អន្តរជាតិ
លោក គីម ពិតជាបានទៅជួបលោក ស៊ី នៅប៉េកាំង មុនជំនួបជាមួយ លោក ត្រាំ ប្រធានាធិបតីចិន ស៊ី ជិនភីង ចាប់ដៃមេដឹកនាំកំពូលកូរ៉េខាងជើង (រូបភាព៖ Xinhua)
× ពីរថ្ងៃក្រោយការលេចឮព័ត៌មានចចាមអារាមទាក់ទងនឹងដំណើរទស្សនកិច្ចដ៏គួរឲ្យភ្ញាក់ផ្អើលរបស់មេដឹកនាំកូរ៉េខាងជើងទៅកាន់ក្រុងប៉េកាំងនាដើមសប្តាហ៍នេះ នៅថ្ងៃទី២៨ ខែមីនា ចិនបានប្រកាសថា លោក គីម ជុងអ៊ុន ពិតជាមានវត្តមាននៅទីក្រុងប៉េកាំងមែន។ ទីភ្នាក់ងារព័ត៌មានរដ្ឋចិន Xinhua ផ្សាយថា ដំណើរទស្សនកិច្ចនេះធ្វើឡើងតាមការអញ្ជើញរបស់លោកប្រធានាធិបតីចិន ស៊ី ជិនភីង ។ លោក គីម បានប្រាប់លោក ស៊ី ថា កូរ៉េខាងជើងនឹងរំសាយអាវុធនុយក្លេអ៊ែររបស់ខ្លួន។
មេដឹកនាំកូរ៉េខាងជើង គីម ជុងអ៊ុន បានធ្វើទស្សនកិច្ចបួនថ្ងៃនៅទឹកដីចិនចាប់ពីថ្ងៃទី២៥ ខែមីនា ដល់ថ្ងៃទី២៨ ខែមីនា តាមការអញ្ជើញរបស់ប្រធានាធិបតីចិន ស៊ី ជិនភីង ។ ទីភ្នាក់ងារព័ត៌មានចិន Xinhua ផ្សាយថា វត្តមានរបស់មេដឹកនាំកូរ៉េខាងជើងនៅចិនពេលនេះ មិនមែនជាទស្សនកិច្ចផ្លូវការឡើយ។ បញ្ហានុយក្លេអ៊ែរកូរ៉េខាងជើង គឺជាប្រធានបទសំខាន់ក្នុងជំនួបលើកទីមួយរវាងមេដឹកនាំប្រទេសសម្ព័ន្ធមិត្តទាំងពីរ។
នេះជាដំណើរទស្សនកិច្ចនៅបរទេសលើកដំបូងរបស់លោក គីម ជុងអ៊ុន ចាប់តាំងពីការឡើងកាន់អំណាចនៅឆ្នាំ២០១១ មក។ ការយកចិនជាគោលដៅទស្សនកិច្ចនៅបរទេសលើកដំបូង មិនមែនជារឿងងឿងឆ្ងល់ឡើយ ព្រោះចិនជាបង្អែករឹងមាំរបស់កូរ៉េខាងជើងរាប់សិបឆ្នាំ និងរាប់តំណមេដឹកនាំទៅហើយ។ ចិនជាដៃគូពាណិជ្ជកម្មធំជាងគេរបស់កូរ៉េខាងជើង និងជាប្រភពហិរញ្ញវត្ថុដ៏សំខាន់របស់រដ្ឋកុម្មុយនីស្តដែលរងទណ្ឌកម្មជុំជិត។
ប្រធានាធិបតីចិន ស៊ី ជិនភីង ស្វាគមន៍ដំណើរទស្សនកិច្ចនេះ និងបានសន្យាចំពោះមុខមេដឹកនាំកូរ៉េខាងជើងថា ចិននឹងរក្សាមិត្តភាពរឹងមាំជាមួយកូរ៉េខាងជើង។ បើតាមទីភ្នាក់ងារព័ត៌មានចិន លោក ស៊ី និយាយថា មិត្តភាពប្រពៃណីរវាងចិន និងកូរ៉េខាងជើង ដែលពូនជ្រំដោយមេដឹកនាំជំនាន់មុន គឺជាវត្ថុដ៏មានតម្លៃសម្រាប់ភាគីទាំងសងខាង។ ឯលោក គីម វិញនិយាយដែរថា ទំនាក់ទំនងទ្វេភាគីនេះគ្មានអ្វីបំបែកបានឡើយ។
ទោះជាទស្សនកិច្ចមិនផ្លូវការ ប្រធានាធិបតីចិនបានទទួលលោក គីម និងភរិយាយ៉ាងរាក់ទាក់បំផុត។ មេដឹកនាំចិនផ្សេងទៀតមាននាយករដ្ឋមន្ត្រី លី ខឹឈាំង និងលោក វ៉ាង ហ៊ូនីង សមាជិកគណៈកម្មាធិការអចិន្ត្រៃយ៍ការិយាល័យនយោបាយ និងអនុប្រធានាធិបតី វ៉ាង ឈីសាន ក៏បានជួបជជែកជាមួយមេដឹកនាំកូរ៉េខាងជើងដែរ។ លោក គីម បានចាកចេញទៅកាន់កូរ៉េខាងជើងនៅព្រឹកថ្ងៃទី២៨ ខែមីនា តាមរយៈរថភ្លើងពិសេស។
កូរ៉េខាងជើងសន្យារំសាយនុយក្លេអ៊ែរ
ក្រៅពីទំនាក់ទំនងទ្វេភាគី មេដឹកនាំចិន និងកូរ៉េខាងជើងក៏បានជជែកពីបញ្ហានុយក្លេអ៊ែរនៅឧបទ្វីបកូរ៉េដែរ។ ស្ថានភាពនៅឧបទ្វីបកូរ៉េ បានធូរស្រាលនៅរយៈពេលចុងក្រោយនេះ ដោយលោក គីម ជុងអ៊ុន បានប្រាប់លោក ស៊ី ថា កូរ៉េខាងជើងជាអ្នកដាក់ចេញគំនិតផ្ដួចផ្ដើមដើម្បីបន្ធូរបន្ថយភាពរតានតឹង និងលើកសំណើដើម្បីការចរចាសន្តិភាព។ ក្នុងជំនួបទ្វេភាគីជាមួយមេដឹកនាំចិន លោក គីម បានសន្យារំសាយនុយក្លេអ៊ែររបស់កូរ៉េខាងជើង ព្រោះជាជំហរមិនងាករេរបស់មេដឹកនាំកូរ៉េខាងជើងគ្រប់ជំនាន់។
ជាមួយគ្នានោះ មេដឹកនាំកំពូលកូរ៉េខាងជើងក៏បានប្រកាសពីឆន្ទៈក្នុងការជួបជាមួយប្រធានាធិបតីអាមេរិក ដូណាល់ ត្រាំ ។ ជំនួបកំពូលលើកទីមួយរវាងមេដឹកនាំអាមេរិក និងកូរ៉េខាងជើង គ្រោងធ្វើឡើងនៅចុងខែឧសភា ទោះជាមិនទាន់កំណត់ពេលវេលា និងទីតាំងជាក់លាក់ក្ដី។ នៅខែមេសា លោក គីម ក៏នឹងជួបជាមួយមេដឹកនាំកូរ៉េខាងត្បូង មូន ចេអ៊ីន នៅឯតំបន់គ្មានកងទ័ពខណ្ឌចែកឧបទ្វីបកូរ៉េផងដែរ។
បញ្ហាលុបបំបាត់នុយក្លេអ៊ែរនៅឧបទ្វីបកូរ៉េអាចដោះស្រាយបាន បើកូរ៉េខាងត្បូង និងអាមេរិកឆ្លើយតបនឹងឆន្ទៈល្អរបស់កូរ៉េខាងជើង បង្កើតបរិយាកាសសម្រាប់សន្តិភាព និងស្ថិរភាព ក៏ដូចជាចាត់វិធានការដែលជឿនលៀនដើម្បីឲ្យសន្តិភាពក្លាយជាការពិត។ ជាការអះអាងរបស់មេដឹកនាំកំពូលកូរ៉េខាងជើងអំឡុងទស្សនកិច្ចបួនថ្ងៃនៅទឹកដីចិន។
ជួបលោក ស៊ី ជាមុន ដើម្បីត្រៀមជួបលោក មូន និងលោក ត្រាំ
ទំនាក់ទំនងរវាងចិន និងកូរ៉េខាងជើង បានស្ថិតលើផ្លូវរអាក់រអួលនារយៈពេលចុងក្រោយ។ លោក គីម ជុងអ៊ុន បានបោះដៃទៅរកកូរ៉េខាងត្បូង និងអាមេរិក តាមរយៈគម្រោងជួបគ្នាជាមួយមេដឹកនាំប្រទេសទាំងពីរនេះ និងការបន្ទន់ឥរិយាបថសំដៅបង្កើតសន្តិភាពនៅឧបទ្វីបកូរ៉េ។ ទង្វើរបស់កូរ៉េខាងជើងបែបនេះ ហាក់ដូចជាការទុកចិនដោយឡែក ហើយចិនពិតជាមិនសប្បាយចិត្តឡើយដែលលោក ស៊ី ត្រូវឈរលំដាប់ទីបីដើម្បីជួបលោក គីម នោះ។
សម្រាប់ដំណើរទស្សនកិច្ចរបស់លោក គីម នៅចិនពេលនេះ ជាសញ្ញាបង្ហាញច្បាស់ថា ចិនជាសម្ព័ន្ធមិត្តមិនអាចខ្វះបានឡើយ ។ នេះបានន័យថា ចិននៅតែជាតួអង្គដ៏សំខាន់ក្នុងការដោះស្រាយបញ្ហានុយក្លេអ៊ែរនៅឧបទ្វីបកូរ៉េ និងជាបង្អែកសម្រាប់កូរ៉េខាងជើងសម្រាប់ការចរចាជាមួយមេដឹកនាំអាមេរិក និងកូរ៉េខាងត្បូង។ លោក ស៊ី ទំនងជាបានផ្ដល់សម្បទានខ្លះដល់កូរ៉េខាងជើង ដើម្បីរក្សាផលប្រយោជន៍របស់ខ្លួនផងដែរ។
សម្រាប់ចិន កូរ៉េខាងជើងគឺជាសន្លឹកបៀមួយសម្រាប់តថ្លៃជាមួយអាមេរិក ខណៈដែលប្រទេសទាំងពីរកំពុងស្ថិតលើដំណើរទៅកាន់សង្គ្រាមពាណិជ្ជកម្មនោះ។ និយាយឲ្យស្ដាប់ បើអាមេរិកចង់ដោះស្រាយបញ្ហានុយក្លេអ៊ែរកូរ៉េខាងជើង អាមេរិកក៏ត្រូវតែរាប់ចិនចូលជាដាច់ខាត ហើយបើគ្មានចិនទេ បញ្ហាឧបទ្វីបកូរ៉េនឹងមិនអាចចេញរួចឡើយ៕
Tag:
ចិន
កូរ៉េខាងជើង
ស៊ី ជិនភីង
គីម ជុងអ៊ុន
© រក្សាសិទ្ធិដោយ thmeythmey.com