FIFA
កីឡាអន្តរជាតិ
អន្តរជាតិ
World Cup 2026៖ អតីតមេ FIFA ជំទាស់នឹងសំណើដេញថ្លៃ ដោយឲ្យប្រទេសរួមគ្នាជាម្ចាស់ផ្ទះ
រូបភាពី AFP, លោក Sepp Blatter អតីតប្រធាន FIFA
×![]()
ដោយ: ទេព ពិទូរ្យ
អតីតប្រធានសហព័ន្ធកីឡាបាល់ទាត់អន្តរជាតិ (FIFA) លោក Sepp Blatter បានបង្ហាញទស្សនផ្ទាល់របស់លោក ថាការប្រកួតពានរង្វាន់ FIFA World Cup គួរតែធ្វើឡើងនៅក្នុងប្រទេសមួយជាជាងរៀបចំដោយប្រទេសច្រើនបញ្ចូលគ្នា។
លោក Blatter ដែលបច្ចុប្បន្នមានវ័យ៨២ឆ្នាំ បាននិយាយថាអង្គភាពគ្រប់គ្រងកីឡាបាល់ទាត់ពិភពលោកបានចាប់អារម្មណ៍លើការរៀបចំការប្រកួត World Cup ដោយឲ្យសហប្រទេសជាម្ចាស់ផ្ទះរួម ព្រោះពួកគេចង់បង្កើនសមាជិកដល់ ៤៨ក្រុម។
ការបោះឆ្នោតដើម្បីប្រជែងសិទ្ធិធ្វើម្ចាស់ផ្ទះនៃព្រឹត្តិការណ៍កីឡាបាល់ទាត់ពិភពលោកឆ្នាំ២០២៦ នឹងត្រូវធ្វើឡើងនៅថ្ងៃទី១៣ ខែមិថុនា ឆ្នាំ២០១៨ ក្នុងក្រុងមូស្គូ ពោលគឺមុនមួយថ្ងៃនៃការបើកផ្លូវការនៃការប្រកួត World Cup លើកទី២២ នៅរុស្ស៊ី។
អាមេរិក កាណាដា និងម៉ិកស៊ិកបានរួមគ្នាដេញថ្លៃប្រជែងជាមួយម៉ារ៉ុកដើម្បីធ្វើជាម្ចាស់ផ្ទះក្នុងព្រឹត្តិការណ៍នេះ។
«ដើម្បីឲ្យប្រទេសធំៗ៣រួមគ្នា ... ពួកគេត្រូវបង្ហាញថាអាចធ្វើវាតែឯងបានជាមុនសិន ហើយត្រូវបញ្ជាក់ពីមូលហេតុថា ហេតុអ្វីបានជាត្រូវរួមគ្នាទាំង៣?»។ Blatter បានប្រាប់ BBC ដូច្នេះ។
អតីតប្រធាន FIFA សញ្ជាតិស្វេស ធ្លាប់ទទួលភារកិច្ចគ្រប់គ្រងលើកីឡាបាល់ទាត់អស់រយៈពេល ១៧ឆ្នាំ រហូតត្រូវបានហាមឃាត់និងធ្លាក់ចេញពីតំណែងដោយសាររឿងអាស្រូវអំពើពុករលួយក្នុងឆ្នាំ២០១៥។
ក្រោមការដឹកនាំកន្លងមក Blatter ធ្លាប់អនុញ្ជាតតែមួយលើកប៉ុណ្ណោះក្នុងការឲ្យប្រទេសពីររួមគ្នាដេញថ្ងៃធ្វើម្ចាស់ផ្ទះ ដែលកូរ៉េខាងត្បូង និងជប៉ុនបានសិទ្ធិដឹកនាំក្នុងឆ្នាំ២០០២។ ការរៀបចំរួមគ្នាកាលនោះលោកថា ជាការសម្រេចចិត្តខុស និងជាសុបិនអាក្រក់របស់ FIFA ទៀតផង។
លោក Blatter បានបន្ថែមទៀតថា ការដេញថ្លៃរួមគ្នាក្រោយៗមកទៀតត្រូវបាន FIFA បដិសេធតែម្តង ដែលក្នុងនោះរួមមានការច្របាច់ចូលគ្នារវាងលីប៊ី និងទុយណេស៊ីក្នុងឆ្នាំ២០១០, អេស្ប៉ាញ និងព័រទុយហ្គាល់ឆ្នាំ២០១៤ និងចុងក្រោយ ប៊ែលហ្ស៊ិករួមនឹងហូឡង់សម្រាប់ឆ្នាំ២០១៨៕
Tag:
បាល់ទាត់
FIFA World Cup
Sepp Blatter
© រក្សាសិទ្ធិដោយ thmeythmey.com
