ជាតិ
នយោបាយជាតិ
សម្តេច ហ៊ុន សែន៖ គ្មានមេដឹកនាំណាលើពិភពលោក ប្រើពេលចរចាច្រើនជាងខ្ញុំទេ
សម្តេច ហ៊ុន សែន ថ្លែងក្នុងពិធីជួបសំណេះសំណាលជាមួយកម្មករ-កម្មការិនី នៅព្រឹកថ្ងៃទី២៨ ខែមីនា ឆ្នាំ២0១៨។ រូបពីទំព័រហ្វេសបុករបស់សម្តេច ហ៊ុន សែន
×![]()
ដោយ: សារព័ត៌មានថ្មីៗ
ភ្នំពេញ៖ សម្តេច ហ៊ុន សែន នាយករដ្ឋមន្ត្រីកម្ពុជា ព្យាយាមបង្ហាញឲ្យសាធារណជន ដឹងថា ខ្លួនជាមេដឹកនាំមួយរូប ដែលចូលចិត្តចរចាបំផុត ដើម្បីដោះស្រាយវិបត្តិ និងជម្លោះក្នុងប្រទេស។
ក្នុងពិធីជួបសំណេះសំណាលជាមួយកម្មករ-កម្មការិនីដូចសព្វដង នៅព្រឹកថ្ងៃទី២៨ ខែមីនា ឆ្នាំ២0១៨ មេដឹកនាំកម្ពុជា ដែលកាន់អំណាចរាប់ទសវត្សរ៍រូបនេះ បានថ្លែងយ៉ាងដូច្នេះថា៖«ក្នុងប្រវត្តិមេដឹកនាំលើពិភពលោក អត់មានអ្នកណាប្រើពេលវេលា ដើម្បីចរចាច្រើនជាងពូទេ។ ពូ ជាអ្នកចរចា»។
ថ្វិតករណីលោក សម រង្ស៊ី អតីតប្រធានគណបក្សសង្គ្រោះជាតិ មិនត្រូវបានភ្ជាប់ទៅនឹងការថ្លែងសារខាងលើក្តី ប៉ុន្តែការលើកឡើងរបស់សម្តេច ហ៊ុន សែន ចំនឹងបរិបទ ដែលលោក សម រង្ស៊ី ព្យាយាមស្វែងរកផ្លូវចរចា។ បំណងនៃការចរចារបស់លោក សម រង្ស៊ី មិនទទួលបានចម្លើយវិជ្ជមានពីសម្តេច ហ៊ុន សែន នោះទេ។
ការបដិសេធនេះ មិនមែនដោយសារតែសម្តេច ហ៊ុន សែន ជាមេដឹកនាំ ដែលមិនចូលចិត្តចរចានោះទេ ក៏ប៉ុន្តែ ទំនងជាឥរិយាបថរបស់លោក សម រង្ស៊ី នាពេលនេះ មិនទាន់សមស្រប ដែលអាចទាញចិត្តសម្តេច ឲ្យទៅចរចាក៏ថាបាន។ សម្តេច ហ៊ុន សែន ធ្លាប់បកស្រាយថា មូលហេតុ ដែលការចរចា មិនអាចកើតឡើង គឺដោយសារតែលោក សម រង្ស៊ី និងបក្សពួកនៅក្រៅប្រទេស បានប្រព្រឹត្តនូវទង្វើជ្រុលហួសហេតុ។
លោក សម រង្ស៊ី ដែលបច្ចុប្បន្នជាប្រធានចលនាសង្គ្រោះជាតិ ចង់ឲ្យមានការចរចារវាងអតីតក្រុមប្រឆាំង និងបក្សកាន់អំណាច។ លោក យល់ថា ការចរចា ឬក៏ការប្រើប្រាស់វប្បធម៌សន្ទនាសាជាថ្មី គឺជាមធ្យោបាយដ៏ល្អ ដើម្បីកែប្រែស្ថានការណ៍ឲ្យមានភាពល្អប្រសើរ មុនការបោះឆ្នោតឈានមកដល់។
ប្រហែលជាគ្មានរឿងអ្វីផ្សេងក្រៅពីការទាមទារឲ្យដោះលែងលោក កឹម សុខា និងការបើកផ្លូវឲ្យគណបក្សសង្គ្រោះជាតិ ធ្វើសកម្មភាពឡើងវិញនោះទេ ប្រសិនបើមានការចរចាមែននោះ។ នេះជាការបង្ហើបរបស់លោក សម រង្ស៊ី តាមរយៈបណ្តាញសង្គម និងសារព័ត៌មាននានា កន្លងមក។
សហគមន៍អន្តរជាតិមួយចំនួន ដូចជាសហភាពអឺរ៉ុបជាដើម ក៏ជំរុញឲ្យមានការចរចារវាងអតីតបក្សប្រឆាំង និងបក្សកាន់អំណាចដែរ។ យ៉ាងណាក៏ដោយ សម្រាប់ស្ថានការណ៍ពេលនេះ រដ្ឋាភិបាលកម្ពុជា ក៏ដូចជាបក្សកាន់អំណាច មិនទាន់បង្ហាញភ្លើងខៀវ ដល់អតីតបក្សប្រឆាំង នៅឡើយទេ៕
Tag:
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com
