ជាតិ
ពងអណ្តើកហ្លួងដែលជិតផុតពូជ ត្រូវបានរកឃើញនៅខេត្តកោះកុង
× ក្រុមអភិរក្សសត្វព្រៃ បានរកឃើញពងអណ្តើកហ្លួងចំនួន១៦គ្រាប់ នៅប្រព័ន្ធព្រែកស្រែអំបិល ខេត្តកោះកុង។ នេះបើតាមសេចក្តីប្រកាសព័ត៌មានអង្គការអភិរក្សសត្វព្រៃកម្ពុជា (WCS)។
លោក សោម ស៊ីថា ទីប្រឹក្សាបច្ចេកទេសគម្រោងអភិរក្សប្រចាំខេត្តកោះកុងនៃអង្គការWCS បាននិយាយថា ការកាប់បំផ្លាញព្រៃលិចទឹក និងការនេសាទខុសច្បាប់ កំពុងតែបង្កហានិភ័យខ្ពស់ដល់ការរស់នៅរបស់សត្វអណ្តើកហ្លួង។
លោក ស៊ីថា បានបន្ថែមថា៖ «ទោះបីទទួលបានជោគជ័យក្រោយពេលរកឃើញពួកវាម្តងទៀតនៅក្នុងប៉ុន្មានឆ្នាំចុងក្រោយនេះ អណ្តើកហ្លួងក៏នៅតែប្រឈមនឹងការផុតពូជ សំបុកពងកូនរបស់វារកឃើញជារៀងរាល់ឆ្នាំ មានចំនួនតិចតួចណាស់ ដោយសំបុកពងអណ្តើកហ្លួងតែ០៣ប៉ុណ្ណោះ»។
លោក ស៊ីថា អំពាវនាវឲ្យប្រជាជន ចូលរួមអភិរក្សអណ្តើកហ្លួងនេះ ដែលជាសត្វល្មូនតំណាងឲ្យប្រទេសកម្ពុជា តាមរយៈការបញ្ឈប់ការទិញ ឬបរិភោគសាច់ និងពងសត្វអណ្តើកហ្លួងជាដើម។
ពងអណ្ដើកហ្លួងចំនួន១៦គ្រាប់នេះ ត្រូវបានរកឃើញជាលើកទីមួយហើយ នៅក្នុងឆ្នាំ២០១៨។ លោក អ៊ិន ហ៊ុល មន្ត្រីរដ្ឋបាលជលផល បាននិយាយថា៖«ចាប់ពីពេលនេះ រហូតដល់ខែមីនា គឺជារដូវការពងកូនរបស់សត្វអណ្តើកហ្លួង»។
អណ្ដើកហ្លួង ត្រូវបានស្ថិតនៅក្នុងបញ្ជីក្រហមរបស់អង្គការ IUCN ដែលជាប្រភេទសត្វងាយរងគ្រោះជិតផុតពូជបំផុត ក្នុងចំណោមអណ្តើកទាំង២៥ប្រភេទ ដែលកំពុងរងគ្រោះថ្នាក់ខ្លាំងជាងគេបំផុតនៅលើពិភពលោក៕
Tag:
អណ្តើកហ្លួង
កោះកុង
WCS
សោម ស៊ីថា
អ៊ិន ហ៊ុល
© រក្សាសិទ្ធិដោយ thmeythmey.com