ត្រាំ ថាអាមេរិកអាចឈប់កំណត់អាណត្តិប្រធានាធិបតីដូចចិន តែចិនតបថា មិនចាំបាច់រៀនតាមខ្លួនទេ

អន្តរជាតិ

ត្រាំ ថាអាមេរិកអាចឈប់កំណត់អាណត្តិប្រធានាធិបតីដូចចិន តែចិនតបថា មិនចាំបាច់រៀនតាមខ្លួនទេ

05, Mar 2018 , 11:50 am

រូបភាព

ដោយ: ថ្មីៗ

ចុងសប្តាហ៍កន្លងទៅ ប្រធានាធិបតីអាមេរិក ដូណាល់ ត្រាំ បានបង្ហាញការគាំទ្រចំពោះការលុបចោលការកំណត់អាណត្តិរបស់ប្រធានាធិបតីចិនដែលអនុញ្ញាតឲ្យប្រធានាធិបតីកាន់អំណាចលើសពីពីរអាណត្តិ។ មេដឹកនាំមហាអំណាចប្រជាធិបតេយ្យរូបនេះថែមទាំងបង្ហើបថា ថ្ងៃណាមួយអាមេរិកគួរធ្វើតាមអ្វីដែលចិនកំពុងធ្វើរដែរ។ យ៉ាងណាមិញ ចិនតបវិញថា ប្រព័ន្ធដឹកនាំខ្លួនមិនត្រូវការប្រទេសផ្សេងសរសើរ ឬឲ្យប្រទេសផ្សេងចម្លងតាមឡើយ។

ក្នុងកិច្ចប្រជុំបិទទ្វារមួយ ស្ថិតនៅ Mar-a-Lago នៅថ្ងៃសៅរ៍ទី ៣ ខែមីនា ប្រមុខរដ្ឋអាមេរិកលោក ដូណាល់ ត្រាំ បានសរសើរសមភាគីចិនលោក ស៊ី ជិនភីង ដែលនឹងលុបចោលការកំណត់អាណត្តិ និងអនុញ្ញាតឲ្យលោកអាចកាន់តំណែងកាន់តែយូរតាមដែលអាចធ្វើបាន។

បើតាមសារព័ត៌មាន CNN លោក ត្រាំ បានកត់សម្គាល់ថា វាជាគំនិតល្អ ហើយអ្វីដែលសំខាន់មេដឹកនាំអាមេរិករូបនេះព្រលយថា ថ្ងៃណាមួយអាមេរិកអាចនឹងធ្វើបែបនោះដែរ។
«លោក ស៊ី ជិនភីង ឥឡូវនេះជាប្រធានាធិបតីមួយជីវិត។ ហើយលោកជាមនុស្សអស្ចារ្យ។ លោក ស៊ី ជិនភីង អាចធ្វើដូច្នេះបាន។ ខ្ញុំគិតថា វាល្អណាស់។ ប្រហែលជាថ្ងៃណាមួយយើងអាចធ្វើដូចគ្នាបានដែរ»។ លោក ដូណាល់ ត្រាំ បានលើកឡើងដូច្នេះ។

ក្រៅពីសរសើរការដឹកនាំ លោក ត្រាំ បានបន្ថែមផងដែរថា លោក ស៊ី ជិនភីងនេះជាសុភាពបុរសដ៏អស្ចារ្យម្នាក់ ហើយលោកក៏ជាមេដឹកនាំចិនដែលមានឥទ្ធិពលបំផុតក្នុងប្រវត្តិសាស្ត្រក្នុងរយៈពេលប្រហែល ១០០ឆ្នាំមកនេះដែរ។

អាចថា វាជារឿងកម្រដែលប្រមុខដឹកនាំប្រទេសប្រជាធិបតេយ្យកោតសរសើរប្រទេសនិងមេដឹកនាំដែលស្វែងរកឱកាសកាន់អំណាចកាន់តែយូរតាមតែអាចធ្វើបាននោះ។ ប៉ុន្តែវាមិនមែនជារឿងចម្លែកសម្រាប់លោក ដូណាល់ ត្រាំ នោះឡើយ។

ដូចឃើញស្រាប់កន្លងមកលោក ធ្លាប់លើកសរសើរប្រធានាធិបតីហ្វីលីពីនដែលប្រើប្រាស់សង្គ្រាមគ្រឿងញៀនសម្លាប់រង្គាលអស់មនុស្សរាប់ពាន់នាក់ផង ហើយសម្តីលោកបានទាក់ទាញការថ្កោលទោស និងការទិតៀនខ្លាំងពីសហគមន៍សិទ្ធិមនុស្សផងដែរ។

ដោយឡែកទាក់ទិនការកំណត់អាណត្តិរបស់ប្រធានាធិបតីនេះ ជាប្រពៃណីទៅហើយ ប្រធានាធិបតីអាមេរិកកាន់តំណែងបានត្រឹមពីរអាណត្តិ ដែលមួយអាណត្តិមានរយៈពេលបួនឆ្នាំ។ ការកំណត់នេះត្រូវបានកំណត់តាមរយៈការវិសោធនកម្មរដ្ឋធម្មនុញ្ញឆ្នាំ ១៩៥១ ក្រោយពេលដែលប្រធានាធិបតី ហ្វ្រេងគ្លីន រ៉ូសឺហ្វែល ជាប់ឆ្នោតបួនដងបន្តបន្ទាប់គ្នាចាប់ពីឆ្នាំ ១៩៣២មកនោះ។

-ចិនមិនត្រូវការពាក្យសរសើររបស់មេដឹកនាំអាមេរិក
យ៉ាងណាមិញ សម្តីសរសើររបស់លោក ត្រាំ មិនបានធ្វើឲ្យរបបដឹកនាំចិនរីករាយឡើយ ហើយចិនក៏មិនត្រូវការពាក្យសរសើរនេះដូចគ្នា។ តាមការចុះផ្សាយរបស់សារព័ត៌មាន South China Morning Post តំណាងក្រុងប៉េកាំងបានអះអាងថា ប្រព័ន្ធដឹកនាំរបស់ចិនមានលក្ខណៈពិសេសរបស់ខ្លួនរួចទៅហើយ។

ចិនគ្មានគោលដៅនាំចេញគម្រូនៃរបៀបរបបដឹកនាំរបស់ខ្លួនទៅក្រៅប្រទេស ដើម្បីឲ្យគេចម្លងតាម ឬនាំយកប្រព័ន្ធដឹកនាំបរទេសផ្សេងទៀតចូលមកក្នុងស្រុកដែរ។

«ចិននឹងដើរលើផ្លូវរបស់ខ្លួន។ យើងនឹងមិននាំចូលប្រព័ន្ធដឹកនាំបរទេស ឬនាំចេញគម្រូប្រព័ន្ធដឹកនាំរបស់យើងទៅក្រៅប្រទេសដែរ។ យើងក៏មិនសុំឲ្យប្រទេសផ្សេងចម្លង ឬធ្វើតាមអ្វីដែលយើងធ្វើដូចគ្នា»។ នេះជាការលើកឡើងរបស់លោក Zhang Yesui អ្នកនាំពាក្យនៃសភាប្រជាជនចិន និងជាអតីតអគ្គរដ្ឋទូតចិនប្រចាំនៅសហរដ្ឋអាមេរិក។

អ្នកនាំពាក្យរូបនេះមិនបានឆ្លើយតបផ្ទាល់ចំពោះការលើកឡើងរបស់លោក ដូណាល់ ត្រាំ ឡើយប៉ុន្តែលោកសង្កត់ធ្ងន់ថា បើប្រទេសដទៃចាប់អារម្មណ៍ពីបទពិសោធន៍ក្នុងការអភិវឌ្ឍប្រទេស និងអនុវត្តប្រព័ន្ធដឹកនាំរបស់ចិន ចិនអាចចែករម្លែកបានផងដែរ៕