កីឡាជាតិ
ជាតិ
សម្តេច ទៀ បាញ់ ប្រាប់មន្ត្រីប្រើប្រាស់ថវិកាឲ្យបានត្រឹមត្រូវនិងស្របតាមផែនការហិរញ្ញវត្ថុ សម្តេច ទៀ បាញ់ ចូលរួមកិច្ចប្រជុំគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ នៅវិមានសន្តិភាព
× សម្តេច ទៀ បាញ់ ប្រធានគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ ដែលហៅកាត់ថា«CAMSOC»ជំរុញឲ្យមន្ត្រីក្រោមឱវាទខ្លួន ប្រើប្រាស់ថវិកាឲ្យបានត្រឹមត្រូវនិងស្របតាមផែនការហិរញ្ញវត្ថុ។ ទន្ទឹមនឹងនេះ សម្តេច ក៏ជំរុញឲ្យមន្ត្រីទាំងអស់ខិតខំស្វែងរកថវិកាបន្ថែមពីវិស័យឯកជន សម្រាប់ទ្រទ្រង់ដំណើរការគណៈកម្មាធិការជាតិនេះផងដែរ។
ក្នុងកិច្ចប្រជុំគណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ លើកដំបូងនៅវិមានសន្តិភាព កាលពីព្រឹកថ្ងៃទី២៦ មេសា សម្តេច ទៀ បាញ់ ប្រធាន CAMSOC បានក្រើនរំលឹកនិងជំរុញឲ្យមន្ត្រីក្រោមឱវាទ ប្រើប្រាស់ថវិការបស់រាជរដ្ឋាភិបាលឲ្យបានត្រឹមត្រូវនិងស្របតាមគោលការណ៍ហិរញ្ញវត្ថុ ក្នុងការដំណើរការគណៈកម្មាធិការជាតិរៀបចំការប្រកួតកីឡាស៊ីហ្គេម។
ក្នុងបទសម្ភាសជាមួយអ្នកសារព័ត៌មានក្រោយកិច្ចប្រជុំ លោក វ៉ាត់ ចំរើន អគ្គលេខាធិការ CAMSOC បាននិយាយយ៉ាងដូច្នេះថា៖«បូកសរុបចុងក្រោយសម្តេចប្រធាន(សម្តេច ទៀ បាញ់)បានសង្កត់ធ្ងន់ទៅលើចំណុចទី១ គឺស្នើឲ្យការគ្រងថវិកានៃការដំណើរការនៃ CAMSOC នេះ ឲ្យមានភាពជាក់លាក់ និងប្រព្រឹត្តទៅតាមគោលការណ៍ហិរញ្ញវត្ថុ។ ទន្ទឹមនឹងគម្រោងថវិការរដ្ឋ សម្តេច ស្នើឲ្យមន្ត្រីទាំងអស់ខិតខំស្វែងរកថវិកាបន្ថែមពីវិស័យឯកជន ក្នុងការទ្រទ្រង់ដំណើររៀបចំមុនការប្រកួតស៊ីហ្គេមមួយនេះ»។
ជាមួយគ្នានេះ សម្តេច ទៀ បាញ់ ក្រើនរំលឹកដល់មជ្ឈមណ្ឌលហ្វឹកហ្វឺនកីឡា និងអគ្គនាយកដ្ឋានកីឡា ដែលធ្វើការផ្ទាល់ជាមួយកីឡាករជម្រើសជាតិឲ្យខិតខំជំរុញ និងបង្កើនការយកចិត្តទុកដាក់ក្នុងការអភិវឌ្ឍន៍ធនធានកីឡាករ គ្រូបង្វឹក និងមន្ត្រីបច្ចេកទេសឲ្យកាន់ប្រសើរឡើងថែមទៀត។ ទន្ទឹមនឹងនេះ សម្តេច ស្នើឲ្យមន្ត្រីជំនាញអគ្គលេខាធិការដ្ឋាននៃ CAMSOC ចូលរួមហសការ តាមដានវាយតម្លៃ និងធ្វើរបាយការណ៍ឲ្យបានត្រឹមត្រូវ ក្នុងន័យជួយអភិវឌ្ឍន៍ធនធានប្រកបដោយប្រសិទ្ធផល។
លោក វ៉ាត់ ចំរើន អគ្គលេខាធិការ CAMSOC ថ្លែងក្នុងកិច្ចប្រជុំនៅវិមានសន្តិភាព
លោក វ៉ាត់ ចំរើន បានបន្ថែមថា៖«សម្តេច ទៀ បាញ់ បានជំរុញឲ្យអគ្គលេខាធិការដ្ឋាននៃ CAMSOC រៀបចំការងារយន្តការសម្របសម្រួលរបស់ខ្លួនឲ្យបានឆាប់រហ័ស។ រៀងរាល់បីខែម្តងគណៈកម្មការរៀបចំការប្រកួតកីឡាស៊ីហ្គេម ត្រូវរៀបចំកិច្ចប្រជុំរបស់ខ្លួនឲ្យបានទៀងទាត់ ដើម្បីតាមដាន វាយតម្លៃនៃដំណើរការ និងស្វែងរកដំណោះស្រាយ តាមផែនទីចង្អុលបង្ហាញ»។
នៅក្នុងកិច្ចប្រជុំលើកដំបូងរបស់គណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ ដោយមានការចូលរួមពីសំណាក់ សម្តេច ទៀ បាញ់ រដ្ឋមន្ត្រីក្រសួងការពារជាតិ និងជាប្រធាន CAMSOC, លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា និងមន្ត្រីតំណាងក្រសួងអប់រំ រួមទាំងមន្ត្រីអ្នកមុខអ្នកការជាច្រើនរូបទៀត៕
Tag:
វ៉ាត់ ចំរើន
ទៀ បាញ់
CAMSOC
© រក្សាសិទ្ធិដោយ thmeythmey.com