ជាតិ
នយោបាយជាតិ
តុលាការកំពូល បើកសវនាការលើសំណុំរឿងលោក កឹម សុខា នៅព្រឹកនេះ
× តុលាការកំពូល កំពុងដំណើរការសវនាការ នៅព្រឹកថ្ងៃទី៧ ខែឧសភា ឆ្នាំ២០១៨នេះ លើសំណុំរឿងរបស់លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារត្រពាំងផ្លុង ក្នុងខេត្តត្បូងឃ្មុំ។
សវនាការនេះ មានតែក្រុមមេធាវីរបស់លោក កឹម សុខា ប៉ុណ្ណោះ។ ប៉ុន្តែ លោក កឹម សុខា មិនត្រូវបានតុលាការ បង្គាប់ឲ្យដឹកមកចូលរួមក្នុងសវនាការនោះទេ។
ការបើកសវនាការនេះ គឺធ្វើឡើងតាមបណ្តឹងសាទុក្ខរបស់ក្រុមមេធាវី ដែលសុំជំទាស់នឹងសាលាដំបូងរាជធានីភ្នំពេញ និងសាលាឧទ្ធរណ៍ ក្នុងការសម្រេចឲ្យលោក កឹម សុខា បន្តជាប់ឃុំរយៈពេល៦ខែទៅមុខទៀត។ គោលបំណងរបស់ក្រុមមេធាវី គឺចង់ឲ្យដោះលែងលោក កឹម សុខា ជាបណ្តោះអាសន្ន។
ជានីតិវិធី ជនត្រូវចោទ មិនអាចត្រូវបានដាក់ឲ្យជាប់ឃុំលើសពី៦ខែឡើយ។ ក្នុងអំឡុងរយៈពេល៦ខែ នៃការជាប់ឃុំ ចៅក្រមស៊ើបសួរ ត្រូវសម្រេចថា ដោះលែងជនត្រូវចោទ ឬក៏បញ្ជូនទៅជំនុំជម្រះ។ យ៉ាងណាក៏ដោយ ចៅក្រមស៊ើបសួរ នៅតែអាចសម្រេចជាលើកទី២ ដើម្បីដាក់ឲ្យជនត្រូវចោទ ជាប់ឃុំរយៈពេល៦ខែទៀត ប្រសិនបើយល់ថា សំណុំរឿង ត្រូវការភស្តុតាងបន្ថែម។
សមត្ថកិច្ច បានចាប់លោក កឹម សុខា កាលពីដើមខែកញ្ញា ឆ្នាំ២០១៨ ក្រោមការសង្ស័យថា បានគប់គិតជាមួយបរទេសដើម្បីផ្តួលរំលំរដ្ឋាភិបាលកម្ពុជា ដែលតុលាការ ចាត់ទុកជាអំពើក្បត់ជាតិ៕
© រក្សាសិទ្ធិដោយ thmeythmey.com