អន្តរជាតិ
ទីប្រឹក្សាជាតិអាមេរិក៖ «ការរំសាយអាវុធនុយក្លេអ៊ែរលីប៊ី អាចជាគំរូសម្រាប់កូរ៉េខាងជើងបច្ចុប្បន្ន»
× លោក ចន បុលតុន (John Bolton) ទីប្រឹក្សាសន្តិសុខជាតិអាមេរិក បានផ្តល់យោបល់ថា ការរំសាយអាវុធនុយក្លេអ៊ែររបស់លីប៊ីឆ្នាំ ២០០៤ អាចជាគំរូសម្រាប់កូរ៉េខាងជើងពេលនេះ។ ប៉ុន្តែស្លាប់របស់មេដឹកនាំលីប៊ីលោក មូអាម៉ា ហ្កាដាហ្វី កាលពីឆ្នាំ ២០១១ ដោយសារស្នាដៃបណ្តាប្រទេសលោកខាងលិចប្រហែលជាមេរៀនសំខាន់ដែលលោក គីម ជុងអ៊ុន ចាំទុកក្នុងចិត្តនោះ។
ជិត ១៥ឆ្នាំមុន របបដឹកនាំផ្តាច់ការលីប៊ីក្រោមការដឹកនាំរបស់លោក មូអាម៉ា ហ្កាដាហ្វី បានឯកភាពជាមួយរដ្ឋបាលលោក ចច ដាប៊ិលយូប៊ូស បោះបង់សម្ភារៈផលិតនុយក្លេអ៊ែររបស់ខ្លួន និងបញ្ជូនវាទៅកាន់ក្រុង Tennessee សហរដ្ឋអាមេរិកផង។
នៅពេលនេះ ទីប្រឹក្សាសន្តិសុខរបស់លោក ដូណាល់ ត្រាំ គឺលោក ចន បុលតុន ដែលធ្លាប់ធ្វើជាឯកអគ្គរដ្ឋទូតអាមេរិកប្រចាំអង្គការសហប្រជាជាតិបានបញ្ចេញយោបល់ថា ការរំសាយអាវុធនុយក្លេអ៊ែរនៅលីប៊ីនេះ អាចជាគម្រូល្អសម្រាប់កូរ៉េខាងជើងបច្ចុប្បន្ន។
ទីភ្នាក់ងារព័ត៌មាន AFP បានស្រង់សម្តីលោក បុលតុន ក្នុងបទសម្ភាសជាមួយសារព័ត៌មាន CBS ដូច្នេះ៖« យើងមានការរំសាយសព្វាវុធនៅលីប៊ីចន្លោះឆ្នាំ ២០០៣ និង ២០០៤ ក្នុងចិត្តដែលវាជាគម្រូមួយ។ ពិតណាស់ថា វាមានភាពខុសគ្នាច្រើន ព្រោះកម្មវិធីនុយក្លេអ៊ែរលីប៊ីតូចជាងនេះឆ្ងាយណាស់ ប៉ុន្តែវាជាមូលដ្ឋាននៃកិច្ចព្រមព្រៀងដែលយើងបានបង្កើតឡើងមក»។
បន្ថែមពីនេះ ទីប្រឹក្សាសន្តិសុខជាតិខាងលើក៏បានបកស្រាយផងដែរថា ការរំសាយអាវុធនេះអាចអាស្រ័យតាមការចង់បានរបស់កូរ៉េខាងជើងផងដែរ ឲ្យតែវាល្អនិងមានតម្លាភាពនោះ។
លោកនិយាយបែបនេះ៖ «វានឹងបង្ហាញឲ្យឃើញពីការសម្រេចចិត្តបែបយុទ្ធសាស្ត្រក្នុងការបោះបង់អាវុធនុយក្លេអ៊ែរ។ វាមិនចាំបាច់ទាល់តែដូចលីប៊ីទេ ប៉ុន្តែវាត្រូវតែជាការសម្រេចចិត្តដែលពេញលេញ និងឃើញជាក់ស្តែង។ វាប្រហែលជាលោក គីម ជុងអ៊ុន មានគំនិតខ្លះហើយយើងគួរតែលឺគំនិតនោះពីមាត់គាត់ផ្ទាល់»។
យ៉ាងណាក៏ដោយចុះ ការលើកឡើងពីគម្រូរំសាយអាវុធនុយក្លេអ៊ែរកូរ៉េខាងជើងមកជាឧទាហរណ៍ជារឿងចម្រូងចម្រាសបំផុតមួយ។ ការស្លាប់របស់លោក ហ្កាដាហ្វី ក្រោមស្នាដៃរបស់អាមេរិក និងសម្ព័ន្ធមិត្តក្នុងការអន្តរាគមន៍ឆ្នាំ ២០១១ ប្រហែលជាមេរៀនដ៏ធំសម្រាប់មេដឹកនាំកូរ៉េខាងជើងដែរ។ វាបង្ហាញឲ្យឃើញថា គេមិនអាចទុកចិត្តលោកខាងលិចខ្លាំងពេកទេព្រោះវាអាចនឹងនាំគ្រោះថ្នាក់ដល់ខ្លួនផង។
តាមពិតទៅ ការរំសាយអាវុធនុយក្លេអ៊ែរកូរ៉េខាងជើងក្លាយជាប្រធានបទសំខាន់សម្រាប់ការចរចារវាងលោក ត្រាំ និងលោក គីម ដែលអាចនឹងកើតឡើងចុងខែឧសភា ឬដើមខែមិថុនាខាងមុខនោះ។ កន្លងមក ក្រុងព្យុងយ៉ាងបានអះអាងរួចហើយថា ខ្លួនមានឆន្ទៈកម្ទេចទីតាំងសាកល្បងអាវុធនុយក្លេអ៊ែរ ឈប់បាញ់សាកល្បងមីស៊ីល និងនុយក្លេអ៊ែរ។ បើតាមអ្នកនាំពាក្យកូរ៉េខាងត្បូងដែលស្រង់សម្តីលោក គីម ជុងអ៊ុននោះ កូរ៉េខាងជើងក៏អាចនឹងបោះបង់អាវុធនុយក្លេអ៊ែរផងដែរ ឲ្យតែអាមេរិកសន្យាថារក្សាសន្តិសុខ និងមិនឈ្លានពានទឹកដីខ្លួន។
គេមិនទាន់អាចដឹងបានទេថា វានឹងមានការឯកភាពគ្នាយ៉ាងដូចម្តេចចំពោះដំណើរការនៃការរំសាយអាវុធ។ រឿងចម្រូងចម្រាសគឺ និយមន័យនៃការរំសាយអាវុធនុយក្លេអ៊ែរ។ នេះក៏ព្រោះថាសម្រាប់លោក ត្រាំ ផ្ទាល់ការរំសាយអាវុធមានន័យថា ដកហូតអាវុធនុយក្លេអ៊ែរ ខណៈដែលកូរ៉េខាងជើងអះអាងថា រំសាយអាវុធនោះត្រឹមជារក្សាទុកអាវុធដែលខ្លួនមាន ហើយឈប់បន្តផលិត និងឈប់បាញ់សាកល្បងទៀត៕
Tag:
កូរ៉េខាងជើង
លីប៊ី
អាមេរិក
នុយក្លេអ៊ែរ
© រក្សាសិទ្ធិដោយ thmeythmey.com