កីឡាអន្តរជាតិ
អន្តរជាតិ
កូរ៉េខាងត្បូង ចង់បបួលកូរ៉េខាងជើងបង្កើតក្រុមកីឡារួមគ្នា ចូលរួមកីឡាអាស៊ីនៅឥណ្ឌូណេស៊ី
× សហព័ន្ធកីឡាចំនួន ៧ របស់កូរ៉េខាងត្បូង កំពុងពិចារណាបង្កើតក្រុមកីឡារួមគ្នាជាមួយកូរ៉េខាងជើងដើម្បីចូលរួមក្នុងព្រឹត្តិការណ៍កីឡាអាស៊ី (Asian Games) នៅឥណ្ឌូណេស៊ី ឆ្នាំ២០១៨នេះ។ នេះបើតាមមន្ត្រីម្នាក់បានប្រាប់ទីភ្នាក់ងារព័ត៌មាន AFP នៅថ្ងៃទី៣០ ខែមេសា ប៉ុន្តែប្រភពដដែលបញ្ជាក់ថា វិញ្ញាសាកីឡាបាល់ទាត់ កូរ៉េទាំងពីរនឹងមិនចូលរួមជាមួយគ្នាទេ។
បើតាមអ្នកនាំពាក្យរបស់គណៈកម្មាធិការជាតិអូឡាំពិកខាងត្បូង ប្រភេទកីឡាចំនួន៧ ដែលកូរ៉េទាំងពីរអាចនឹងរួមគ្នានោះរួមមាន កីឡាបាល់បោះ, យ៉ូដូ, វាយកូនបាល់លើតុ, ទូកកានូ, សូហ្វតិន្នីស, ប្រណាំទូក និង កីឡាកាយសម្ព័ន្ធ។
មូលហេតុដែលនាំឲ្យមានការបង្កើតក្រុមកីឡារួមគ្នានេះ គឺក្រោយមានកិច្ចប្រជុំកំពូលរវាងមេដឹកនាំកូរ៉េទាំងពីរគឺប្រធានាធិបតីកូរ៉េខាងត្បូង មួន ចេអ៊ីន និងមេដឹកនាំកំពូលកូរ៉េខាងជើង គីម ជុងអ៊ុន នៅថ្ងៃទី២៧ ខែមេសា ឆ្នាំ ២០១៨។ ភាគីទាំងសងខាងបានប្តេជ្ញាបញ្ចប់សង្គ្រាម បង្រួបបង្រួមកូរ៉េ និងសហការគ្នាយ៉ាងសកម្មដើម្បីបង្កើតសន្តិភាពឲ្យបានល្អ និងអចិន្ត្រៃយ៍នៅឧបទ្វីបកូរ៉េ ហើយថែមទាំងយល់ព្រមបង្ហាញសាមគ្គីភាពដោយ«រួមគ្នាចូលរួមក្នុងព្រឹត្តិការណ៍កីឡាអន្តរជាតិដូចជាកីឡាអាស៊ីឆ្នាំ២០១៨នេះ»។
កូរ៉េទាំងពីរធ្លាប់បានរួមគ្នារួចមកហើយដោយបញ្ចូលគ្នាក្នុងវិញ្ញាសាកីឡាហ៊ុគីទឹកក (Ice Hockey) នៅក្នុងព្រឹត្តិការណ៍កីឡអូឡាំពិករដូវរងានាទីក្រុងព្យុងឆាង (Pyeongchang) ប្រទេសកូរ៉េខាងត្បូងកាលពីខែកុម្ភៈកន្លងទៅ។ លើសពីនេះពួកគេក៏បានដើរហែក្បួនរួមគ្នានៅក្រោមទង់ជាតិឧបទ្វីបកូរ៉េតែមួយនៅថ្ងៃបើកឆាកនោះផងដែរ។
កីឡាអាស៊ី (Asian Games) លើកទី១៨ នឹងធ្វើឡើងក្នុងក្រុងហ្សាកាតា និងប៉ាលបាង (Palembang) ប្រទេសឥណ្ឌូណេស៊ី ចាប់ពីថ្ងៃទី ១៨ ខែសីហា ដល់ថ្ងៃទី២ ខែកញ្ញា ឆ្នាំ២០១៨៕
Tag:
កីឡាអាស៊ី
Asian Games
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com