គណបក្សឆន្ទៈខ្មែរ នឹងដាក់ពាក្យដើម្បីចូលរួមប្រកួតក្នុងការបោះឆ្នោត

ជាតិ

នយោបាយជាតិ

គណបក្សឆន្ទៈខ្មែរ នឹងដាក់ពាក្យដើម្បីចូលរួមប្រកួតក្នុងការបោះឆ្នោត

30, Apr 2018 , 12:37 pm

រូបភាព

គណបក្សឆន្ទៈខ្មែរ ដឹកនាំដោលោក គង់ មុនីកា បានដាក់ពាក្យស្នើសុំចុះបញ្ជីគណបក្សនៅក្រសួងមហាផ្ទៃ។ រូបពីហ្វេសបុករបស់គណបក្សឆន្ទៈខ្មែរ

ដោយ: សារព័ត៌មានថ្មីៗ

គណបក្សឆន្ទៈខ្មែរ ដែលបង្កើតឡើងដោយលោក គង់ មុនីកា កូនប្រុសពៅរបស់លោក គង់ គាំ សម្រេចចិត្តថា នឹងដាក់ពាក្យទៅកាន់គណៈកម្មាធិការជាតិរៀបចំការបោះឆ្នោត (គ.ជ.ប.) ដើម្បីឈរឈ្មោះប្រកួតប្រជែងយកអាសនៈ សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦។

លោក គង់ គាំ អតីតប្រធានគណបក្សភ្លើងទៀន និងធ្លាប់ជាទីប្រឹក្សាជាន់ខ្ពស់នៃគណបក្សសង្គ្រោះជាតិ បានប្រាប់សារព័ត៌មានថ្មីៗតាមទូរសព្ទថា គណបក្សឆន្ទៈខ្មែរ ទំនងជាដាក់ពាក្យទៅកាន់គ.ជ.ប. នៅថ្ងៃទី១៣ ឬ១៤ ខែឧសភា ឆ្នាំ២០១៨។ អតីតអ្ននយោបាយរូបនេះ ដែលធ្លាប់មានឥទ្ធិពលក្នុងក្រុមអ្នកប្រឆាំង និងជាមនុស្សម្នាក់ ដែសតស៊ូជាច្រើនឆ្នាំជាមួយលោក សម រង្ស៊ី បានបញ្ជាក់យ៉ាងដូច្នេះថា៖«គេ បង្កើតគណបក្ស គឺតែងតែមានសង្ឃឹមហើយ ថាមានប្រជាពលរដ្ឋគាំទ្រ។ គណបក្ស ដែលកូនប្រុសរបស់ខ្ញុំបង្កើតនេះ ក៏មានឧត្តមគតិ ចង់បម្រើជាតិដែរ មិនមែនគ្រាន់តែដើម្បីលម្អសួនប្រជាធិបតេយ្យ ឬកំដរមេដឹកនាំសព្វថ្ងៃទេ»។

នៅថ្ងៃចន្ទនេះ គឺជាថ្ងៃទីដំបូងនៃការចុះឈ្មោះគណបក្សនយោបាយ ដើម្បីចូលរួមក្នុងការបោះឆ្នោត។ គណបក្សប្រជាជនកម្ពុជា ដែលកំពុងកាន់អំណាច និងគណបក្សយុវជនកម្ពុជារបស់លោក ពេជ្រ ស្រស់ បានយកពាក្យទៅដាក់នៅគ.ជ.ប. មុនគេ។ ការចុះឈ្មោះគណបក្សសម្រាប់ចូលរួមប្រកួតប្រជែង នឹងបិទបញ្ចប់នៅថ្ងៃទី១៤ ខែឧសភា ឆ្នាំ២០១៨។

លោក សម រង្ស៊ី អតីតប្រធានគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិ បានអំពាវនាវដល់ប្រជាពលរដ្ឋ កុំឲ្យទៅចូលរួមក្នុងការបោះឆ្នោតខាងមុខ។ លោក បានហៅការបោះឆ្នោត ដែលមិនមានវត្តមានរបស់គណបក្សសង្គ្រោះជាតិថា ជាការបោះឆ្នោតក្លែងក្លាយ។

អតីតមេបក្សប្រឆាំងរូបនេះ ថែមទាំងចាត់ទុកការចូលរួមក្នុងការបោះឆ្នោតរបស់គណបក្សដទៃថា គ្រាន់តែដើម្បីលម្អឆាកល្ខោនឲ្យរបបដឹកនាំសព្វថ្ងៃ បានបន្តកាន់អំណាចប៉ុណ្ណោះ។ លោក អះអាងថា ក្រៅពីគណបក្សសង្គ្រោះជាតិ គណបក្សដទៃ មិនអាចប្រកួតប្រជែង និងយកឈ្នះគណបក្សប្រជាជនកម្ពុជាបានទេ។

សូមបញ្ជាក់ថា ការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨៕