អន្តរជាតិ
អតីតប្រធានគុកសម្ងាត់លោកស្រី Haspel អាចក្លាយជាស្ត្រីទីមួយដឹកនាំទីភ្នាក់ងារ CIA លោកស្រី Gina Haspel (រូបភាព៖ New York Post)
× លោកស្រី Gina Haspel នៅថ្ងៃទី១៣ ខែមីនា ត្រូវបានលោកប្រធានាធិបតី ដូណាល់ ត្រាំ ជ្រើសរើសជាប្រធានទីភ្នាក់ងារចារកម្មកណ្ដាល (CIA) ជំនួសលោក Mike Pompeo ដែលត្រូវកាន់តំណែងថ្មីជារដ្ឋមន្ត្រីការបរទេស ក្រោយលោក ត្រាំ បញ្ចប់តំណែងលោក រិច ធីល័រសិន។ លោកស្រី Haspel ជាមន្ត្រីជើងចាស់នៅ CIA និងធ្លាប់ទទួលខុសត្រូវកន្លែងឃុំឃាំងសម្ងាត់នៅទឹកដីថៃ ដែលល្បីថា ប្រើប្រាស់វិធីសាស្ត្រសាហាវធ្វើទារុណកម្មជនសង្ស័យ។
ទីភ្នាក់ងារចារកម្មកណ្ដាល (CIA) អាចមានប្រធានជាស្ត្រីលើកដំបូងក្នុងប្រវត្តិសាស្ត្ររបស់ខ្លួន បន្ទាប់ពីលោកប្រធានាធិបតី ដូណាល់ ត្រាំ តែងតាំងលោកស្រី Gina Haspel ជាបេក្ខជនប្រធានថ្មី ជំនួសលោក Mike Pompeo ដែលនឹងក្លាយជារដ្ឋមន្ត្រីការបរទេស។ លោកស្រី Gina ជាអនុប្រធាន CIA ដែលមានបទពិសោធន៍ក្រាស់ក្រែលក្នុងកិច្ចការចារកម្មនេះ។ ការតែងតាំងលោកស្រី ត្រូវការការយល់ព្រមពីព្រឹទ្ធសភាជាមុនសិន។
យ៉ាងណាមិញ បេក្ខភាពលោកស្រី Haspel រងមន្ទិលសង្ស័យច្រើន។ មន្ត្រី CIA ដែលធ្លាប់ធ្វើការជាមួយលោកស្រី និងសមាជិកសភាអាមេរិកអះអាងថា លោកស្រី Haspel ធ្លាប់ទទួលខុសត្រូវគ្រប់គ្រងគុកសម្ងាត់ «ភ្នែកឆ្មា» នៅឯទឹកដីថៃអំឡុងរដ្ឋបាលលោក George W. Bush ក្នុងឆ្នាំ២០០២ ។ គុកនេះល្បីថា បានប្រើប្រាស់វិធីសាស្ត្រសួរចម្លើយសាហាវដូចជាការចាក់ទឹកលើមុខជនសង្ស័យដែលគ្របដោយកន្សែង។ បីឆ្នាំក្រោយ លោកស្រីបានបញ្ជាឲ្យកម្ទេចវីដេអូបង្ហាញពីការធ្វើទារុណកម្មដែរ។
បើតាមសារព័ត៌មាន New York Times គុកសម្ងាត់ខាងលើនេះ បានបើកដំណើការនៅឆ្នាំ២០០២ ក្រោយព្រឹត្តិការណ៍ភេវរកម្មថ្ងៃទី១១ ខែកញ្ញា ឆ្នាំ២០០១ ។ ជនសង្ស័យអាល់កៃដា ត្រូវបានបញ្ជូនទៅកាន់គុកនោះ ហើយត្រូវបានសួរចម្លើយដោយវិធីសាស្ត្រចាក់ទឹកលើមុខ។ លោកស្រី Haspel គ្រប់គ្រងគុកនេះរហូតដល់បិទនៅខែតុលា ឆ្នាំ២០០២ ។
សំណុំរឿងគុកសម្ងាត់នេះ នឹងក្លាយជាប្រធានបទក្ដៅក្នុងសវនាការព្រឹទ្ធសភាជុំវិញការយល់ព្រមលើបេក្ខភាពលោកស្រី ព្រោះរដ្ឋាភិបាលអាមេរិកមិនបានទទួលស្គាល់ថា មានគុកបែបនោះឡើយ។ អាចក្លាយជាស្ត្រីទីមួយដឹកនាំ CIA ស្ថិតក្នុងស្ថានភាពមិនច្បាស់ឡើយ ខណៈសមាជិកព្រឹទ្ធសភាខ្លះហាក់ជំទាស់ទៅហើយ។ សមាជិកព្រឹទ្ធសភាបក្សសាធារណរដ្ឋលោក John McCain និយាយថា លោកស្រី Haspel ត្រូវបកស្រាយរឿងនេះឲ្យបានច្បាស់លាស់ ជាពិសេសរបៀបធ្វើទារុណកម្មរបស់ CIA តែម្ដង។
ក្នុងករណីទទួលបានការយល់ព្រមពីព្រឹទ្ធសភា លោកស្រី Haspel ត្រូវដោះស្រាយបញ្ហាសំខាន់ៗជាច្រើនរាប់ពីសំណុំរឿងលូកដៃក្នុងការបោះឆ្នោតរបស់រុស្ស៊ី ការត្រៀមខ្លួនរៀបចំជំនួបរវាងលោក ត្រាំ និងមេដឹកនាំកូរ៉េខាងជើង គីម ជុងអ៊ុន ក៏ដូចជាកិច្ចព្រមពៀងនុយក្លេអ៊ែរអ៊ីរ៉ង់ផង។ បញ្ហាប្រឈម គឺលោកស្រីត្រូវបញ្ចុះបញ្ចូលលោក ត្រាំ ឲ្យជឿតាមការវាយតម្លៃរបស់ CIA ឬក៏ត្រូវសម្របខ្លួនតាមជំហររបស់លោក ត្រាំ វិញ៕
Tag:
អាមេរិក
Gina Haspel
CIA
© រក្សាសិទ្ធិដោយ thmeythmey.com