ប្រតិភូកុមារកម្ពុជា២រូប ចូលរួមកិច្ចប្រជុំពិភាក្សាប្រចាំតំបន់ ស្តីពីការកេងប្រវ័ញ្ចតាមប្រព័ន្ធអ៊ីនធឺណិត

ជាតិ

ប្រតិភូកុមារកម្ពុជា២រូប ចូលរួមកិច្ចប្រជុំពិភាក្សាប្រចាំតំបន់ ស្តីពីការកេងប្រវ័ញ្ចតាមប្រព័ន្ធអ៊ីនធឺណិត

10, Feb 2018 , 11:32 am

រូបភាព

ដោយ: ថ្មីៗ

ក្មេងប្រុស និងក្មេងស្រីកម្ពុជា២រូបតំណាងឱ្យប្រទេស បានចូលរួមនៅក្នុងកិច្ចប្រជុំពិភាក្សាពិគ្រោះយោបល់កុមារក្នុងតំបន់អាស៊ាន ដើម្បីកំណត់ការឆ្លើយតបរួមគ្នារបស់ជាតិ ក្នុងការបញ្ឈប់ការកេងប្រវ័ញ្ច និងការរំលោភផ្លូវភេទលើកុមារ នៅតាមប្រព័ន្ធអ៊ីនធឺណិត តាមបណ្តារដ្ឋជាសមាជិកក្នុងតំបន់។ កិច្ចប្រជុំនេះ ធ្វើឡើង ពីថ្ងៃទី ៧ ដល់ទី៨ ខែកុម្ភៈកន្លងទៅ នៅទីក្រុងហ្សាកាតា ប្រទេសឥណ្ឌូនេស៊ី រៀបចំឡើងដោយអង្គការសម្ព័ន្ធសិទ្ធិកុមារអាស៊ី (Child Rights Coalition Asia) ដែលមានការគាំទ្រពីអង្គការយូនីសេហ្វ (UNICEF)។

ប្រតិភូកុមារកម្ពុជា អមជាមួយមិត្តភក្ដិរបស់ពួកគេមកពីប្រទេសពីរក្នុងចំណោមបណ្តាប្រទេសអាស៊ានដទៃទៀត កំពុងរៀបចំកិច្ចពិភាក្សាប្រកបដោយផ្លែផ្កាមួយ ជាមួយតំណាងប្រហែល ១០០នាក់ មកពីស្ថាប័នរាជ រដ្ឋាភិបាល ភ្នាក់ងារ អង្គការសហប្រជាជាតិ និងអង្គការមិនមែនរដ្ឋាភិបាលដែលពាក់ព័ន្ធ ក្រុមហ៊ុនឯកជន និងស្ថាប័ន្ធអនុវត្តច្បាប់បរទេស។

កុមារទាំង២ គឺក្មេងប្រុស បុប្ផា អាយុ១៧ឆ្នាំ មកពីខេត្តស្វាយរៀង និងក្មេងស្រីឈ្មោះ វៃ អាយុ១៧ ឆ្នាំ មកពីខេត្តព្រៃវែង។ តាមសេចក្តីប្រកាសព័ត៌មានរបស់អង្គការភ្លែនអន្តរជាតិ (Plan International)ប្រចាំប្រទេសកម្ពុជា កុមារទាំង២ គឺជាអ្នកដឹកនាំបណ្ដាញតស៊ូមតិកុមារ និងមានបទពិសោធន៍ច្រើនទាក់ទងនឹងកិច្ចការពារកុមារ និងបញ្ហាសិទ្ធិកុមារ។

សេចក្តីប្រកាសព័ត៌មានដដែល បញ្ជាក់ថា វាគឺជាភាពវិជ្ជមានដែឡលបរិបទជាក់លាក់ នៃករណីក្នុងប្រទេសកម្ពុជា នឹងត្រូវបានគេដឹងឮ និងយកមកពិចារណា តាមរយៈវត្តមានរបស់គណៈប្រតិភូកុមារកម្ពុជា២រូប ។

តាមលោក ហោ កុសល មន្ត្រីកិច្ចការពារកុមារ នៃអង្គការភ្លែនអន្តរជាតិ ដែលអមដំណើរកុមារកម្ពុជាទៅចូលរួមកិច្ចពិភាក្សា កុមារដែលមកពីតំបន់អាស៊ីអាគ្នេយ៍ នឹងត្រូវបានស្នើសុំឱ្យផ្តល់អនុសាសន៍ និងសំណូមពរនានា នៅក្នុងការបង្កើនកិច្ចខិតខំប្រឹងប្រែង ដើម្បីដោះស្រាយបញ្ហាកិច្ចការពារកុមារ នៅលើប្រព័ន្ធអ៊ីនធឺណិតជាពិសេស ដោយសារកុមារ គឺជាអ្នកដែលទទួលរងផលប៉ះពាល់ដោយផ្ទាល់ និងប្រឈមនឹងហានិភ័យទាក់ទងនឹងអំពើហិង្សានៅតាមប្រព័ន្ធអ៊ីនធឺណិត។

ការសិក្សាដែលត្រូវបានលើកឡើង ក្នុងសេចក្តីប្រកាសព័ត៌មានរបស់ អង្គការភ្លែនអន្តរជាតិ បានបង្ហាញថា កុមារ និងមនុស្សវ័យក្មេង បានបង្កើន និងចូលរួមញឹកញាប់ នៅក្នុងសកម្មភាពជាច្រើននៅតាមប្រព័ន្ធអ៊ីនធឺណិត ខណៈការរីកចម្រើនខាងផ្នែកបច្ចេកវិទ្យាជាសកលកំពុងតែរីករាលដាលនោះ។ ការរីកចម្រើននៃបច្ចេកវិទ្យា មិនត្រឹមតែផ្តល់ផលប្រយោជន៍ដល់កុមារក្នុងការទទួលបានព័ត៌មាន ការប្រាស្រ័យទាក់ទង ការកម្សាន្ត និងព័ត៌មានទាក់ទងនឹងវប្បធម៌ដែលអាចជួយការអភិវឌ្ឍរបស់ពួកគេ តែស្របពេលជាមួយគ្នានោះ វាក៏បង្កហានិភ័យជាច្រើន ដោយសារតែទំនាក់ទំនងទាំងនេះ បើកឱកាសថ្មីៗសម្រាប់ការបន្តអំពើហិង្សាប្រឆាំងនឹងកុមារ។

នៅប៉ុន្មានឆ្នាំចុងក្រោយនេះ តំបន់អាស៊ីអាគ្នេយ៍ បានក្លាយទៅជាចំណុចក្តៅគគុកមួយ ដែលកំពុងតែកើតមានឡើងករណីរំលោភបំពាន និងការកេងប្រវ័ញ្ចលើកុមារនៅតាមប្រព័ន្ធអ៊ីនធឺណិត។ ការបញ្ជាក់ចំពោះនិន្នាការនេះ សមាគមប្រជាជាតិអាស៊ីអាគ្នេយ៍ (អាស៊ាន) បានកំណត់កិច្ចប្រឹងប្រែងក្នុងការដោះស្រាយបញ្ហានេះជាអាទិភាពមួយសម្រាប់តំបន់ដូចដែលបានបង្ហាញនៅក្នុងផែនការសកម្មភាពតំបន់អាស៊ាន ស្តីពីការលុបបំបាត់អំពើហិង្សាលើកុមារ និងការប្តេជ្ញាចិត្តរបស់រដ្ឋជាសមាជិកអាស៊ានចំពោះរបៀបវារៈសម្រាប់ការអភិវឌ្ឍប្រកបដោយនិរន្តរភាពនៅឆ្នាំ២០៣០៕