អន្តរជាតិ
នយោបាយអន្តរជាតិ
នាយករដ្ឋមន្ត្រីសិង្ហបុរី៖ បើស្ថាបនិកអាស៊ានទាំងប្រាំ មិនលះបង់ខ្ពស់ពីអតីតកាលទេ អាស៊ានក៏គ្មានថ្ងៃនេះដែរ នាយករដ្ឋមន្ត្រីសិង្ហបុរី លី សៀនឡុង ថ្លែងបើកកិច្ចប្រជុំកំពូលអាស៊ានលើកទី ៣២ (រូបភាព AFP)
× លោកនាយករដ្ឋមន្ត្រី លី សៀងឡុង នៅថ្ងៃបើកដំណើការផ្លូវការនៃភាពជាប្រធានអាស៊ានរបស់សិង្ហបុរីកន្លងទៅ បានរម្លឹកពីគុណសម្បត្តិ ភក្តីភាព និងការលះបង់ខ្ពស់របស់ស្ថាបនិកអាស៊ានទាំងប្រាំ ដែលរួមមានទាំងសិង្ហបុរីផង ។ លោក លី ដែលធ្វើជាអ្នកកាច់បង្កូចនៃកិច្ចប្រជុំអាស៊ានឆ្នាំ២០១៨ បានអះអាងថា បើពេលនោះ (ឆ្នាំ១៩៦៧) ស្ថាបនិកទាំងប្រាំ មិនធ្វើសម្បទានឲ្យគ្នាខ្លាំងនោះ អាស៊ានក៏គ្មានវត្តមានដែរ ។
តាមរយៈប្រកាសកម្មវីធីផ្លូវការ នៃសិង្ហបុរីជាប្រធានវិលជុំអាស៊ាន លោកនាយករដ្ឋមន្ត្រី លី សៀងឡុង បានរម្លឹកពីប្រវត្តិស្ថានភាពនៅក្នុងតំបន់អាស៊ីអាគ្នេយ៍ មុនពេលនៃការកកើតឡើងអាស៊ានជាអង្គការអន្តររដ្ឋាភិបាលកាលពីជាង៥០ ឆ្នាំមុន ។ ពោលគឺ មុនពេលដែលអាស៊ានបង្កើតឡើងជាផ្លូវការនៅក្នុងឆ្នាំ ១៩៦៧ ដោយស្ថាបនិកទាំងប្រាំ រួមមានឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរី និងថៃ ។
លោកនាយករដ្ឋមន្ត្រី បានលើកឡើងថា តំបន់អាស៊ានពីមុនគឺជាតំបន់ ដែលមានស្ថានភាពយ៉ាប់យឺនបំផុត ដោយពេលនោះ សិង្ហបុរី ទើបតែផ្តាច់ខ្លួនចេញពីម៉ាឡេស៊ី , ការប្រឈមមុខគ្នារវាងឥណ្ឌូណេស៊ី និងម៉ាឡេស៊ី ផ្តើមផ្ទុះចេញខ្លាំង ខណៈសង្គ្រាមវៀតណាមបានកើនកំដៅខ្លាំង ហើយបានគំរាមកំហែងសន្តិសុខដល់ប្រទេសក្នុងតំបន់ទៀតផង ។
«តែយ៉ាងណាក្តី បើយើងត្រឡប់ប់ទៅកាន់អតីតកាលបន្តិច ! ប្រសិនបើមេដឹកនាំស្ថាបនិកអាស៊ានទាំងប្រាំ មិនបានប្រកាន់ខ្ជាប់ជំហរភក្តីភាព និងបង្កើតអាស៊ាននៅក្នុងឆ្នាំ១៩៦៧នោះទេ តំបន់ទាំងមូលទំនងជាមិនអាចរួចផុតពីជម្លោះឡើយ។ ហើយសិង្ហបុរី ដែលជាប្រទេសដ៏តូច និងទន់ខ្សោយនៅពេលនោះ ក៏ប្រហែលជាមិនអាចឆ្លងផុតពីផលលំបាកដែលបង្កឡើងដោយប្រទេសជិតខាងបានដែរ» ។ នេះ គឺជាលើកឡើងរបស់លោកនាយករដ្ឋមន្ត្រី លី ។
តាមរយៈវេទិកាដដែលនោះ លោក លី ក៏បានទទួលស្គាល់ពីសមិទ្ធផលនៃការកសាងអាស៊ានឲ្យកាន់រឹងមាំ និងរីកចម្រើនទៅមុខ តាមរយៈការចូលរួមរួមរស់ពីបណ្តាប្រទេសសមាជិកក្រោយទាំងប្រាំដែលរួមមាន ព្រុយណេ វៀតណាម មីយ៉ាន់ម៉ា ឡាវ និងកម្ពុជាផងដែរ ។ លោក សង្កត់ធ្ងន់ថា សព្វថ្ងៃនេះ អាស៊ានមិនមែនត្រឹមតែជា «យុថ្កាសន្តិសុខសម្រាប់តំបន់»ប៉ុណ្ណោះនោះទេ តែក៏ជាសហគមន៍ដែលមានកិច្ចសហប្រតិបត្តិសេដ្ឋកិច្ច និងបញ្ហាសង្គមផងដែរ ។
សម្រាប់លោក លី ដែលកំពុងតែដឹកនាំកិច្ចប្រជុំកំពូលអាស៊ានឆ្នាំ២០១៨ ក្រោមមូលបទ « ភាពអត់ធន់ និងច្នៃប្រឌិត» ការចូលរួមគ្នាផ្នែកសេដ្ឋកិច្ចទាំងដប់ប្រទេសរបស់អាស៊ាន បានធ្វើឲ្យអាស៊ានក្លាយជាក្រុមដ៏លេចធ្លោរ និងមានការទាក់ទាញមួយ ៕
Tag:
អាស៊ាន
សិង្ហបុរី
លី សៀនឡុង
© រក្សាសិទ្ធិដោយ thmeythmey.com