អន្តរជាតិ
ប្រទេស ១១ ឯកភាពគ្នាចុះកិច្ចព្រមព្រៀងពាណិជ្ជកម្មសេរី TPP ទោះគ្មានអាមេរិកក៏ដោយ រូបភាព Europe1
× ដោយគ្មានសហរដ្ឋអាមេរិក ប្រទេសសេសសល់ ១១ បានសម្រេចចុះហត្ថលេខាលើកិច្ចព្រមព្រៀងពាណិជ្ជកម្មភាពភាពជាដៃគូអន្តរប៉ាស៊ីហ្វិក (TPP) ជាផ្លូវការនៅថ្ងៃ ៨ ខែមីនានៅក្នុងប្រទេសស៊ីលី។ កិច្ចព្រមព្រៀងនេះនឹងជំរុញ ការបើកចំហទីផ្សារតំបន់កាន់តែទូលំទូលាយ និងបង្កើនទំនាក់ទំនងពាណិជ្ជកម្មរវាងបណ្តាប្រទេសជាសមាជិកឲ្យកាន់តែខ្លាំងផងដែរ។
កិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) ដែលពីមុនមានឈ្មោះថា ភាពជាដៃគូអន្តរប៉ាស៊ីហ្វិក (TPP) នោះត្រូវបានភាគីចំនួន ១១ ចុះហត្ថលេខាជាផ្លូវការហើយនៅទីក្រុង Santiago ប្រទេសស៊ីលី ទោះគ្មានវត្តមានអាមេរិកក្តី។ ភាគីដែលគាំទ្រកិច្ចព្រមព្រៀងនេះអះអាងថា វាជាសមិទ្ធផលដ៏ចម្បងមួយក្នុងការបង្កើតពាណិជ្ជកម្មសេរីក្នុងតំបន់។
លោកស្រីប្រធានាធិបតីស៊ីលី Michelle Bachelet បានអះអាងថា ភាគីទាំងអស់មានមោទនភាពដែលអាចបន្តដើរទៅមុខនិងរុញឲ្យកិច្ចព្រមព្រៀងនេះចេញរូបរាងជាផ្លូវការ។ លោកស្រីបញ្ជាក់ដូច្នេះ៖ «យើងមានមោទនភាពណាស់ក្នុងការបញ្ចប់ដំណើរការ និងផ្ញើសារចម្បងទៅសហគមន៍អន្តរជាតិថា ការបើកចំហទីផ្សារ សមាហរណកម្មសេដ្ឋកិច្ច និងបង្កើតកិច្ចសហប្រតិបត្តិការអន្តរជាតិដែលអាចបង្កើតឱកាសសេដ្ឋកិច្ច និងវិបុលភាព»។
មានសមាជិកចំនួន ១១ កិច្ចព្រមព្រៀងដែលត្រូវបានគេកែទម្រង់ និងប្តូរឈ្មោះថ្មីនេះនឹងក្លាយជាទីផ្សារដ៏ធំដែលមានប្រជាជនសរុប៥០០លាននាក់ ហើយតំណាងឲ្យ ១៣,៥ភាគរយសេដ្ឋកិច្ចពិភពលោកផង។ កិច្ចព្រមព្រៀងនេះនឹងលុបចោលរបាំងពន្ធគយ និងជំរុញទំនាក់ទំនងពាណិជ្ជឆ្លងទ្វីបផងដែរ។
បើតាមទីភ្នាក់ងារព័ត៌មាន AFP ចំណុចដែលមានចែងភាគច្រើនត្រូវបានរក្សាទុកបើទោះបីជាមានការប្តូរឈ្មោះ និងកែកុនខ្លះក៏ដោយ ប៉ុន្តែអ្វីដែលគួរឲ្យកត់សម្គាល់នោះសមាជិកទាំង ១១ នៅសេសសល់ឯកភាពគ្នាបន្ថែមមាត្រាពាក់ព័ន្ធកម្មសិទ្ធិបញ្ញាផងដែរ។ កិច្ចព្រមព្រៀងនេះនឹងចូលជាធរមានរយៈពេល ៦០ថ្ងៃក្រោយពេលដែលភាគីចំនួន ប្រាំមួយផ្តល់សច្ចាប័នលើកិច្ចព្រមព្រៀងនេះរួចរាល់ហើយនោះ។
ពាក់ព័ន្ធកិច្ចព្រមព្រៀងនេះ រដ្ឋមន្ត្រីពាណិជ្ជកម្មកាណាដា Francois-Philippe Champagne បង្ហាញការយល់ឃើញថា កិច្ចព្រមព្រៀងមួយនេះសំខាន់បំផុតក្នុងការជំរុញពាណិជ្ជកម្មអន្តរជាតិនាសម័យកាលជឿលឿនដូចពេលបច្ចុប្បន្ន។ ចំណែកតំណាងអ្នកចរចារបស់ប្រទេសស៊ីលី Felipe Lopeandia បានបន្ថែមថា ការសម្រេចចុះកិច្ចព្រមព្រៀងរបស់ភាគីទាំង ១១ នេះបានផ្ញើសារនយោបាយដ៏សំខាន់មួយទៅកាន់ពិភពលោក ជាពិសេសអាមេរិកឲ្យបានដឹងថា វាជាកិច្ចព្រមព្រៀងពិភពលោក។
តាមពិតទៅ អតីតប្រធានាធិបតីអាមេរិកបារ៉ាក់ អូបាម៉ា មានចំណែកសំខាន់ក្នុងការជំរុញឲ្យមានការបង្កើតកិច្ចព្រមព្រៀងភាពជាដៃគូអន្តរប៉ាស៊ីហ្វិកនេះឡើយ ហើយវាត្រូវបាបង្កើតឡើងជាផ្លូវការនៅខែឆ្នាំតុលា ឆ្នាំ២០១៥ ដោយភាគី ១២ ដោយក្នុងនោះមានប្រទេសអាស៊ានចំនួនបួន ម៉ាឡេស៊ី វៀតណាម ព្រុយណេ និងសិង្ហបុរីដែរ។ កិច្ចព្រមព្រៀងពាណិជ្ជកម្មស្តង់ដាមាសនេះតំណាងឲ្យសេដ្ឋកិច្ច ៤០ភាគរយទូទាំងពិភពលោក ប៉ុន្តែគួរឲ្យសោកស្តាយ កិច្ចព្រមព្រៀងនេះត្រូវស្លាប់ ដោយសារប្រធានាធិបតីអាមេរិក ដូណាល់ ត្រាំ ដកអាមេរិកចេញកាលពីឆ្នាំមុន ដោយប្តេជ្ញាដម្កល់ប្រយោជន៍អាមេរិកជាធំផង៕
Tag:
TPP
CPTPP
ស៊ីលី
អាមេរិក
© រក្សាសិទ្ធិដោយ thmeythmey.com