ចិន មិនព្រួយបារម្ភពីវត្តមាននាវាដឹកយន្តហោះចម្បាំងអាមេរិកនៅវៀតណាមឡើយ

អន្តរជាតិ

ចិន មិនព្រួយបារម្ភពីវត្តមាននាវាដឹកយន្តហោះចម្បាំងអាមេរិកនៅវៀតណាមឡើយ

07, Mar 2018 , 10:27 am

រូបភាព

ដោយ:

រដ្ឋាភិបាលក្រុងប៉េកាំង ហាក់បង្ហាញជំហរស្ងៀមស្ងាត់មិនសូវជាអើពើចំពោះវត្តមានរបស់នាវាដឹកយន្តហោះរបស់រដ្ឋាភិបាលក្រុងវ៉ាស៊ីនតោននៅវៀតណាមជាលើកដំបូងប៉ុន្មានឡើយ។ សម្រាប់ក្រុងប៉េកាំង អ្វីដែលខ្លួនចង់ឃើញនោះ គឺការចូលរួមថែរក្សាសន្តិភាព និងសន្តិសុខនៅក្នុងតំបន់ពីបណ្តាប្រទេសទាំងអស់ ដោយមិនត្រឹមតែក្រុងវ៉ាស៊ីនតោននោះទេ ។

នាសន្និសីទសារព័ត៌មានប្រចាំថ្ងៃទី ៦ មីនា អ្នកនាំពាក្យក្រសួងការបរទេសចិន លោក លូ កាង ( Lu Kang) បានបញ្ជាក់ពីជំហរជាថ្មីរបស់រដ្ឋាភិបាលចិនចំពោះវត្តមាននាវាដឹកហោះអាមេរិកមកកាន់វៀតណាម ដែលជាភាគីជម្លោះអធិបតេយ្យសមុទ្រចិនខាងត្បូងរបស់ចិននោះ ។ លោក មិនយល់ឃើញថាជា ការគំរាមកំហែងសន្តិសុខទៅលើចិននោះទេ ។

« យើង គ្មានបញ្ហាអ្វីឡើយ ជាមួយនឹងបណ្តាប្រទេសពាក់ព័ន្ធ ដែលមានការអភិវឌ្ឍទំនាក់ទំនង និងកិច្ចសហប្រតិបត្តិការធម្មតាជាមួយនឹងគ្នានោះ ។ យើង ក៏សង្ឃឹមយ៉ាងមុតមាំថា កិច្ចសហប្រតិបត្តិការទាំងនោះ អាចចូលរួមរក្សាសន្តិភាព ស្ថិរភាព និងភាពរុងរឿងនៅក្នុងតំបន់» ។ នេះ គឺចម្លើយរបស់អ្នកនាំពាក្យ នៅពេលដែលអ្នកកាសែត សួរថាតើចិនមានការព្រួយបារម្ភទេចំពោះវត្តមាននាវាអាមេរិកនៅវៀតណាម ។

តាមពិតទៅ នេះ មិនមែនជាលើកដំបូងឡើយ ដែលរដ្ឋាភិបាលក្រុងប៉េកាំង បង្ហាញជំហរមិនសូវដាក់ទម្ងន់លើវត្តមានយោធាអាមេរិកនៅវៀតណាម ពោលគឺ ជំហរនេះ ចិន ធ្លាប់បានបញ្ជាក់យ៉ាងដូច្នេះម្តងរួចហើយនៅពេលដែល អាមេរិក និងវៀតណាម បានព្រមព្រៀងគ្នាលើកដំបូងក្នុងការអនុញ្ញាតឲ្យនាវាដឹកយន្តហោះអាមេរិកទៅកាន់វៀតណាមនោះ ។

គួរជម្រាបផងដែរថា នៅថ្ងៃ៥ មីនា នាវាដឹកយន្តហោះមានទម្ងន់ជាងដប់ម៉ឺនតោន USS Carl Vinson បានចូលសំចតនៅកំពង់ផែដាណាង ប្រទេសវៀតណាម ។ នេះ ជាលើកដំបូងបំផុតហើយ ដែលនាវាដឹកយន្តហោះអាមេរិកមានវត្តមាននៅវៀតណាមរាប់ចាប់ពីសង្គ្រាមវៀតណាមបិទបញ្ចប់ទៅឆ្នាំ ១៩៧៥មកនោះ។

តាមការអះអាងរបស់ លោកឧត្តមនាវីឯក Phillip G. Sawyer មេបញ្ជាការកងនាវាចរណ៍ទីប្រាំពីររបស់អាមេរិកវត្តមានរបស់កងនាវាអាមេរិកនៅវៀតណាមនេះ បានឆ្លុះបញ្ចាំងពីការរីកចម្រើនលូតលាស់នៃកិច្ចសហប្រតិបត្តិការ និងភាពជាដៃគូរវាងវៀតណាម និង អាមេរិក៕