ជាតិ
ភ្លៀងកក់ខែ នៅតែបន្តធ្លាក់រាយប៉ាយទូទាំងប្រទេស រហូតដល់ថ្ងៃទី២១ ខែមេសា
× តាមការព្យាករអាកាសធាតុ របស់ក្រសួងធនធានទឹក និងឧតុនិយម ភ្លៀងកក់ខែ នៅបន្តធ្លាក់រាយប៉ាយស្ទើរទូទាំងប្រទេស ដល់ថ្ងៃទី២១ ខែមេសា ឆ្នាំ២០១៨ ហើយខ្យល់កន្ត្រាក់ ដែលបានបោកបក់បណ្ដាលឲ្យខូចខាតនៅតាមបណ្ដាខេត្តមួយចំនួន បានចុះថយបន្តិចចាប់ពីថ្ងៃ១៨នេះ។ បើតាម លោក ចាន់ យុត្ថា នាយកខុទ្ទកាល័យ និងជាអ្នកនាំពាក្យក្រសួងធនធានទឹក សីតុណ្ហភាព នឹងធ្លាក់ចុះមកនៅអតិបរមាក្នុងរង្វង់ចាប់ពី ២៥-២៦អង្សាសេ រហូតដល់ចុងខែមេសា។
លោក ចាន់ យុត្ថា នាយកខុទ្ទកាល័យក្រសួងធនធានទឹក បានប្រាប់សារព័ត៌មានថ្មីៗថា កាលពីថ្ងៃទី១៧ ខែមេសា ក្រោយពិធីបុណ្យចូលឆ្នាំខ្មែរ មានភ្លៀងកក់ខែធ្លាក់រាយបាយស្ទើរពេញផ្ទៃប្រទេស ហើយភ្លៀងលាយឡំជាមួយនឹងខ្យល់កន្ត្រាក់បានធ្វើឲ្យប៉ះពាល់ដល់ផ្ទះប្រជាពលរដ្ឋ នៅខេត្តព្រៃវែង ស្វាយរៀង កំពង់ស្ពឺ និងប៉ៃលិន។ លោក បញ្ជាក់យ៉ាងដូច្នេះថា៖«ខ្យល់កន្ត្រាក់នេះ មិនបណ្ដាលឲ្យប៉ះពាល់ធ្ងន់ធ្ងរដល់ប្រជាពលរដ្ឋឡើយ»។
នាយកខុទ្ទកាល័យ និងជាអ្នកនាំពាក្យក្រសួងធនធានទឹករូបនេះ បានបន្ថែមថា សីតុណ្ហភាពកន្លងមកក្នុងរង្វង់អតិបរមា ៣៣អង្សាសេ ប៉ុន្តែចាប់ពីយប់ថ្ងៃទី១៨ ខែមេសានេះ សីតុណ្ហភាពនឹងធ្លាក់ចុះមកក្នុងរង្វង់អតិបរមាចាប់ពី២៥ ទៅ ២៦អង្សា ដល់ដំណាច់ខែនេះ។
លោក ចាន់ យុត្ថា បានលើកឡើងទៀតថា ភ្លៀងកក់ខែដែលធ្លាក់រាយប៉ាយនេះ ស្ទើរតែគ្រប់រាជធានី-ខេត្ត ពីតិចទៅបង្គួរ តែមិនទាន់បានគ្រប់ស្រុកនៅឡើងទេ ប៉ុន្តែកាលពីថ្ងៃទី១៧ ខេត្តប៉ៃលិន ព្រៃវែង ស្វាយរៀង និងកំពង់ស្ពឺ មានភ្លៀងធ្លាក់ខ្លាំងធ្វើឲ្យទឹកឡើងជន់ និងមានខ្យល់កន្ត្រាក់ បានធ្វើឲ្យផ្ទះប្រជាពលរដ្ឋមួយចំនួនដួលរលំ៕
Tag:
ភ្លៀងកក់ខែ
ចាន់ យុត្ថា
© រក្សាសិទ្ធិដោយ thmeythmey.com