អន្តរជាតិ
ថៃ៖ បក្សនយោបាយជិត ៤០ ចុះឈ្មោះត្រៀមប្រកួតក្នុងការបោះឆ្នោតឆ្នាំ ២០១៩ រូបភាព៖ AFP
× គណបក្សនយោបាយថ្មីជិត ៤០ ត្រូវបានគេដាក់ពាក្យស្នើសុំបង្កើតឡើងដោយមានភ្ជាប់ជាមួយឈ្មោះនិងស្លាកសញ្ញាគណបក្សផងដែរនៅថ្ងៃសុក្រទី ២ ខែមីនានេះ។ ការបើកឲ្យចុះបញ្ជីនេះចាប់ផ្តើមឡើងក្រោយរបបសឹកប្រកាសថា ការបោះឆ្នោតនឹងត្រូវរៀបចំឡើងយ៉ាងយូរត្រឹមខែកុម្ភៈឆ្នាំ ២០១៩ខាងមុខ។
បន្ទាប់ពីលោក ប្រាយុទ្ធ ចន្ទអូចា សន្យាជាថ្មីនៅសប្តាហ៍នេះថា ការបោះឆ្នោតជ្រើសរើសសមាជិកសភា និងត្រួសត្រាយឲ្យមានការផ្ទេរអំណាចនឹងត្រូវរៀបចំឡើងមិនយូរជាងខែកុម្ភៈឆ្នាំ ២០១៩ គេឃើញមានការបើកទ្វារឲ្យមានការចុះឈ្មោះគណបក្សនយោបាយថ្មីផងដែរនៅថ្ងៃសុក្រទី ២ ខែមីនា។
បើតាមការចុះផ្សាយរបស់ទីភ្នាក់ងារព័ត៌មាន AFP ថ្ងៃបើកចុះបញ្ជីគណបក្សដំបូងនាថ្ងៃសុក្រទី ២ ខែមីនា គណបក្សនយោបាយថ្មីដែលត្រូវបានគេស្នើបង្កើតនោះមានចំនួនជិត ៤០ ឯណោះ ហើយអ្នកដែលស្នើសុំទាំងនោះក៏បានដាក់ស្នើស្លាក់សញ្ញា និងឈ្មោះគណបក្សរួចហើយដែរ។
មន្ត្រីរៀបចំការបោះឆ្នោតម្នាក់ដែលមិនបានបង្ហាញអត្តសញ្ញាណបានថ្លែងដូច្នេះថា ៖« វាមានក្រុមនយោបាយ ៣៨ ដែលបានដាក់ពាក្យស្នើសុំចុះបញ្ជាបក្សនយោបាយថ្មី»។
មន្ត្រីរូបនោះបានបន្ថែមថា អ្នកមកស្នើសុំបើកបក្សនយោបាយថ្មីនោះមានចម្រុះ ខ្លះធ្វើការក្នុងវិស័យសង្គមស៊ីវិលឬអ្នកស្រាវជ្រាវ ខ្លះជាអ្នកជំនួញ និងខ្លះទៀតជាកសិករផងដែរ។
បើតាមទីភ្នាក់ងារព័ត៌មាន AFP ដដែល ការចុះបញ្ជីគណបក្សថ្មីនេះនឹងបញ្ចប់ទៅវិញនៅចុងខែមីនាខាងមុខ ហើយអាជ្ញាធររៀបចំការបោះឆ្នោតមានពេលវេលា ៣០ ថ្ងៃដើម្បីពិនិត្យដើម្បីសម្រេចយល់ព្រមឬបដិសេធគណបក្សនយោបាយថ្មីទាំងនេះដែរ។ មកដល់បច្ចុប្បន្ននេះរបបសឹកថៃមិនទាន់ចាប់ផ្តើមដកបម្រាមលើសកម្មភាពនយោបាយដែលហាមឃាត់ការរៀបចំសកម្មភាពជួបជុំ ឬឃោសនានយោបាយនៅឡើយទេ។
នយោបាយផ្ទៃក្នុងថៃរួបរឹតដោយវិបត្តិអស់រយៈពេលជាងមួយទសវត្សរ៍មកហើយ ដោយការបែកខ្ញែកគ្នានៃជំរំនយោបាយពីរ៖ គណបក្សប្រជាធិបតេយ្យ និងគណបក្សភឿថៃ ដែលស្ថិតក្រោមការដឹកនាំរបស់អតីតនាយករដ្ឋមន្ត្រីថៃថាក់ស៊ីន ស៊ីណាវ៉ាត់។ អ្វីដែលគួរឲ្យកត់សម្គាល់ គណបក្សភឿថៃរបស់លោក ថាក់ស៊ីនបានបន្តឈ្នះឆ្នោតចាប់ពីឆ្នាំ ២០០១មកនោះ ទោះបីជាមានបញ្ហាបាតុកម្ម និងរដ្ឋប្រហារកើតឡើងជាបន្តបន្ទាប់ក៏ដោយ។
អ្នកវិភាគខ្លះយល់ឃើញថា របបសឹកថៃបច្ចុប្បន្នកំពុងព្យាយាមធ្វើយ៉ាងណាបំបាត់ឥទ្ធិពលរបស់គណបក្សភឿថៃ នៅក្នុងការបោះឆ្នោតខាងមុខនេះ ដោយកន្លងមករបបនេះបានសរសេររដ្ឋធម្មនុញ្ញថ្មីដែលមានគោលដៅបន្ទុចបង្អាក់គណបក្សធំៗ និងបន្ថយអំណាចរបស់អ្នកនយោបាយជាប់ឆ្នោតផងដែរ។ ដូចឃើញស្រាប់រដ្ឋធម្មនុញ្ញថ្មីចែងថា សភាអាចមានអំណាចក្នុងការតែងតាំងនាយករដ្ឋមន្ត្រីដែលមិនឆ្លងកាត់ការបោះឆ្នោតឲ្យកាន់កាប់ប្រទេសផងដែរក្នុងពេលចាំបាច់៕
Tag:
ថៃ
គណបក្សនយោបាយ
របបសឹក
© រក្សាសិទ្ធិដោយ thmeythmey.com