FIFA
កីឡាជាតិ
ជាតិ
World Cup៖ FIFA នឹងឧបត្ថម្ភបន្ថែម ១០លានដុល្លារ ដល់ក្រុមពីតំបន់អាហ្វ្រិក
×![]()
ដោយ: ទេព ពិទូរ្យ
សហព័ន្ធកីឡាបាល់ទាត់អន្តរជាតិ (FIFA) នឹងផ្តល់ប្រាក់លើកទឹកចិត្តចំនួន ១០លានដុល្លារដល់ក្រុមមកពីអាហ្វ្រិក ៥ ដែលឈានទៅកាន់ការប្រកួត FIFA World Cup នៅរុស្ស៊ីឆ្នាំ២០១៨ ដើម្បីជួយពួកគេត្រៀមរៀបចំខ្លួនសម្រាប់ព្រឹត្តិការណ៍នេះ។ នេះបើតាមការបញ្ជាក់ពី សហព័ន្ធកីឡាបាល់ទាត់អាហ្វ្រិក (CAF)។
បើតាមការផ្សាយរបស់ទីភ្នាក់ងារព័ត៌មាន Reuters ក្រុមកីឡាបាល់ទាត់ជម្រើសជាតិ អេហ្ស៊ីប ម៉ារ៉ុក នីហ្សេរីយ៉ា សេណេហ្គាល់ និង ទុយណេស៊ី នឹងទទួលបានប្រាក់ក្នុងមួយក្រុម ២លានដុល្លារពី FIFA ដើម្បីយកទៅផ្គត់ផ្គង់ដល់កីឡាករមុនពេលធ្វើដំណើរទៅរុស្ស៊ីនៅពាក់កណ្តាលខែមិថុនាខាងមុខនេះ។
ប្រធានសហព័ន្ធកីឡាបាល់ទាត់អាហ្វ្រិកលោក Ahmad Ahmad បានលើកឡើងថា ការផ្តល់ប្រាក់សម្រាប់មុនចំនួន២លានដុល្លារសម្រាប់ក្រុមនៅអាហ្វ្រិកនេះ ដោយសារធ្លាប់មានបញ្ហារួចមកហើយអំពីការទូទាត់លើប្រាក់ចំណាយទៅលើកីឡាករមិនគ្រប់តាមតួលេខពិតប្រាកដ ក្នុងព្រឹត្តិការណ៍ World Cup កន្លងមកដែលផ្តល់ផលប៉ះពាល់យ៉ាងខ្លាំងដល់រូបភាពកីឡាបាល់ទាត់អាហ្វ្រិក និងការប្រកួតរបស់ពួកគេ។
បញ្ចាខាងលើនេះ បានកើតឡើងលើក្រុមនីហ្សេរីយ៉ានៅក្នុងការប្រកួតពានរង្វាន់ Confederations Cup ឆ្នាំ ២០១៣ នៅប្រស៊ីល និងបន្តជះឥទ្ធិពលយ៉ាងធ្ងន់ធ្ងរដល់ការប្រកួត World Cup ឆ្នាំ២០១៤ ថែមទៀត។ បញ្ហាស្រដៀងគ្នានេះ ក៏បានកើតឡើងលើក្រុមអាហ្វ្រិកដទៃទៀតផងដែរ។
សូមបញ្ជាក់ថា ក្រុមទាំង ៣២ ដែលបានកៅអីទៅចូលរួមក្នុងព្រឹត្តិការណ៍បាល់ទាត់ពិភពលោកលើកទី២២ នៅរុស្ស៊ី ដែលចាប់ផ្តើមពីថ្ងៃទី១៤ ខែមិថុនា ឆ្នាំ២០១៨ នឹងទទួលបានក្នុងមួយក្រុម ១.៥ លានដុល្លារពី FIFA ហើយនឹងប្រាក់រង្វាន់បន្ថែមទៀតយ៉ាងហោចណាស់ ៨លានដុល្លារនៅក្រោយពេលបញ្ចប់ព្រឹត្តិការណ៍៕
Tag:
បាល់ទាត់
FIFA World Cup
អាហ្វ្រិក
© រក្សាសិទ្ធិដោយ thmeythmey.com
