ប្រធានគ.ជ.ប. បកស្រាយថា ការបោះឆ្នោត មិនកំណត់ពីចំនួនពលរដ្ឋឡើយ

ជាតិ

នយោបាយជាតិ

ប្រធានគ.ជ.ប. បកស្រាយថា ការបោះឆ្នោត មិនកំណត់ពីចំនួនពលរដ្ឋឡើយ

07, May 2018 , 12:26 pm

រូបភាព

លោក ស៊ិក ប៊ុនហុក ប្រធានគ.ជ.ប. ឡើងថ្លែងក្នុងពីធីបញ្ជ្រាបការយល់ដឹងពីការបោះឆ្នោត ដែលរៀបចំនៅខេត្តតាកែវ។ រូបពីគ.ជ.ប.

ដោយ: សារព័ត៌មានថ្មីៗ

ភ្នំពេញ៖ ការបោះឆ្នោតនៅកម្ពុជា នៅតែត្រូវបានចាត់ទុកថាបានការ ទោះជាអ្នកទៅបោះឆ្នោតមានចំនួនតិចឬច្រើន។ នេះជាការអះអាងរបស់លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប.)។

លោក ស៊ិក ប៊ុនហុក ថ្លែងថា ច្បាប់នៅកម្ពុជា រួមទាំងនៅអឺរ៉ុប មិនបានចែងឬកំណត់ពីចំនួននៃអ្នកទៅបោះឆ្នោតនោះទេ។ លោក បញ្ជាក់យ៉ាងដូច្នេះថា៖«នៅអឺរ៉ុប សូម្បីតែអ្នកបោះឆ្នោត មានចំនួនតែ៣០ភាគរយ ក៏អឺរ៉ុបមិនបដិសេធការបោះឆ្នោតដែរ»។

ប្រធានគ.ជ.ប. បន្ថែមថា ការបោះឆ្នោតនៅតែស្របច្បាប់ដដែល ទោះជាគ្មានគណបក្សសង្គ្រោះជាតិ។ លោក បកស្រាយថា ច្បាប់នៅកម្ពុជា មិនបានបែងចែកពីគណបក្សតូច គណបក្សធំ គណបក្សកាន់អំណាច ឬគណបក្សប្រឆាំង នោះទេ។

ការលើកឡើងរបស់លោក ស៊ិក ប៊ុនហុក ខាងលើ គឺធ្វើឡើងក្នុងកម្មវិធីបញ្ជ្រាបការយល់ដឹងអំពីការបោះឆ្នោត ដែលរៀបចំនៅខេត្តតាកែវ។ អ្នកនាំពាក្យគ.ជ.ប. អះអាងកន្លងមកថា កម្មវិធីនេះ នឹងត្រូវរៀបចំនៅគ្រប់រាជធានី-ខេត្ត។

ការបកស្រាយរបស់ប្រធានគ.ជ.ប. គឺស្របនឹងការអំពាវនាវកុំឲ្យប្រជាពលរដ្ឋទៅបោះឆ្នោត ពីសំណាក់លោក សម រង្ស៊ី អតីតប្រធានគណបក្សសង្គ្រោះជាតិ។ លោក សម រង្ស៊ី ដែលកំពុងនិរទេស មិនត្រឹមតែអំពាវនាវតែមាត់នោះទេ លោកថែមទាំងជំរុញឲ្យប្រជាពលរដ្ឋ ចែកខិត្តប័ណ្ណតៗគ្នាថែមទៀត ដើម្បីកុំទៅចូលរួមបោះឆ្នោត។ លោក បានហៅការបោះឆ្នោត ថាជាការបោះឆ្នោតក្លែងក្លាយ បើគ្មានគណបក្សសង្គ្រោះជាតិ។

ការអំនាវនាវរបស់លោក សម រង្ស៊ី បានរងប្រតិកម្មពីសម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។ ប្រមុខរដ្ឋាភិបាល និងជាប្រធានគណបក្សកាន់អំណាចរូបនេះ បានចាត់ទុកការឃោសនាមិនឲ្យពលរដ្ឋទៅបោះឆ្នោត ថាជាអំពើរំលោភច្បាប់។

ចំណែកលោក សុខ ឥសាន អ្នកនាំពាក្យគណបក្សកាន់អំណាច ក៏និយាយច្រើនលើកច្រើនសាដែរ ជំវិញការបោះឆ្នោត។ លោក សន្និដ្ឋានថា ប្រជាពលរដ្ឋភាគច្រើន នឹងទៅបោះឆ្នោត ដោយមិនបោះបង់ឱកាសនេះ តាមការអំពាវនាវរបស់អតីតមេគណបក្សប្រឆាំងនោះទេ។

យ៉ាងណាក៏ដោយ សហគមន៍អន្តរជាតិមួយចំនួន នៅតែទាមទារឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិទីពីរ និងផ្តល់ឱកាសឲ្យគណបក្សរបស់លោក រស់ឡើងវិញ ដើម្បីបានចូលរួមការបោះឆ្នោត។ សហគមន៍អន្តរជាតិ យល់ថា ការបោះឆ្នោត នឹងមិនមានភាពស្របច្បាប់ និងមិនប្រព្រឹត្តទៅតាមគន្លងប្រជាធិបតេយ្យឡើយ បើគណបក្សប្រឆាំងធំជាងគេ ត្រូវបានផាត់ចេញ។

បច្ចុប្បន្ន គ.ជ.ប. កំពុងទទួលពាក្យរបស់គណបក្សនយោបាយ ដើម្បីចូលរួមប្រកួតយកអាសនៈរដ្ឋសភា សម្រាប់នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។ មកដល់ពេលនេះ គណបក្សកាន់អំណាច និងគណបក្សមួយចំនួនទៀត បានដាក់ពាក្យទៅគ.ជ.ប. រួចហើយ ខណៈគណបក្សផ្សេងពីនេះ កំពុងបំពេញបែបបទ។ ការចុះឈ្មោះគណបក្ស នៅគ.ជ.ប. ដែលចាប់ផ្តើមតាំងពីថ្ងៃទី៣០ ខែមេសាមក នឹងត្រូវបិទបញ្ចប់ទៅវិញ នៅថ្ងៃទី១៤ ខែឧសភា ឆ្នាំ២០១៨៕