អន្តរជាតិ
ប្រមុខការទូតចិន៖ ចិនគ្មានបំណងអង្គុយកៅអីមហាអំណាចទីមួយរបស់អាមេរិកឡើយ រដ្ឋមន្រ្តីការបរទេសចិន វ៉ាង យី ក្នុងសន្និសីទសារព័ត៌មាន (រូបភាព៖ Xinhua)
× នៅថ្ងៃទី៨ ខែមីនា រដ្ឋមន្ត្រីការបរទេសចិនលោក វ៉ាង យី បានប្រកាសជាសាធារណៈថា ចិនគ្មានបំណងអង្គុយកៅអីមហាអំណាចពិភពលោកជំនួសអាមេរិក ទោះជាចិន និងអាមេរិក គឺជាគូប្រជែងនឹងគ្នាក្ដី។ ប្រមុខការទូតចិនបានប្រាប់ឲ្យអាមេរិកមើលចិនក្នុងនាមជាដៃគូសហប្រតិបត្តិការជាជាងសត្រូវ ប៉ុន្តែចិនក៏ត្រៀមខ្លួនជាស្រេច បើអាមេរិកជ្រើសរើសផ្លូវប្រកួតប្រជែងគ្នានោះ។ លោក វ៉ាង យី ចង់សំដៅសង្គ្រាមពាណិជ្ជកម្ម ដែលកើតចេញពីផែនការដំឡើងពន្ធនាំចូលដែកថែបរបស់អាមេរិក។
ចិនស្ថិតនៅលើផ្លូវវែងឆ្ងាយទៅកាន់ទំនើបកម្ម ហើយចិនគ្មានការចាំបាច់ ឬបំណងជំនួសតួនាទីលើឆាកអន្តរជាតិរបស់អាមេរិកឡើយ។ នេះជាការប្រកាសរបស់រដ្ឋមន្ត្រីការបរទេសចិន វ៉ាង យី នៅថ្ងៃទី៨ ខែមីនា នាឱកាសសន្និសីទសារព័ត៌មានក្រៅកិច្ចប្រជុំសភាប្រជាជនចិន។ លោក វ៉ាង យី ប្រកាសដូចនេះ ក្រោយពេលមន្ត្រីក្រុងវ៉ាស៊ីនតោនបង្ហាញការព្រួយបារម្ភចំពោះការកើនឡើងឥទ្ធិពលរបស់ចិននៅទូទាំងពិភពលោក ហើយថែមទាំងចាត់ទុកចិន ជាគូប្រជែងយុទ្ធសាស្ត្រទៅទៀត។
យោងតាមទីភ្នាក់ងារព័ត៌មាន Xinhua ថ្លែងពីមជ្ឈមណ្ឌលព័ត៌មានក្នុងរដ្ឋធានីប៉េកាំង លោក វ៉ាង យី និយាយថា៖ «មានជនជាតិអាមេរិកខ្លះចោទចិនថា កំពុងដណ្ដើមតួនាទីរបស់អាមេរិក។ ការសន្និដ្ឋានដូចនេះ គឺខុសទាំងស្រុង»។ ប្រមុខការទូតរូបនេះបន្តថា ទោះបីជាចិន និងអាមេរិកប្រជែងគ្នាក្ដី ក៏ការប្រកួតប្រជែងគ្នានោះ គួរត្រូវបានមើលឃើញក្នុងផ្លូវវិជ្ជមាន ដែលនេះជាបញ្ហាធម្មតាក្នុងទំនាក់ទំនងអន្តរជាតិ។
ក្នុងយុទ្ធសាស្ត្រការពារជាតិចុងក្រោយរបស់អាមេរិក ចិនត្រូវបានបញ្ចូលឈ្មោះជាគូប្រជែងរបស់អាមេរិក ហើយមន្ត្រីផ្នែកសន្តិសុខអាមេរិកបានទទូចឲ្យមានការឆ្លើយតបឥទ្ធិពលតាមគ្រប់រូបភាពទាំងអស់ដូចជាសេដ្ឋកិច្ច យោធា និងបច្ចេកវិទ្យាជាដើម។ រដ្ឋបាលប្រធានាធិបតី ដូណាល់ ត្រាំ ក៏ត្រៀមប្រកាសដំឡើងពន្ធនាំចូលដែកថែប និងអាលុយមីញ៉ូមថែមទៀត ដែលរឿងធ្វើឲ្យគេបារម្ភថា សង្គ្រាមពាណិជ្ជកម្មអាចផ្ទុះឡើងមិនខាន។
ចិនមិនសប្បាយចិត្តនឹងគម្រោងដំឡើងពន្ធរបស់អាមេរិកឡើយ ទោះជាទំហំនាំចូលដែកថែបទៅអាមេរិកមានទំហំត្រឹម៣ភាគរយនៃការនាំចូលទាំងអស់ក្ដី។ រដ្ឋមន្ត្រីការបរទេសចិន វ៉ាង យី ចាត់ទុកចំណាត់ការរបស់ក្រុងវ៉ាស៊ីនតោនជាការផ្សំថ្នាំខុស ដែលអាចបង្កផលប៉ះពាល់ដល់ភាគីទាំងសងខាង។ លោក វ៉ាង យី ព្រមានថា ចិននឹងចាត់វិធានការដែលស្របច្បាប់ និងចាំបាច់ដើម្បីតបតវិញមិនខាន។
ជាមួយគ្នានោះ ប្រមុខការទូតចិនក៏ស្នើឲ្យមានការលុបបំបាត់ទ្រឹស្ដីដែលថា ចិនគំរាមគេឯង។ ក្នុងសន្និសីទសារព័ត៌មានដដែល លោក វ៉ាង យី លើកឡើងថា ប្រទេសដែលមិនអនុវត្តស្ដង់ដាពីរជាន់ ឬមិនមានជំហរប្រឆាំងចិន នឹងមើលឃើញកិច្ចសហប្រតិបត្តិការជាមួយចិនជាឱកាស មិនមែនការគំរាមកំហែងអ្វីឡើយ។ លោករំឭកថា ពីមុនមានទ្រឹស្ដីថា ចិននឹងដួលរលំ តែទ្រឹស្ដីនេះបានលិចកប់ទៅវិញ ពេលចិនរីកចម្រើន ឥឡូវនេះក៏ដល់ជីកកប់ទ្រឹស្តីចិនគំរាមគេដែរ៕
Tag:
ចិន
អាមេរិក
វ៉ាង យី
© រក្សាសិទ្ធិដោយ thmeythmey.com