អន្តរជាតិ
ប្រេសិតកូរ៉េខាងត្បូងទៅបញ្ចុះបញ្ចូលកូរ៉េខាងជើងឲ្យចរចាជាមួយអាមេរិក លោក Chung Eui-yong ប្រេសិតពិសេសប្រធានាធិបតីកូរ៉េខាងត្បូង (ស្ដាំ) ធ្វើដំណើរទៅកាន់កូរ៉េខាងជើង (រូបភាព៖ AFP)
× ប្រេសិតពិសេសរបស់ប្រធានាធិបតីកូរ៉េខាងត្បូង មូន ចេអ៊ីន បានធ្វើដំណើរឆ្ពោះទៅកាន់កូរ៉េខាងជើង ដើម្បីបញ្ចុះបញ្ចូលកូរ៉េខាងជើងឲ្យចូលតុចរចាជាមួយអាមេរិក។ ប្រតិភូកូរ៉េខាងត្បូងដឹកនាំលោក Chung Eui-yong នាយកការិយាល័យសន្តិសុខជាតិ និងជាទីប្រឹក្សាលោក មូន ចេអ៊ីន និងអមដោយមន្ត្រីជាន់ខ្ពស់១០នាក់ទៀត។ ត្រឡប់ពីកូរ៉េខាងជើង មន្ត្រីកូរ៉េខាងត្បូងក៏មានគម្រោងទៅអាមេរិកដើម្បីបង្កើតបរិយាកាសប្រសើរដល់ការចរចា។
លោក Chung Eui-yong ប្រេសិតកូរ៉េខាងត្បូង បានចាប់ផ្ដើមដំណើរទស្សនកិច្ចពីរថ្ងៃនៅកូរ៉េខាងជើង ដោយចាប់ផ្ដើមនៅថ្ងៃទី៥ និងបញ្ចប់នៅថ្ងៃទី៦ ខែមីនា។ លោក Chung Eui-yong បានចាកចេញពីព្រលានយន្តហោះនៅ Seongnam ខាងក្រៅរដ្ឋធានីសេអ៊ូល និងធ្វើដំណើរតាមផ្លូវអាកាសខាងលិចទៅកាន់កូរ៉េខាងជើង ជាទីដែលលោកត្រូវអូសទាញរបបដឹកនាំក្រុងព្យុងយ៉ាងឲ្យចូលតុជជែកជាមួយអាមេរិកស្ដីពីការរំសាយនុយក្លេអ៊ែរ។
មន្ត្រីផ្សេងទៀតក្នុងប្រតិភូនេះមានលោក Suh Hoon ប្រធានទីភ្នាក់ងារសម្ងាត់កូរ៉េខាងត្បូងទទួលបន្ទុកកិច្ចការចារកម្ម, លោក Chun Hae-sung អនុរដ្ឋមន្ត្រីបង្រួបបង្រួមកូរ៉ និងមន្ត្រីជាន់ខ្ពស់ពីរនាក់ ក៏ដូចជាមន្ត្រីបម្រើការ៥នាក់ទៀត។ នេះបើតាមការទីភ្នាក់ងារព័ត៌មាន Xinhua ។ ប្រតិភូកូរ៉េខាងត្បូង បានជួបមេដឹកនាំកូរ៉េខាងជើង គីម ជុងអ៊ុន ក្នុងពិធីជប់លៀងស្វាគមន៍នៅថ្ងៃទី៥ ខែមីនាដដែលនៅទីក្រុងព្យុងយ៉ាង។
ថ្លែងប្រាប់អ្នកសារព័ត៌មានមុនហោះទៅកូរ៉េខាងជើង លោក Chung Eui-yong និយាយថា លោកនឹងប្រាប់កូរ៉េខាងជើងពីជំហររឹងមាំឥតងាករេរបស់លោក មូន ចេអ៊ីន លើការលុបបំបាត់នុយក្លេអ៊ែរ ព្រមទាំងការកសាងសន្តិភាពយូរអង្វែងនៅឧបទ្វីបកូរ៉េ។ លោកបន្តថា មន្ត្រីកូរ៉េខាងជើងនឹងជជែកស៊ីជម្រៅជាមួយដៃគូកូរ៉េខាងជើងដើម្បីបន្តការសន្ទនាអន្តរកូរ៉េ និងរវាងក្រុងព្យុងយ៉ាង និងសហគមន៍អន្តរជាតិរាប់ទាំងអាមេរិកផងដែរ។
វិមានប្រធានាធិបតីកូរ៉េខាងត្បូងបញ្ជាក់ថា បេសកកម្មចម្បងរបស់តំណាងពិសេសលោក មូន ចេអ៊ីន គឺបង្កើតការចរចារវាងអាមេរិក និងកូរ៉េខាងជើង។ កូរ៉េខាងត្បូងចេញមុខធ្វើស្ពានរវាងអាមេរិក និងកូរ៉េខាងជើង ព្រោះគូសត្រូវទាំងពីរគ្មានទំនាក់ទំនងផ្លូវការឡើយ តែសុទ្ធតែបង្ហាញជំហរចង់ចរចាដូចគ្នា។ ប៉ុន្តែការដាក់លក្ខខណ្ឌរបស់អាមេរិកដែលចង់ឲ្យកូរ៉េខាងជើងបោះបង់នុយក្លេអ៊ែរសិន ធ្វើឲ្យលទ្ធភាពចរចាមានភាគរយតិចតួច។
ការបញ្ជូនលោក Chung Eui-yong ទៅក្រុងព្យុងយ៉ាង គឺជាការឆ្លើយតបវត្តមានលោកស្រី គីម យ៉ូចុង ជាប្អូនស្រី និងជាប្រេសិតរបស់លោកលោក គីម ជុងអ៊ុន អំឡុងពេលបើកព្រឹត្តិការណ៍អូឡាំពិករដូវរងាកាលពីដើមខែកុម្ភៈ។ ទំនាក់ទំនងអន្តរកូរ៉េបានប្រសើរឡើងជាលំដាប់ដោយសារព្រឹត្តិការណ៍កីឡានេះ ហើយលោក មូន ចេអ៊ីន សង្ឃឹមថា នេះជាឱកាសល្អដើម្បីចាប់ផ្ដើមការចរចារវាងក្រុងវ៉ាស៊ីនតោន និងក្រុងព្យុងយ៉ាងស្ដីពីកម្មវិធីនុយក្លេអ៊ែរ។
ក្រោយបញ្ចប់ទស្សនកិច្ចនៅកូរ៉េខាងជើង លោក Chung Eui-yong ក៏មានផែនការបន្តដំណើរទៅ កាន់អាមេរិកទៀត។ គោលដៅនៃទស្សនកិច្ចនេះ គឺរាយការណ៍ពីលទ្ធផលជំនួបជាមួយមន្ត្រីកូរ៉េខាងត្បូង ក៏ដូចជាចង់ជំរុញឲ្យមានការចរចាផ្ទាល់រវាងអាមេរិក និងកូរ៉េខាងជើងដែរ៕
Tag:
កូរ៉េខាងត្បូង
កូរ៉េខាងជើង
អាមេរិក
មូន ចេអ៊ីន
Chung Eui-yong
© រក្សាសិទ្ធិដោយ thmeythmey.com