ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
រដូវជំងឺផ្តាសាយអាចធ្វើឲ្យមនុស្សស្ទើរតែគ្រប់គ្នាមានអាការៈក្អកដែលអាចធ្វើឲ្យឈឺចាប់ដល់ក្នុងសាច់ដុំនៅទ្រូងថែមទៀត។ ប៉ុន្តែជំងឺផ្តាសាយមិនបង្កបញ្ហាតែក្អកមួយមុខឡើយ។ សម្រាប់ជំងឺអាឡែហ្ស៊ី ជំងឺហឺត ការច្រាលទឹកអាស៊ីតពីក្រពះ ខ្យល់អាកាសស្ងួតពេក និងការជក់បារីគឺជាមូលហេតុដែលកើតមានជាញឹកញាប់នៃការក្អកដែរ។ ទោះបីជាថ្នាំមួយចំនួនដូចជា ថ្នាំបញ្ចុះសម្ពាថឈាម និងអាឡែហ្ស៊ីក៏អាចបង្កជាការក្អករ៉ាំរ៉ៃបានដែរ។ ភាគច្រើន យើងអាចគ្រប់គ្រងការក្អកបានតាមរយៈការប្រើថ្នាំដោយមិនបាច់មានវេជ្ជបញ្ជានៅផ្ទះ លុបបំបាត់សារធាតុបង្កអាឡែហ្ស៊ី ឬងូតទឹកក្តៅជាដើម។ 
ខាងក្រោមនេះគឺជាវិធីមួយចំនួនដែលអ្នកអាចគ្រប់គ្រងការក្អកនៅផ្ទះដោយខ្លួនឯងបាន៖
ញ៉ាំទឹកឲ្យបានច្រើន
ការបង្ករោគនៅផ្លូវដង្ហើមខាងលើដូចជា ជំងឺផ្តាសាយ ឬផ្តាសាយធំអាចធ្វើឲ្យមានការហូរទឹកសម្បោរនៅបំពង់ករបាន។ រឿងនេះនឹងធ្វើឲ្យមានការរលាកដល់បំពង់ករ និងបង្កជាការក្អកដែរ។ ដូច្នេះការញ៉ាំទឹកច្រើននឹងជួយពង្រាវស្លេស្មដែលហូរនោះបាន។ មិនត្រឹមតែប៉ុណ្ណោះ វានឹងជួយផ្តល់សំណើមដល់ស្បែកដែលមានភាពរំអិលថែមទៀត។ រឿងនេះមានប្រយោជន៍ខ្លាំងសម្រាប់រដូវរងា ជាពិសេសពេលក្នុងផ្ទះមានភាពស្ងួតតែម្តង។
សាកល្បងប្រើថ្នាំបំបាត់ក្អក និងភេសជ្ជៈក្តៅៗ
ចូរសាកល្បងប្រើទឹកបន្តក់ក្អកជាតិម៉ង់តុល ព្រោះវាជួយធ្វើឲ្យស្ពឹកដល់បំពង់ករ និងបន្ថយការក្អកបាន។ ការញ៉ាំទឹកតែក្តៅឧណ្ហៗលាយជាមួយទឹកឃ្មុំក៏អាចសម្រួលដល់ការឈឺបំពង់ករបានដែរ។
ងូតទឹកក្តៅ និងប្រើឧបករណ៍ផ្តល់សំណើម
ការងូតទឹកក្តៅអាចជួយបំបាត់ការក្អកតាមរយៈការពង្រាវការបញ្ចេញសម្បោរនៅក្នុងច្រមុះបាន។ ការឆ្ពង់អាចជួយបំបាត់ការក្អកទាំងដោយសារជំងឺផ្តាសាយផង និងអាឡែហ្ស៊ីផង។ ឧបករណ៍ផ្តល់សំណើមក៏ប្រហែលជាមានប្រយោជន៍ដែរ ព្រោះកាលណាក្នុងផ្ទះមានភាពស្ងួតពេក ការបញ្ចេញទឹករំអិលពីក្នុងច្រមុះអាចនឹងត្រូវស្ងួត និងបង្កភាពមិនមានផាសុកភាពដល់រាងកាយឡើយ។ ការប្រើឧបករណ៍ផ្តល់សំណើមក្នុងផ្ទះនឹងជួយបំបាត់ការក្អក តែកុំប្រើច្រើនពេកអី។
លុបបំបាត់សារធាតុបង្ករលាកពីក្នុងបរិយាកាស
ទឹកអប់ និងស្ព្រាយបាញ់បន្ទប់ទឹកប្រហែលជាហាក់បីដូចជារបស់ផ្តើមការក្អកនេះហើយប៉ុន្តែ អ្នកខ្លះវិញអាចនឹងមានការរលាកក្នុងប្រហោងឆ្អឹងនៅមុខរ៉ាំរ៉ៃ បង្កជាការហូរទឹករំអិលចេញក្រៅបន្ថែម និងទៅជាក្អករ៉ាំរ៉ៃថែមទៀត។ ដូច្នេះ យកល្អគួរតែគ្រប់គ្រងផលិតផលទាំងអស់នេះឲ្យបានល្អផងទៅ។
សារធាតុបង្កការរលាកខ្លាំងបំផុតក្នុងបរិយាកាសគឺផ្សែងតែម្តង។ មនុស្សគ្រប់គ្នាដែលនៅជុំវិញអ្នកជក់បារីប្រហែលជាមានការរលាកក្នុងផ្លូវដង្ហើមមួយចំនួនហើយ។ ដូច្នេះសម្រាប់មធ្យោបាយគឺឈប់ជក់បារី។
លេបថ្នាំព្យាបាលការក្អក
នៅពេលដែលការងូតទឹកក្តៅ ញ៉ាំតែក្តៅ និងដំណក់ទឹកបំបាត់ក្អកមិនមានប្រសិទ្ធភាព អ្នកអាចជ្រើសរើសថ្នាំបំបាត់ការក្អកដោយមិនបាច់មានវេជ្ជបញ្ជាបាន។
ថ្នាំបំបាត់ការតឹងច្រមុះអាចបន្ធូរដល់ការតឹងច្រមុះបានតាមរយៈធ្វើឲ្យជាលិកាច្រមុះដែលកំពុងតែហើមស្វិតទៅវិញ និងបន្ថយការផលិតសំបោរ។ វាអាចធ្វើឲ្យសំបោរក្នុងសួតស្ងួត និងបើកផ្លូវដង្ហើមកាន់តែស្រួល។ ថ្នាំនេះមានជាគ្រាប់ ទឹក និងស្ព្រាយបាញ់ច្រមុះ ដែលមានឈ្មោះផ្សេងៗពីគ្នា។ យ៉ាងណាមិញ ចូរពិនិត្យមើលឈ្មោះ Phenylephrine ឬ Pseudoephedrine ដែលជាសារធាតុផ្សំសកម្មក្នុងថ្នាំបំបាត់ការតឹងច្រមុះដែលលេបតាមមាត់ និងប្រុងប្រយ័ត្នផងដែរ។ ថ្នាំទាំងនេះអាចធ្វើឲ្យលើសសម្ពាធឈាម ដូច្នេះអ្នកជំងឺលើសសម្ពាធឈាម ជំងឺបេះដូង ឬបញ្ហាជំងឺផ្សេងៗទៀតត្រូវតែប្រើប្រាស់ដោយប្រុងប្រយ័ត្ន។ ជាមួយគ្នានេះដែរ ការដែលប្រើប្រាស់ថ្នាំបំបាត់ការតឹងច្រមុះច្រើនពេកអាចនាំឲ្យមានភាពស្ងួតខ្លាំង និងបង្កជាការក្អកស្ងួតថែមទៀតផង។ សម្រាប់ស្ព្រាយបាញ់ច្រមុះវិញ បើសិនជាប្រើប្រាស់ច្រើនជាង ៣ ទៅ៤ដងក្នុងមួយថ្ងៃ វាអាចធ្វើឲ្យមានការតឹងច្រមុះវិញបាន។ យកល្អគួរតែប្រើរយៈពេល ២ ទៅ៣ដងក្នុងមួយថ្ងៃហើយឈប់ប្រើតែម្តងទៅ។
ថ្នាំបំបាត់ការក្អកគួរតែអាចប្រើបាន បើសិនជាការក្អករបស់អ្នកមានលក្ខណៈខ្លាំងក្លារហូតដល់ឈឺទ្រូង និងមិនអាចគេងនៅពេលយប់បាន។ នៅពេលមនុស្សម្នាក់មានការក្អកខ្លាំងដែលមានស្លេស្មខាប់នោះ ការប្រើថ្នាំបំបាត់ស្លេស្មគឺជារឿងល្អមួយ៕
ផ្ដល់សិទ្ធដោយ៖www.health.com.kh
© រក្សាសិទ្ធិដោយ thmeythmey.com
