កងកម្លាំង៨ម៉ឺននាក់ ត្រៀមការពារសន្តិសុខ ក្នុងថ្ងៃបោះឆ្នោត

ជាតិ

កងកម្លាំង៨ម៉ឺននាក់ ត្រៀមការពារសន្តិសុខ ក្នុងថ្ងៃបោះឆ្នោត

19, Apr 2018 , 7:59 am

រូបភាព

ដោយ: ថ្មីៗ

កងកម្លាំងប្រដាប់អាវុធប្រមាណ៨ម៉ឺននាក់ នឹងត្រូវដាក់ពង្រាយនៅទូទាំងប្រទេស ដើម្បីការពារសន្តិសុខ និងសណ្តាប់ធ្នាប់ ក្នុងអំឡុងនៃការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។ នេះជាការអះអាងរបស់នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ នៅក្នុងពិធីបើកវគ្គបណ្តុះបណ្តាលគ្រូបង្គោលស្តីពី ច្បាប់ បទបញ្ជា និងនីតិវិធីសម្រាប់ការបោះឆ្នោត រួមទាំងក្រមសីលធម៌សម្រាប់ភ្នាក់ងារសន្តិសុខ។

ការបើកវគ្គបណ្តុះបណ្តាលនេះ មានរយៈពេល៣ថ្ងៃ គឺចាប់ពីថ្ងៃទី១៨ ដល់ថ្ងៃទី២០ ខែមេសា ឆ្នាំ២០១៨ ដោយផ្តោតសំខាន់លើសកម្មភាពសន្តិសុខនៃការបោះឆ្នោត។ គេហទំព័រអគ្គស្នងការនគរបាលជាតិ បានស្រង់ប្រសាសន៍របស់លោក គៀត ច័ន្ទថារិទ្ធ ទៅចុះផ្សាយយ៉ាងដូច្នេះថា៖«សិក្ខាកាម ដែលបានបញ្ចប់វគ្គនេះ ត្រូវយកចំណេះដឹង និងជំនាញទៅបង្ហាត់បង្រៀនបន្ត ព្រោះថាយើងមានកម្លាំង ដែលត្រូវចូលរួមការពារក្នុងការបោះឆ្នោត រហូតដល់ទៅ៨ម៉ឺននាក់ ក្នុងនោះមកពីកងយោធពលខេមរភូមិន្ទ និងកងរាជអាវុធហត្ថ និងមានកម្លាំងប្រជាការពារត្រៀមជួយនៅតាមឃុំ សង្កាត់ និងក្រុង ស្រុក ខណ្ឌ ជាង២ម៉ឺននាក់ផងដែរ»។

គណៈកម្មាធិការជាតិរៀបចំការបោះឆ្នោត (គ.ជ.ប.) បានសេចក្តីប្រកាសព័ត៌មានថា ការចុះបញ្ជីគណបក្ស ដើម្បីចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងធ្វើឡើងចាប់ពីថ្ងៃទី៣០ ខែមេសា ហើយបិទបញ្ចប់នៅថ្ងៃទី១៤ ខែឧសភា ឆ្នាំ២០១៨។

លោក ហង្ស ពុទ្ធា អ្នកនាំពាក្យគ.ជ.ប. បានប្រាប់សារព័ត៌មានថ្មីៗ តាមទូរសព្ទថា គណបក្សណា ដែលមិនបានចុះឈ្មោះ គឺស្មើនឹងមិនបានចូលរួមប្រកួតប្រជែងក្នុងការបោះឆ្នោត។ លោក បញ្ជាក់យ៉ាងដូច្នេះថា៖«ការចុះឈ្មោះគណបក្ស សម្រាប់ចូលរួមប្រកួតប្រជែង នឹងធ្វើទៅតាមកាលកំណត់។ យើងអត់ពន្យារពេលជាដាច់ខាត»៕