អន្តរជាតិ
នយោបាយអន្តរជាតិ
ប្រធានាធិបតី ពូទីន ៖ បើអាចផ្លាស់ប្ដូរអតីតកាលបាន ខ្ញុំមិនឲ្យសូវៀតដួលរលំឡើយ រូបភាព AFP
× ប្រធានាធិបតីរុស្ស៊ី វ្ល៉ាឌីមៀ ពូទីន បានសារភាពជាសាធារណៈថា លោកមិនចង់ឲ្យអតីតសហភាពសូវៀតដួលរលំឡើយ ហើយបើអាចផ្លាស់ប្ដូរអតីតកាលបាន លោកនឹងការពារសហភាពសូវៀតពីការបែកខ្ញែកទៅជាប្រទេសឯករាជ្យជាច្រើន។ លោក ពូទីន ថ្លែងបែបនេះ ក្នុងវេទិកាជាមួយប្រព័ន្ធផ្សព្វផ្សាយឯទីក្រុង Kaliningrad នៅថ្ងៃទី២ ខែមីនា។ ប៉ុន្តែលោកប្រធានាធិបតីរុស្ស៊ីក៏អះអាងថា លោកចង់រស់នៅសម័យបច្ចុប្បន្នជាង។
នៅក្នុងវេទិកាសារព័ត៌មានស្ដីពីយុត្តិធម៌ និងការពិត ប្រធានាធិបតីរុស្ស៊ី វ្ល៉ាឌីមៀ ពូទីន ត្រវបានអ្នកចូលរួមសួរសំណួរយ៉ាងច្រើនទាក់ទងបញ្ហាប្រទេសជាតិ និងបញ្ហាផ្ទាល់ខ្លួនរបស់លោក។ អ្វីគួរឲ្យចាប់អារម្មណ៍នោះ គឺអ្នកចូលរួមបានសួរលោក ពូទីន ពីការរស់នៅក្នុងពេលវេលាផ្សេង និងការផ្លាស់ប្ដូររឿងរ៉ាវដែលកើតឡើងពីអតីតកាល។ និយាយរឿងត្រឡប់ទៅអតីតកាលនេះ លោក ពូទីន ក៏រំឭកដល់ការដួលរលំអតីតសហភាពសូវៀតតែម្ដង។
បើតាមសារព័ត៌មាន RT មេដឹកនាំរុស្ស៊ីរូបនេះបញ្ជាក់ថា បើសិនជាឱកាសអាចផ្លាស់ប្ដូរព្រឹត្តិការណ៍ប្រវត្តិសាស្ត្រណាមួយនោះ លោកនឹងទប់ស្កាត់ការបែកបាក់របស់សហភាពសូវៀតនៅចុងឆ្នាំ១៩៩១ ។ លោក ពូទីន ដែលដឹកនាំរុស្ស៊ីជារដ្ឋមួយក្នុងចំណោមរដ្ឋជាច្រើននៅសល់ពីការបែកចេញនៃអតីតសហភាពសូវៀត ចាត់ទុកការបែកខ្ញែកនេះ ជាសោកនាដកម្មភូមិសាស្ត្រនយោបាយដ៏ធំបំផុតប្រចាំសតវត្សរ៍ទី២០ ។
ទោះជាចង់ការពារសហភាពសូវៀតមែន តែមិនមែនមានន័យថា លោក ពូទីន ចង់រស់នៅសម័យកាលនោះឡើយ។ នៅពេលសួរថា សម័យកាលណាមួយដែលចង់រស់នៅ ប្រធានាធិបតីរុស្ស៊ីបានជ្រើសរើសសម័យកាលបច្ចុប្បន្ននេះ។ លោកបានឆ្លើយដោយឥតលាក់លៀមថា៖ «អ្នកឃើញទេ ដូនតារបស់ខ្ញុំសុទ្ធតែជាកញ្ជះគេ តែខ្ញុំជាប្រមុខរដ្ឋរុស្ស៊ីសព្វថ្ងៃ»។
ទន្ទឹមនឹងការចង់ផ្លាស់ប្ដូរអតីតកាល និងប្រាថ្នារស់នៅក្នុងបច្ចុប្បន្នកាលក្នុងឋានៈជាប្រធានាធិបតីរុស្ស៊ី លោក ពូទីន បានបដិសេធឆ្លើយសំណួរទាក់ទងអនាគតកាល។ អតីតមន្ត្រីចារកម្មសម័យសហភាពសូវៀតរូបនេះមិនបានផ្ដល់ចម្លើយទេ ទាក់ទងសំណួរជុំវិញហេតុការណ៍អាចកើតឡើងចំពោះរូបលោកនៅរយៈពេល៥ទៅ១០ឆ្នាំខាងមុខ។
ការណ៍ដែលលោក ពូទីន មិនចង់និយាយរឿងអនាគត ទំនងជាលោកមិនចង់បង្កើតការសង្ស័យណាមួយចំពោះការបោះឆ្នោតជ្រើសរើសប្រធានាធិបតី ដែលគ្រោងធ្វើនៅពីរសប្ដាហ៍ទៀត។ លោក ពូទីន រំពឹងថា នឹងឈ្នះការបោះឆ្នោតនេះ និងបន្តកាន់តំណែងប្រធានាធិបតីទៀត ខណៈដែលបេក្ខជនប្រឆាំងសំខាន់ៗត្រូវបានរារាំងជាស្រេចនោះ៕
Tag:
រុស្ស៊ី
វ្ល៉ាឌីមៀ ពូទីន
សហភាពសូវៀត
© រក្សាសិទ្ធិដោយ thmeythmey.com