រដ្ឋមន្ត្រី៖ ស្រោមអនាម័យពីចិន មានទំហំតូចណាស់សម្រាប់បុរសស៊ីមបាវ៉េ

សុខភាព

អន្តរជាតិ

រដ្ឋមន្ត្រី៖ ស្រោមអនាម័យពីចិន មានទំហំតូចណាស់សម្រាប់បុរសស៊ីមបាវ៉េ

28, Feb 2018 , 10:47 am

រូបភាព

ដោយ: ធីតា

រដ្ឋមន្ត្រីក្រសួងសុខាភិបាលស៊ីមបាវ៉េ បានលើកទឹកចិត្តក្រុមហ៊ុនក្នុងស្រុកបង្កើតរោងចក្រផលិតស្រោមអនាម័យដោយខ្លួនឯង។ បើយោងតាមការផ្សាយរបស់ New Zimbabwe លោក David Parirenyatwa បានកត់សម្គាល់ថា ស្រោមអនាម័យដែលនាំចូលពីចិន មានទំហំតូចខ្លាំងណាស់សម្រាប់បុរសៗ ស៊ីមបាវ៉េ។

ថ្លែងនាឱកាសបើកដំណើរការកម្មវិធីសម្របសម្រួលវិស័យឯកជនស្តីពីមេរោគ និងជំងឺអេដស៍ នៅក្នុងទីក្រុង Harare លោក David Parirenyatwa រដ្ឋមន្ត្រីក្រសួងសុខាភិបាលស៊ីមបាវ៉េ បានបញ្ជាក់ថា ការប្រើប្រាស់ស្រោមអនាម័យ គឺជាមធ្យោបាយពន្យាកំណើត និងទប់ស្កាត់ការឆ្លងមេរោគអេដស៍ដ៏ពេញនិយមនៅប្រទេសអាហ្វ្រិកមួយនេះ។

លោកបានគូសបញ្ជាក់ថា ស្រោមអនាម័យភាគច្រើនបំផុតនៅស៊ីមបាវ៉េ ត្រូវបាននាំចូលពីប្រទេសចិន ប៉ុន្តែបុរសដែលប្រើប្រាស់ សុទ្ធតែបានត្អូញត្អែពីទំហំដ៏តូចរបស់វា។ «អ្នកដឹងហើយពីតំបន់នេះ គឺតំបន់អាហ្វ្រិកភាគខាងត្បូង ដែលមានការប្រឈមខ្ពស់នឹងការឆ្លងមេរោគអេដស៍។ យើងបានលើកទឹកចិត្តពលរដ្ឋទាំងប្រុស ទាំងស្រី ប្រើប្រាស់ស្រោមអនាម័យ»។

លោកបានបន្ថែមថា យុវជន ចង់ប្រើប្រាស់ស្រោមអនាម័យដែលមានលក្ខណៈពិសេសសម្រាប់ខ្លួន ប៉ុន្តែដោយសារស៊ីមបាវ៉េ គ្មានរោងចក្រផ្ទាល់ខ្លួន ពួកគេត្រូវប្រើប្រាស់ស្រោមដែលនាំចូលពីចិន និងមានទំហំតូច។ «យើងត្រូវតែដោះស្រាយបញ្ហានេះ យើងចង់មានរោងចក្រផលិតស្រោមអនាម័យដោយខ្លួនឯង។ លោករដ្ឋមន្ត្រីក្រើនរំលឹកដល់អ្នកវិនិយោគស៊ីមបាវ៉េ។

តាមការផ្សាយរបស់ New Zimbabwe ស្រោមអនាម័យបុរសជាង១០៩.៤លានប្រអប់ត្រូវចែកចាយទូទាំងប្រទេសកាលពីឆ្នាំ២០១៦ ដោយស៊ីមបាវ៉េ ស្ថិតក្នុងចំណោមប្រទេសចំនួន៥ ដែលបុរសម្នាក់ប្រើប្រាស់ស្រោមអនាម័យយ៉ាងហោចណាស់៣០ប្រអប់ក្នុង១ឆ្នាំ៕