លោក ឡាយ វណ្ណៈ និងលោក ឡាយ ណារិទ្ធ ត្រូវបានចោទពីបទ «ឃាតកម្ម»

ជាតិ

លោក ឡាយ វណ្ណៈ និងលោក ឡាយ ណារិទ្ធ ត្រូវបានចោទពីបទ «ឃាតកម្ម»

03, Apr 2018 , 4:11 pm

រូបភាព

រូបពីហ្វេសប៊ុកលោក ឡាយ វណ្ណៈ អភិបាលខេត្តតាកែវ

ដោយ: ថ្មីៗ

ទីបំផុត មរណភាពរបស់លោកស្រី ចេវ សុវឌ្ឍនា ត្រូវបានព្រះរាជអាជ្ញា រកឃើញថា មិនមែនជាការធ្វើអត្តឃាតដោយចងកនោះទេ ប៉ុន្តែជាអំពើឃាតកម្ម។ លោក លី សុផាណា អ្នកនាំពាក្យនៃអយ្យការអមសាលាដំបូងរាជធានីភ្នំពេញ បានប្រាប់អ្នកកាសែតថា លោក ឡាយ វណ្ណៈ (ប្អូន) ជាអតីតអភិបាលខេត្តតាកែវ និងលោក ឡាយ ណារិទ្ធ (បង) ស្នងការរងខេត្តតាកែវ ត្រូវបានចោទពីបទ ឃាតកម្ម ក្នុងសំណុំរឿងនេះ។

លោក លី សុផាណា បន្តថា មនុស្សពាក់ព័ន្ធពីរនាក់ផ្សេងទៀត បានរងបទចោទ «លាក់បាំងតម្រុយ» ក្នុងសំណុំរឿងឃាតកម្មមួយនេះ។ អ្នកនាំពាក្យខាងលើ បានសរសេរសារទៅកាន់អ្នកកាសែតតាមបណ្តាញទំនាក់ទំនងតេឡេក្រាម នៅរសៀលថ្ងៃទី៣ ខែមេសា ឆ្នាំ២0១៨នេះ យ៉ាងដូច្នេះថា៖«បុគ្គលទាំង៤នេះ ត្រូវបានបញ្ជូនទៅកាន់ចៅក្រមស៊ើបសួរ ដើម្បីចាត់ការបន្តតាមនីតិវិធី»។

មាត្រា១៩៩ នៃក្រមព្រហ្មទណ្ឌ បានកំណត់ថា អំពើឃាតកម្ម ត្រូវផ្តន្ទាទោសពី១0ឆ្នាំ ទៅ ១៥ឆ្នាំ។ ចំណែកមាត្រា៥៣២ នៃក្រមព្រហ្មទណ្ឌ បានកំណត់ថា អំពើលាក់បាំងតម្រុយដែលធ្វើឲ្យមានឧបសគ្គក្នុងការស្វែងរកការពិត ត្រូវផ្តន្ទាទោសពី១ឆ្នាំ ទៅ ៣ឆ្នាំ និងពិន័យជាប្រាក់ពី២លានរៀល ទៅ ៦លានរៀល។

លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ជាអ្នកចោទប្រកាន់ជនត្រូវចោទទាំង៤។ ការចោទប្រកាន់នេះ គឺធ្វើឡើងបន្ទាប់ពីបញ្ចប់ការសាកសួររយៈពេលប៉ុន្មានថ្ងៃកន្លងមក។

គួររម្លឹកថា លោកស្រី ចេវ សុវឌ្ឍនា ដែលជាស្រីកំណាន់របស់លោក ឡាយ វណ្ណៈ ត្រូវបានគេប្រទះឃើញស្លាប់ ដោយស្ថានភាពចងក ក្នុងផ្ទះ ស្ថិតនៅក្រុងដូនកែវ ខេត្តតាកែវ កាលពីអំឡុងខែមករា ឆ្នាំ២0១៨។ ប៉ុន្តែ សមត្ថកិច្ច និងសាធារណជនខ្លះ សង្ស័យថា មរណភាពរបស់លោកស្រី មិនមែនជាការធ្វើអត្តឃាតនោះទេ តែទំនងជាអំពើឃាតកម្ម៕