កូរ៉េទាំងពីរប្តេជ្ញាបញ្ចប់សង្គ្រាម បង្រួបបង្រួមកូរ៉េ និងរំសាយនុយក្លេអ៊ែរ

អន្តរជាតិ

នយោបាយអន្តរជាតិ

កូរ៉េទាំងពីរប្តេជ្ញាបញ្ចប់សង្គ្រាម បង្រួបបង្រួមកូរ៉េ និងរំសាយនុយក្លេអ៊ែរ

27, Apr 2018 , 4:34 pm

រូបភាព

ដោយ: តន ចាន់រិទ្ធារ៉ា

សន្ធិសញ្ញាបញ្ចប់សង្គ្រាមកូរ៉េផ្លូវការនឹងត្រូវប្រកាសក្នុងឆ្នាំ២០១៨ ។ នេះបើតាមការសេចក្ដីថ្លែងការណ៍រួមក្រោយជំនួបកំពូលមេដឹកនាំកូរ៉េលើកទីបីនៅថ្ងៃទី២៧ ខែមេសានៅឯតំបន់គ្មានយោធាខណ្ឌចែកកូរ៉េទាំងពីរ។ កូរ៉េទាំងពីរក៏យល់ព្រមស្វែងរកការបង្រួបបង្រួមជាតិ កាត់បន្ថយភាពតានតឹងផ្នែកយោធា និងការចំណាយលើវិស័យកងទ័ពដើម្បីជាសក្ខីកម្មនៃការបន្ធូរភាពតានតឹង។ កាន់តែសំខាន់ កូរ៉េខាងជើងក៏សន្យារំសាយនុយក្លេអ៊ែររបស់ខ្លួនដែរ។

ប្រធានាធិបតីកូរ៉េខាងត្បូង មូន ចេអ៊ីន និងមេដឹកនាំកំពូលកូរ៉េខាងជើង គីម ជុងអ៊ុន បានចុះហត្ថលេខាលើសេចក្ដីថ្លែងការណ៍ប៉ាន់មុនជុមសម្រាប់សន្តិភាព វិបុលភាព និងការបង្រួបង្រួមនៅឧបទ្វីបកូរ៉េ។ សេចក្ដីថ្លែងការណ៍រួមនេះ ត្រូវបានចុះហត្ថលេខានៅតំបន់ព្រំដែនខណ្ឌចែកកូរ៉េទាំងពីរ និងធ្លាប់ជាទីប្រយុទ្ធគ្នាកាលពី៦៥ឆ្នាំមុន។

ក្នុងសេចក្ដីថ្លែងការណ៍ក្រោយជំនួបពេញមួយថ្ងៃ មេដឹកនាំកូរ៉េទាំងពីរប្រកាសថា នឹងមិនមានសង្គ្រាមទៀតឡើយនៅឧបទ្វីបកូរ៉េ ហើយសករាជថ្មីនៃសន្តិភាពបានចាប់ផ្ដើមហើយ។ សេចក្ដីថ្លែងការណ័បន្តថា កូរ៉េទាំងពីរនឹងសហការគ្នាយ៉ាងសកម្មដើម្បីបង្កើតសន្តិភាពឲ្យបានល្អ និងអចិន្ត្រៃយ៍នៅឧបទ្វីបកូរ៉េ។

ការបញ្ចប់សង្គ្រាមនេះ ជាការចង់បានរបស់កូរ៉េខាងត្បូងជាយូរមកហើយ ដ្បិតកូរ៉េទាំងសងខាងស្ថិតក្នុងស្ថានភាពធ្វើសង្គ្រាម ទោះជាសង្គ្រាមកូរ៉េចប់ក្នុងឆ្នាំ១៩៥៣។ ជុំវិញកម្មវិធីនុយក្លេអ៊ែរកូរ៉េខាងជើងវិញ លោក គីម និងលោកមូន បានប្រកាសពីប្ដេជ្ញាចិត្តក្នុងការរំសាយនុយក្លេអ៊ែរពីឧបទ្វីបកូរ៉េ ដើម្បីសម្រេចឲ្យបានគោលដៅឧបទ្វីបកូរ៉េគ្មាននុយក្លេអ៊ែរ។

កូរ៉េទាំងពីរក៏ឯកភាពគ្នាពង្រឹងទំនាក់ទំនងតាមរយៈការផ្លាស់ប្តូរមេដឹកនាំជាទៀងទាត់ និងជជែកតាមទូរសព្ទដោយផ្ទាល់។ អ្វីដែលសំខាន់នោះលោក មូន នឹងអញ្ជើញទៅទស្សនកិច្ចនៅក្រុងព្យុងយ៉ាងនៅឆ្នាំនេះ តាមការអញ្ជើញរបស់លោក គីម ផងដែរ។

កូរ៉េទាំងពីរក៏នឹងរៀបចំការជួបជុំក្រុមគ្រួសារកូរ៉េដែលបែកបាក់គ្នាក្នុងអំឡុងសង្គ្រាមកូរ៉េនៅថ្ងៃទី ១៥ ខែសីហាខាងមុខដែរ ។ ប្រជាជនកូរ៉េខាងត្បូង ៥៧០០០គ្រួសារដែលមានបងប្អូននៅកូរ៉េខាងជើង៕