កីឡាជាតិ
ជាតិ
AFC Asian Cup៖ ទោះជំនួបបង្គ្រប់កិច្ច តែគ្រូបង្វឹកកម្ពុជាថានឹងប្រឹងដើម្បី Ranking
× ក្រុមកីឡាបាល់ទាត់ជម្រើសជាតិកម្ពុជាត្រូវតទល់ជាមួយក្រុមអាហ្វហ្គានីស្ថាន សម្រាប់វគ្គជម្រុះ AFC Asian Cup 2019 នាម៉ោង៦ល្ងាច(ម៉ោងនៅកម្ពុជា)ថ្ងៃទី២៧ មីនា ឆ្នាំ២០១៨ នៅកីឡដ្ឋាន Republican Central Stadium ក្នុងទីក្រុងឌូស្ហាន់បេប្រទេសតាហ្ស៊ីគីស្ថាន។ ទោះបីជាជំនួបបង្គ្រប់កិច្ច តែគ្រូបង្វឹកកម្ពុជាអះអាងថា នឹងប្រឹងប្រែងប្រកួតឲ្យអស់ពីសមត្ថភាពក្នុងការស្វែងរកជ័យជម្នះ ដើម្បីរក្សាចំណាត់ថ្នាក់ពិភពលោក(World Ranking)សម្រាប់ក្រុមជម្រើសជាតិកម្ពុជា។
គ្រូបង្វឹកក្រុមកីឡាបាល់ទាត់ជម្រើសជាតិកម្ពុជា លោក ប្រាក់ សុវណ្ណារ៉ា ត្រូវដឹកនាំក្រុមកម្ពុជាតទល់ជាមួយក្រុមអាហ្វហ្គានីស្ថាន សម្រាប់វគ្គជម្រុះពូល C នៃពានរង្វាន់ AFC Asian Cup 2019 នាម៉ោង៦ល្ងាច(ម៉ោងនៅកម្ពុជា)ថ្ងៃទី២៧ មីនានេះ។ ជំនួបបង្គ្រប់កិច្ចនេះ ធ្វើឡើងនៅលើទឹកដីកណ្តាលនាកីឡដ្ឋាន Republican Central Stadium ក្នុងទីក្រុងឌូស្ហាន់បេ ប្រទេសតាហ្ស៊ីគីស្ថាន។ ទាំងកម្ពុជានិងអាហ្វហ្គានីស្ថានសុទ្ធតែបាត់បង់កៅអីឡើងទៅវគ្គបន្តដូចគ្នាសម្រាប់ព្រឹត្តិការណ៍មួយនេះ។
ទោះបីយ៉ាងនេះក្តី នាសន្និសីទសារព័ត៌មានមុនការប្រកួតកាលពីព្រឹកថ្ងៃទី២៦ មីនា លោក ប្រាក់ សុវណ្ណា បានអះអាងថា លោកនឹងខិតខំប្រឹងប្រែងឲ្យអស់ពីសមត្ថភាពក្នុងការស្វែងរកជ័យជម្នះសម្រាប់ជំនួបល្ងាចនេះ។ លោកបានបន្ថែមថា៖«ខ្ញុំគិតថាទោះបីការប្រកួតនេះ វាមិនសំខាន់សម្រាប់យើងក្នុងការប្រជែងដើម្បីឡើងទៅវគ្គបន្ត។ ប៉ុន្តែវាសំខាន់សម្រាប់ក្រុមយើង ពិសេសគឺការបង្កើនចំណាត់ថ្នាក់ក្នុង FIFA World Ranking នេះជាចំណុចសំខាន់សម្រាប់យើង»។
នាការប្រកួតជើងទី១នៅពហុកីឡដ្ឋានជាតិកាលពីថ្ងៃទី១៣ មិថុនា ឆ្នាំ២០១៧ កន្លលទៅ ក្រុមជម្រើសជាតិកម្ពុជាបានយកឈ្នះក្រុមជម្រើសជាតិអាហ្វហ្គានីស្ថាន ១-០ ដោយលទ្ធផលនេះសម្រេចដោយកីឡាករ ប្រាក់ មុន្នីឧត្តម៕
Tag:
បាល់ទាត់
AFC Asian Cup 2019
ប្រាក់ សុវណ្ណារ៉ា
© រក្សាសិទ្ធិដោយ thmeythmey.com