
បច្ចេកវិទ្យា
×![]()
កម្មវិធីប្រកួតរ៉ូបូតថា្នក់ជាតិលើកទី១ នៅកម្ពុជា នឹងរៀបចំឡើង នៅដើមខែមីនាខាងមុខនេះ។ ការប្រកួតនេះ ជាសកម្មភាពមួយ ក្នុងចំណោមសកម្មភាពជាច្រើនទៀត ដែលនឹងបង្ហាញខ្លួន នៅក្នុង«មហោស្រពវិទ្យាសាស្ត្រ និងវិស្វករកម្ពុជា» លើកទី៤ ដែលនឹងប្រព្រឹត្តទៅពីថ្ងៃទី១ ដល់ទី៣ ខែមីនា នៅពហុកីឡដ្ឋានជាតិអូឡាំពិក។
«មហោស្រពវិទ្យាសាស្ត្រ និងវិស្វករកម្ពុជា» ត្រូវបានរៀបចំឡើងដោយក្រសួងអប់រំ យុវជន និងកីឡា សហការជាមួយអង្គការស្ទែមកម្ពុជា ក្នុងបំណងជំរុញឲ្យសិស្ស និស្សិត យុវជន អ្នកគ្រូលោកគ្រូ គ្រឹះស្ថានសិក្សា និង ស្ថាប័នពាក់ព័ន្ធ យកចិត្តទុកដាក់លើការសិក្សា ការអប់រំ ការងារអាជីព វិជ្ជាជីវៈ ការប្រកួតប្រជែង ការស្រាវជ្រាវ និងនវានុវត្តន៍ លើមុខជំនាញទាក់ទងនឹងវិទ្យាសាស្ត្រ និងបច្ចេកវិទ្យាវិស្វកម្ម និងគណិតវិទ្យា (ស្ទែម) ដែលជាមុខជំនាញដ៏មានសក្តានុពល ដើម្បីរួមចំណែកអភិវឌ្ឍវិស័យសេដ្ឋកិច្ច ឧស្សាហកម្ម កសិ-ឧស្សាហកម្ម សេវាកម្ម និងពាណិជ្ជកម្មកម្ពុជា។
តាមសេចក្តីជូនដំណឹងរបស់ក្រសួងអប់រំ ក្រៅតែពីការប្រកួតរ៉ូបូតថា្នក់ជាតិលើកទី១នៅកម្ពុជា នៅមានសកម្មភាពសំខាន់ៗជាច្រើននឹងត្រូវរៀបចំឡើងក្នុង«មហោស្រពវិទ្យាសាស្ត្រ និងវិស្វករកម្ពុជា»រយៈពេល៣ថ្ងៃនេះដែរ ដែលរួមមាន ពិព័រណ៍ស្ទែម ការបង្ហាញគម្រោងស្ទែមដែលផតល់ឱកាសឲ្យពិសោធន៍ផ្ទាល់ និងអនុវត្តជាក់ស្តែងដោយខ្លួនឯង ការបង្ហាញយុទ្ធនាការផ្សព្វផ្សាយ «ស្ទែមដើម្បីអនាគតខ្ញុំ ស្ទែមដើម្បីកម្ពុជា» សិក្ខាសាលា និងការប្រកួតជើងឯកស្ទែម ការប្រកួតប្រជែងគណិតវិទ្យា និងមានការប្រគំតន្ត្រីខ្នាតធំស្ទែមដើម្បីអនាគតខ្ញុំ៕
Tag:
ក្រសួងអប់រំ
រ៉ូបូត
ស្ទែម
© រក្សាសិទ្ធិដោយ thmeythmey.com
