អន្តរជាតិ
ម៉ាឡេស៊ីប្រើ«ច្បាប់ប្រឆាំងព័ត៌មានក្លែងក្លាយ»ចាប់មនុស្សដាក់គុកជាលើកដំបូង រូបភាព Malaysian Times
× ជនជាតិដាណឺម៉ាកម្នាក់ត្រូវបានតុលាការម៉ាឡេស៊ីកាត់ទោសឲ្យជាប់ពន្ធនាគារមួយសប្តាហ៍ ដោយសារគេបំពានច្បាប់ប្រឆាំងព័ត៌មានក្លែងក្លាយដែលទើបដាក់អនុវត្តថ្មីៗនេះ។ ជននេះបង្ខូចឈ្មោះសមត្ថកិច្ច និងអាជ្ញាធរម៉ាឡេស៊ីពាក់ព័ន្ធនឹងការស្រាវជ្រាវករណីឃាតកម្មជនជាតិប៉ាឡេស្ទីននៅម៉ាឡេស៊ី។
Salah Salem Saleh Sulaiman ជនជាតិដាណឺម៉ាកដើមកំណើតយេម៉ែនត្រូវបានតុលាការម៉ាឡេស៊ីកាត់ទោសឲ្យជាប់ពន្ធនាគារមួយសប្តាហ៍ដោយសារលោកបំពានច្បាប់ប្រឆាំងព័ត៌មានក្លែងក្លាយដោយនិយាយចោទប្រកាន់អាជ្ញាធរទាំងគ្មានមូលដ្ឋានត្រឹមត្រូវ។
យោងតាមទីភ្នាក់ងារព័ត៌មាន AFP ជនខាងលើនេះបានសារភាពថា ខ្លួនបានបង្កើតវីដេអូ និងផុសក្នុង YouTube ដោយចោទប្រកាន់ថាអាជ្ញាធរយឺតយ៉ាវក្នុងការឆ្លើយតបបញ្ហាក្រោយជនជាតិប៉ាឡេស្ទីនម្នាក់ត្រូវបានគេសម្លាប់នៅក្រុងកូឡាឡាំពួរ។ ជននេះបានបញ្ជាក់ផងដែរថាខ្លួនមិនបានដឹងពីច្បាប់ម៉ាឡេស៊ីឡើយ។
«ខ្ញុំទទួលស្គាល់ថា ខ្ញុំបង្កើតកំហុសឆ្គងមួយព្រោះខ្ញុំមិនបានដឹងច្បាស់ពីច្បាប់នៃប្រទេសនេះ»។ Salah និយាយបែបនេះ។
តាមពិតទៅម៉ាឡេស៊ីទើបអនុម័តច្បាប់ប្រឆាំងអំពើពុករលួយកាលពីដើមខែមេសាកន្លងមកនេះទេ ហើយសកម្មភាពនេះបានធ្វើឲ្យមានការរិះគន់ខ្លាំងផងពីសំណាក់ក្រុមសិទ្ធិមនុស្ស។ គេចាត់ទុកថា ម៉ាឡេស៊ីកំពុងព្យាយាមរឹតត្បិតសិទ្ធិសេរីភាពបញ្ចេញមតិរបស់ប្រជាជនផងដែរ។
ត្រឡប់មកវិញ តាមភស្តុតាង និងចម្លើយសារភាពរបស់ជនជាតិដាណឺម៉ាកខាងលើ ចៅក្រម Zaman Mohamad បានកាត់ទោសជនខាងលើឲ្យជាប់គុកមួយសប្តាហ៍ និងត្រូវបង់លុយ ២៥០០ដុល្លារបន្ថែមទៀត។ ក្នុងករណីដែលគេមិនមានលទ្ធភាពបង់លុយសំណង Salah អាចនឹងត្រូវជាប់ឃុំឃាំងមួយខែផងដែរ។
សូមទាញការចាប់អារម្មណ៍បន្តិចថា ជនដែលត្រូវបានគេបាញ់សម្លាប់មនុស្សគឺ Fadi al-Batsh អ្នកជំនាញផលិតគ្រាប់រ៉ុក្កែត ហើយលោកត្រូវបានគេបាញ់សម្លាប់កាលពីថ្ងៃ ២១ ខែមេសា។ ក្រុមគ្រួសារជនរងគ្រោះបានចោទប្រកាន់ថា ក្រុមចារកម្មរបស់អ៊ីស្រាអែលជាអ្នកនៅពីក្រោយការធ្វើឃាតបុរសជនជាតិប៉ាឡេស្ទីននេះ។ យ៉ាងណាក៏ដោយ ខាងអាជ្ញាធរអ៊ីស្រាអែលបានទាត់ចោលការចោទប្រកាន់នេះ។
Tag:
ម៉ាឡេស៊ី
ច្បាប់ប្រឆាំងព័ត៌មានក្លែងក្លាយ
ដាណឺម៉ាក
© រក្សាសិទ្ធិដោយ thmeythmey.com