អន្តរជាតិ
វៀតណាម ដាស់តឿនអង្គភាពប្រឆាំងពុករលួយកុំខ្លាចថា ការអនុវត្តការងារធ្វើឲ្យកេរ្តិ៍ឈ្មោះបក្សធ្លាក់ចុះ
× យុទ្ធនាការបោសសម្អាតអំពើពុករលួយ ជាពិសេសទៅលើមន្ត្រីសាធារណៈ គឺជាផែនការអនុវត្តអាទិភាពមួយ របស់រដ្ឋាភិបាលវៀតណាម ក៏ដូចជាបក្សកុម្មុយនីស្តីវៀតណាម។ ពាក់ព័ន្ធបញ្ហានេះ ប្រមុខបក្សកុម្មុយនីស្តវៀតណាម លោក Nguyễn Phú Trọng បានដាស់តឿនអាជ្ញាធរពាក់ព័ន្ធទាំងអស់ បន្តខិតខំបំពេញការងារទ្វេដង ដើម្បីទាក់ទាញការចាប់អារម្មណ៍ និងទំនុកចិត្តពីសាធារណជនឡើងវិញ ។
អគ្គលេខាធិការបក្សកុម្មុយនីស្តវៀតណាម លោក Nguyễn Phú Trọng នៅថ្ងៃ២៨ មេសា បានទទូចឲ្យអាជ្ញាធរពាក់ព័ន្ធទាំងអស់ បន្តការស៊ើបអង្កេតលើករណីពុករលួយធំៗ និងសាំញ៉ាំ ក៏ដូចជាបញ្ហាមិនប្រក្រតី លើការគ្រប់គ្រងសេដ្ឋកិច្ច ដែលធ្វើឲ្យប្រជាជនវៀតណាមចាប់អារម្មណ៍ និងស្រងាកចិត្ត ចំពោះការដឹកនាំរបស់រដ្ឋាភិបាល។ នេះបើយោងតាមការចុះផ្សាយរបស់សារព័ត៌មាន Vietnam News ។
តាមប្រភពព័ត៌មានដដែល គណៈកម្មាធិការប្រឆាំងអំពើពុករលួយវៀតណាម ក៏បានរាយការណ៍ដល់ប្រមុខបក្សរូបនេះ ពីកិច្ចប្រឹងប្រឹងរបស់អាជ្ញាធរពាក់ព័ន្ធ ដែលរួមមានទាំងប៉ូលិស ទាហាន និងអង្គភាពយុត្តិធម៌ និងក្រុមអធិការកិច្ចរដ្ឋាភិបាលវៀតណាម បានសម្រេចលទ្ធផលល្អ និងទទួលបានការសរសើរពីសាធារណជនទៀតផង ។
តាមរយៈជំនួបជាមួយអគ្គលេខាធិការបក្សវៀតណាម គណៈកម្មធិការប្រឆាំងអំពើពុករលួយវៀតណាម បានលើកយកសំណុំរឿង ដែលធ្វើឲ្យសាធារណជនទទួលស្គាល់ និងសរសើរ ចំពោះចំណាត់ការរដ្ឋាភិបាលវៀតណាមជាងគេ គឺការកាត់ក្តីលើមន្ត្រីមានអំណាចតែម្តង។ ជាក់ស្តែងនោះ គឺករណីជំនុំជម្រះជនសង្ស័យចំនួន២២នាក់ ក្នុងករណីពុករលួយ ក្នុងក្រុមហ៊ុនប្រេងរដ្ឋ PetroVietnam ។
ជុំវិញចំណាត់ការប្រឆាំងអំពើពុករលួយនេះដែរ ប្រមុខបក្សកុម្មុយនីស្តវៀតណាម ក៏បានទទួលស្គាល់ថាជារឿងដ៏លំបាកមួយ ដ្បិតលោក មើលឃើញថា ចំណាត់ការនេះ ប្រៀបដូចជាការវាយសំពងមកលើខ្លួនឯងយ៉ាងដូច្នេះ។ មានន័យថា ចាត់វិធានប្រឆាំងជនប្រព្រឹត្តអំពើពុករលួយ ដែលជាមន្ត្រីជាន់ខ្ពស់រដ្ឋា ភិបាល និងជាមន្ត្រីជាន់ខ្ពស់បក្សកុម្មុយនីស្ត ប្រៀបដូចបង្ហាញពីភាពខ្សោយ នៃការដឹកនាំរបស់បក្សកុម្មុយនីស្ត។
យ៉ាងណាក៏ដោយ តាម Vietnam News ប្រមុខបក្សវៀតណាមរូបនេះ ក៏បានផ្ញើសារដាស់តឿន ដល់អ្នកអនុវត្តពាក់ព័ន្ធផងដែរថា៖« យើងមិនត្រូវខ្លាចថា ការចាត់វិធានប្រឆាំងអំពើពុករលួយលើខ្លួន (មន្ត្រីពុករលួយ) នឹងធ្វើឲ្យកេរ្តិ៍ឈ្មោះរបស់បក្សធា្លក់ចុះឡើយ ដ្បិតយើងក៏មិនអាចធ្វើឲ្យខ្លួនរីកចម្រើនបានដែរ ប្រសិនយើងខ្លាចចំណុចខ្សោយរបស់យើងនោះ»។ លោកបន្តថា តម្លាភាព គឺជាគន្លឹះមួយដែលធ្វើសាធារណជនមានទំនុកឡើងវិញលើបក្ស។
គួររម្លឹកបន្តិចដែរថា នៅចុងឆ្នាំ ២០១៧កន្លងទៅ គណបក្សកុម្មុយនីស្ដវៀតណាម បានដាក់ចេញបទបញ្ញត្តិធ្ងន់ធ្ងរមួយ ដោយសំដៅការគ្រប់គ្រងសកម្មភាពមន្ត្រីជាន់ខ្ពស់ ដើម្បីធ្វើយ៉ាងណា ប្រឆាំងអំពើពុករលួយ ដែលជាជំងឺសង្គម ក៏ដូចជាបញ្ចៀសបញ្ហាបក្សពួកនិយម និងធានាបានថា មន្ត្រីវៀតណាមមានភាពស្អាតស្អំ មិនកេងប្រវ័ញ្ចរដ្ឋ៕
© រក្សាសិទ្ធិដោយ thmeythmey.com